ބިދޭސީންގެ އަސާސީ ޙައްޤުތަކުން މަހުރޫމުކުރާނަމަ ވެރިފަރާތަށް ޤާނޫނީ ފިޔަވަޅު އެޅުމަށް އެޗްއާރްސީއެމުން ގޮވާލައިފި
އެގޮތަށް އަމަލު ނުކުރާ ފަރާތްތައް ޒިންމާދާރު ކުރުވުމަށް ގޮވާލާފައިވޭ
ރާއްޖޭގައި ދިރިއުޅެމުންދާ ގިނަ އަދަދެއްގެ ބިދޭސީންތަކެއް
ރާއްޖޭގައި މަސައްކަތް ކުރުމަށް ގެންނަ ބިދޭސީން އެ ފަރާތްތަކުގެ އަސާސީ ޙައްޤުތަކުން މަޙުރޫމުކުރާނަމަ ވެރިފަރާތާމެދު ޤާނޫނީ ފިޔަވަޅު އެޅުމަށް ހިއުމަން ރައިޓްސް ކޮމިޝަން (އެޗްއާރްސީއެމް) އިން ގޮވާލައިފިއެވެ.
އެޗްއާރްސީއެމްއިން އަންގާރަ ދުވަހު ނެރުނު ބަޔާނެއްގައި ބުނެފައިވަނީ، ކޯވިޑް-19 ގެ ބަލިމަޑުކަމާ ގުޅިގެން ދިވެހިރާއްޖޭގައި މަސައްކަތްކުރާ ބިދޭސީންގެ ޙާލަތު އިތުރަށް ގޯސްވެފައިވާކަން ކޮމިޝަނަށް ފާހަގަވެފައިވާ ކަމަށެވެ. އެގޮތުން އެފަރާތްތަކަށް އެކަށީގެންވާ ބޯހިޔާވަހިކަން ފޯރުކޮށްދީ، ކެއުންބުއިމުގެ ކަންކަން ހަމަޖައްސައިދިނުމާއި ބަލިވެއްޖެނަމަ ބޭސްކޮށް ދިނުންފަދަ އަސާސީ ޟަރޫރަތްތައް ބިދޭސީން ގެންނަ ފަރާތްތަކުން ފުރިހަމަކޮށްދޭންޖެހޭނެ ކަމަށް ބަޔާނުގައި ބުނެފައިވެއެވެ.
އަދި އެގޮތަށް އަމަލު ނުކުރާ ފަރާތްތަކާމެދު ޤާނޫނީ ފިޔަވަޅު އަޅައި، އެ ފަރާތްތައް ޒިންމާދާރު ކުރުވުމަށް އެ ކޮމިޝަނުން ވަނީ ދައުލަތުގެ ކަމާބެހޭ އިދާރާތަކަށް ގޮވާލާފައެވެ. އެގޮތުން ތަފާތު ސަބަބުތަކާހުރެ، ޞައްޙަ ލިޔެކިޔުން ނެތި ދިވެހިރާއްޖޭގައި ދިރިއުޅޭ ބިދޭސީ މަސައްކަތްތެރިންނަށްވެސް މިދަނޑިވަޅުގައި ފޯރުކޮށްދޭންޖެހޭ އިންސާނީ އަދި އަސާސީ ޙައްޤުތައް ކަށަވަރުކުރުމަށްވެސް ކޮމިޝަނުން ގޮވާލާފައިވެއެވެ.
އޭގެ އިތުރުން، ކޮވިޑް-19 އަކީ ވަކި ޤައުމަކަށް ނުވަތަ ވަކި ނަސްލަކަށް ނިސްބަތްވުމުން ޖެހޭ ބައްޔެއް ނޫންކަން ފާހަގަކުރައްވައި ބަޔާނުގައި އިތުރަށް ބުނީ، ކޮވިޑް-19އާ ގުޅޭ ޚަބަރާއި މަޢުލޫމާތު ރައްޔިތުންނާ ހަމަޔަށް ގެނެސް ދިނުމުގައި އިންސާނީ ޤަދަރާއި އިޙްތިރާމް ހިފެހެއްޓެވުމަށް ނޫސްވެރިންނަށްވެސް އިލްތިމާސްކުރާ ކަމަށެވެ.
ކޮވިޑް-19 އާ ގުޅިގެން ވަރަށް ގިނަ ބިދޭސީން ޙާލުގައި ޖެހިފައިވާކަމަށް އެޗްއާރްސީއެމްއިންވެސް ބުނެފައިވާއިރު، ޙާލުގައި ދިރިއުޅެމުންދާ އެފަދަ ފަރާތްތަކުގެ ފޮޓޯތައް މީސްމީޑިއާގައިވެސް ވައިރަލްވެފައިވެއެވެ.
