ބަންގްލަދޭޝުން ރާއްޖެއަށް 100 ޓަނުގެ ހިލޭ އެހީ ފޯރުކޮށްދީފި
22 އެޕްރީލު 2020 | ބުދަ 06:5320،000 ޕާސަނަލް ޕްރޮޓެކްޓިވް އިކުއިޕްމަންޓްސް (ޕީޕީއީ) ގެނައި
ބަންގްލަދޭޝްގެ އަސްކަރިއްޔާގެ އިސްބޭފުޅަކާއި ރާއްޖޭގެ އަސްކަރިއްޔާގެ ޗީފް އޮފް ޑިފެންސް ފޯސް އަބްދުﷲ ޝަމާލް
ކޮވިޑް-19 ޕެންޑަމިކްއާ ގުޅިގެން ކާޑުގެ ބާވަތްތަކާއި، ބޭހައި އަދި މެޑިކަލް އިކުއިޕްމަންޓުތަކެއް ހިމެނޭގޮތަށް 100 ޓަނުގެ ހިލޭ އެހީ، ބަންގްލަދޭޝް ސަރުކާރުން ރާއްޖެއަށް ފޯރުކޮށްދީފި އެވެ.
ބަންގްލަދޭޝް ސަރުކާރުގެ ފަރާތުން މިތަކެތި ގެނެސްފައި ވަނީ އެގައުމުގެ އަސްކަރީ މަނަވަރެއްގަ އެވެ. އަންގަރާ ދުވަހުގެ ރޭގެ ވަގުތެއްގައި މި މިނަވަރު ރާއްޖެ އައިއިރު، ބުދަ ދުވަހުގެ ހެނދުނު ބޭއްވުނު ރަސްމިއްޔާތެއްގައި އެތަކެތި ދިވެހި ސަރުކާރާ ވަނީ ހަވާލުކޮށްފަ އެވެ.
ދިވެހި ސަރުކާރުން މިތަކެއްޗާ ހަވާލުވުމަށް ބޭއްވި ރަސްމިއްޔާތުގައި ފޮރިން މިނިސްޓަރ އަބްދުﷲ ޝާހިދު އާއި ޑިފެންސް މިނިސްޓަރ މާރިޔާ އަހުމަދުދީދީގެ އިތުރުން، ޗީޗް އޮފް ޑިފެންސް ފޯސް އަބްދުﷲ ޝަމާލު އާއި ބަންގްލަދޭޝް އަސްކަރިއްޔާގެ އިސްވެރިން ބައިވެރިވެވަޑައިގެންނެވި އެވެ.
ނޭޝަނަލް އެމަޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒް ވިދާޅުވެފައިވާގޮތުގައި، މިމަނަވަރުގައި، 20،000 ޕާސަނަލް ޕްރޮޓެކްޓިވް އިކުއިޕްމަންޓު (ޕީޕީއީ)، ހުންނާނެ އެވެ. އަދި 960 އައި ޕްރޮޓެކްޝަން ގޮގްލްސް އާއި ހޭންޑް ސެނިޓައިޒާގެ 5،000 ޕީސްވެސް މީގެ ތެރޭގައި ހިމެނެއެވެ. ހަމައެހެންމެ ކާޑުގެ ބާވަތްތަކުގެ އިތުރުން ތަރުކާރީއާއި މޭވާގެ ބާވަތްތައްވެސް ހިމެނޭ ކަމަށް، މަބްރޫކް ވިދާޅުވި އެވެ.
ބަގްލަދޭޝް ސަރުކާރުގެ މިއެހީތެރިކަން ފާހަގަ ކުރައްވައި، ފޮރިން މިނިސްޓަރ ޝާހިދު އާއި ޑިފެންސް މިނިސްޓަރ މާރިޔާ އަޙުމަދާއި، ޗީފް އޮފް ޑިފެންސް ފޯސް ޝަމާލް ވަނީ، ބަގްލަދޭޝް ސަރުކާރުންގެ އެހީތެރިކަމާއި އެގައުމުގެ އަސްކަރިއްޔާގެ އެހީތެރިކަމަށް ޝުކުރު އަދާކުރައްވާފަ އެވެެ.
