އަސްކަރިއްޔާގެ އެންމެ ފަހު މީހާގެ ޖެހެންދެންވެސް، ގައުމުގެ ހައްގުގައި ގުރުބާންވާނެ: ރައީސް ސޯލިހު
21 އެޕްރީލު 2020 | އަންގާރަ 12:17މިއީ ރައްޔިތުންނާ ދިވެހި ދައުލަތުގެ ދިފާއީ އައްޑަނަ
ދިވެހި ސިފައިންގެ މަސައްކަތްތައް ފާހަގަކުރައްވައި އުންމީދީ މެސެޖްތަކެއް ދެއްވާފައިވޭ
ދިވެހި އަސްކަރިއްޔާގެ އެންމެ ފަހު މީހާގެ، އެންމެ ފަހު ނޭވާއާ ޖެހެންދެންވެސް، ގައުމާއި، ރައްޔިތުންގެ ހައްގުގައި ގުރުބާންވަނެކަން އަމަލާ ބަހުން ސާބިތުކޮށްދެމުންދާ ކަަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ދިވެހިރާއްޖޭގެ ގައުމީ ދިފާއީ ބާރަށް 128 އަހަރު ފުރުމުގެ މުނާސަބާގައި ރައީސުލްޖުމްހޫރިއްޔާ، އަދި ސިފައިންގެ އެންމެ އިސްވެރިޔާ އިބްރާހިމް މުހައްމަދު ސޯލިހު ދެއްވި ޚިޠާބުގައި ވިދާޅުވީ ދިވެހި ޢަސްކަރިއްޔާއަކީ ދިވެހި ރައްޔިތުންނާ ދިވެހި ދައުލަތުގެ ދިފާއީ އައްޑަނަ ކަމަށެވެ.
ރައީސް ސޯލިހު ވިދާޅުވީ މިއަހަރުގެ ސިފައިންގެ ދުވަސް ފާހަގަކުރަނީ، ހަމައެފަދަ ވަރުގަދަ އަޒުމެއްގައި، ގައުމީ ވަރަށް މުހިންމު މަސައްކަތެއްގައި، ދިވެހި ސިފައިން ޚިދުމަތް ކުރަމުން އަންނަ ދުވަސްވަރެއްގައި ކަމަށެވެ.
މުޅި ދުނިޔެއާއި އަދި ރާއްޖޭގައިވެސް މިހާރު ފެތުރެމުންދާ ކޯވިޑް-19ގެ ނުރައްކަލުން، ދިވެހި ގައުމު ރައްކާތެރިކުރުމަށް ކުރީ ސަފަށް، ދިވެހި ސިފައިން ނުކުމެ ތިބީ، ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދިނުމުގެ ވަރުގަދަ އަޒުމެއްގައި ކަމަށް ރައީސް ސޯލިހު ވިދާޅުވިއެވެ.
މީގެ އިތުރުން ރައީސް ސޯލިހު ވިދާޅުވީ ދިވެހި ސިފައިން އަމަލާއި ބަހުން ސާބިތުކޮށްދެމުން އެ ގެންދަނީ، ސިފައިން މިއަހަރަށް ކަނޑައަޅާފައިވާ، "ސިފައިންގެ ހިތްވަރު – ޤައުމުގެ ސަލާމަތް" މި ޝިއާރުގެ ތެދު ކަމެވެ. އަދި މިކަމުން އެނގިގެން މިދަނީ، ސިފައިންނަކީ އެމީހުންގެ އަމިއްލަ ސަލާމަތާއި ރައްކާތެރިކަމަށް ވުރެ، ރައްޔިތުންގެ ސަލާމަތަށް އިސްކަން ދޭ ބައެއްކަމުގައިކަން އެމަނިކުފާނު ފާހަގަކުރެއްވިއެވެ.
ރައީސް ސޯލިހު ވިދާޅުވީ ރާއްޖެ ރައްކާތެރިކުރުމަށް ކުރާ މަސައްކަތުގަ ސިފައިންގެ ސަފުތަކުން ފެންނަނީ ބަދަހިކަމާއި، ހަރުދަނާކަމާއި، ގާބިލްކަމާއި، ގައުމަށް ޚިދުމަތްކުރުމުގައި އެއްވެސް ވަރުބަލިކަމެއް ނެތި، ސާބިތުވެ ތިބިތަނެވެ. އަދި މިނާޒުކު ދަނޑިވަޅުގައި، ސިފައިންގެ އާއިލާތަކުން ދެމުންދާ އެއްބާރުލުމާއި ގެންގުޅޭ ކެތްތެރިކަން ވެސް ރައީސް ފާހަގަކުރެއްވިއެވެ.
މީގެ އިތުރުން ވެސް ރައީސް ސޯލިހު ވަނީ ފާއިތުވެގެން މިދިޔަ އަހަރަކީވެސް، ރައްޔިތުންގެ ފުރާނައާ މުދާ ސަލާމަތް ކުރުމުގައި އަގުނުކުރެވޭހާ މުހިންމު މަސައްކަތްތަކެއް، ދިވެހި ސިފައިން ކޮށްފައިވާ އަހަރެއްކަން ފާހަގަ ކުރައްވައިފައެވެ. އެގޮތުން މިދިޔަ އަހަރުގެ އަޟްޙާ ޢީދު ބަންދު ތެރޭގައި ރާއްޖެއަށް ކުރި ވިއްސާރައާއި، ހދ. ނޮޅިވަރަންފަރު ލޯންޗު ބަންޑުން ޖަހާލި ހާދިސާއާއި، މާލޭގެ ހިނގި ނުރައްކާތެރި އަލިފާނުގެ ދެ ހާދިސާގައި ދިވެހި ސިފައިން ކޮށްދެއްވި މަސައްކަތް ފާހަގަކުރައްވައި، އެކަންކަމުގައި ބައިވެރިވި ސިފައިންނަށް، އެމަނިކުފާނު އިޚްލާސްތެރިކަމާ އެކު ޝުކުރު އަދާކުރައްވައިފައެވެ.
އެގޮތުން ވޭތުވެދިޔަ އަހަރަކީ، އާންމު ރައްޔިތުންގެ ހިތްތަކުގައި ސިފައިންނާ މެދު އޮންނަ އިތުބާރާ ޔަގީންކަން ބޮޑުވެ، ސިފައިންގެ ގައުމީ ޚިދުމަތް އިތުރަށް ފުޅާކުރެވި، ތަރުތީބު ކުރެވުނު އަހަރެއްކަން ފާހަގަކުރައްވާފައިވެއެވެ. އަދި މިއީ، ވޭތުވެދިޔަ އަހަރުގެ ތެރޭ، ސިފައިންނަށް ލިބުނު އެންމެ ބޮޑު ކާމިޔާބީ ކަމުގައިވެސް އެމަނިކުފާނު ވިދާޅުވިއެވެ.
