ކިޔަވާނުދެވުނު ނަމަވެސް ދަރިވަރުންގެ ގްރޭޑް ރިޕީޓް ނުވާނެ: އާތިޔާ
21 އެޕްރީލު 2020 | އަންގާރަ 06:53އޮޓަމެޓިކް ޕްރޮމޯޝަން އޮންނަތާ ވަރަށް ގިނަ ޒަމާންތަކެއް ވަނީ ވެފައި
އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އައިޝަތު އާތިޔާ ނަސީރު
ކޮވިޑް-19އާ ގުޅިގެން ސްކޫލުތަކުގައި ކިޔަވާ ނުދެވުނު ނަމަވެސް ދަރިވަރުންގެ ގްރޭޑް ރިޕީޓްނުވެ، އަނެއް ގްރޭޑަށް ބަދަލުވާނެ ކަމަށް އެޑިއުކޭޝަން މިނިސްޓްރީގެ ސްޓޭޓް މިނިސްޓަރ އައިޝަތު އާތިޔާ ނަސީރު ވިދާޅުވެއްޖެއެވެ.
ރާއްޖެޓީވީއަށް ދެއްވި ޚާއްސަ އިންޓަވިއުއެއްގައި އާތިޔާ ވިދާޅުވީ ރާއްޖޭގައި އޮޓަމެޓިކް ޕްރޮމޯޝަން ކަމަށް އޮންނަތާ ވަރަށް ގިނަ ޒަމާންތަކެއް ވެފައިވާ ކަމަށާއި، ދަރިވަރުންގެ ގްރޭޑް ރިޕީޓްނުވާނެ ކަމަށެވެ. ގްރޭޑް ބަދަލުވުމަކީ އިމްތިހާންއާ ގުޅިފައި އޮންނަ ކަމެއް ނޫން ކަމަށާއި، އަހަރު ނިމުނިމުމުން ޖެހިގެން އަންނަ ގްރޭޑަށް ބަދަލުވާނެ ކަމަށް އާތިޔާ ވިދާޅުވިއެވެ.
އާތިޔާ ވިދާޅުވީ ގްރޭޑްތައް ރިޕީޓްކޮށްފިނަމަ އެދަރިވަރުންގެ އަހަރެއް ގެއްލޭނެ ކަމަށާއި، ގްރޭޑް ބަދަލުވި ނަމަވެސް އެދަރިވަރުންނަށް މިއަހަރު ގެއްލުނު ބައި ކަވަރު ކުރާނެ ގޮތުގެ ޕްލޭނެއް އެކުލަވާލައި އެގޮތަށް އަމަލުކުރެވޭނެ ކަމަށެވެ.
ކޮވިޑް-19ގެ މިހާލަތުން ސަލާމަތްވުފަހު، އަލުން ސްކޫލު ހުޅުވިގެން އަންނައިރު އަމަލުކުރާނެ ގޮތަށް އަލިއަޅުއްވާލައްވާ އާތިޔާ ވިދާޅުވީ ކުރިން ސްކޫލްތައް ގެންދިޔަ ގޮތަށް ކުރިއަށް ނުގެންދެވޭނެ ކަމަށެވެ.
އެގޮތުން ސްކޫލް ކުދިންގެ ސިޓިޒަންޝިޕަށް އިތުރަށް އަހުލުވެރި ކުރުމާއި ގިނަ ރެގިއުލާ އޮންލައިން ކްލާސްތައް ކުރިއަށް ގެންދަންޖެހޭނެއެވެ. ކަރިކިއުލަމްގައި މިހާރު އޮތް ބައިތަކުގެ އިތުރުން ގިނަ މަސައްކަތްތައް ކުރަންޖެހޭ ކަމަށް އާތިޔާ ވިދާޅުވިއެވެ.
މިއަހަރުގެ އޯލަވަލްއާ ބެހޭ ގޮތުން އާތިޔާ ވިދާޅުވީ އިމްތިހާން ފަސްކުރުމާ މެދު ކޭމްބްރިޖްއާއެކު މަޝްވަރާތައް ކުރަމުންދާ ކަމަށާއި، އެހެން ނަމަވެސް އަދި ގޮތެއް ނުނިމޭ ކަމަށެވެ، މިގޮތުން ވަކި ގޮތެއް ނިންމުމާއެކު އެކަން އިއުލާން ކުރެވޭނެ ކަމަށް އާތިޔާ ވިދާޅުވިއެވެ.
މިހާރު މިއޮތީ އިމްތިހާން ހެދޭނެފަދަ ހާލަތެއް ނޫނެވެ. އެހެން ނަމަވެސް ހުރިހާ ކަމަކަށް ވެސް ޓީޗަރުންނާއި، ދަރިވަރުންގެ އިތުރުން ބެލެނިވެރިން ވެސް ތައްޔާރުވެން ތިބުމަށް އާތިޔާ އިލްތިމާސްކުރެއްވިއެވެ.
