ހައި ރިސްކް ކޮންޓެކްޓެސް ގިނަ ވެއްޖެއްޔާ ގޭގައި ކަރަންޓީން ކުރަން ޖެހިދާނެ: އެޗްޕީއޭ
20 އެޕްރީލު 2020 | ހޯމަ 16:35ހާލަތު ގޯސްވެއްޖެ ނަމަ ގޭގައި ކަރަންޓީން ކުރަން ޖެހިދާނެ
ޑރ އަލީ ލަތީފް
ހައިރިސްކް ކޮންޓެކްޓްސް ގިނަވެއްޖެނަމަ ކަރަންޓީން ފެސިލިޓީ އަކަށް ގެންދިއުމުގެ ބަދަލުގައި ގޭގައި މަޑުކުރަންވެސް ޖެހިދާނެކަމަށް އެޗްޕީއޭއިން ބުނެފިއެވެ.
އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ އަލީ ލަތީފް ވިދާޅުވީ، މިހާރު އަމަލުކުރުމުން ދާ އުސޫލުގައި، ހައި ރިސްކް ކޮންޓެކްސް ގެންދެވެނީ ރިސޯޓުތަކަށް ކަމަށާއި ނަމަވެސް މުސްތަގްބަލުގައި ޕޮޒިޓިވް ކޭސްއެއްގެ ޑައިރެކްޓް ކޮންޓެކްޓްސް ގިނަވެއްޖެނަމަ "ފަހަރުގައި" ގޭގައި ބަހައްޓަންވެސް ޖެހިދާނެކަމަށެވެ.
ޑރ ވިދާޅުވީ، ކޮންޓެކް ވާމީހުން ކަރަންޓީން ފެސިލިޓީތަކަށް ގެންދިއުމުގައި ލަސްތަކެއް އުޅޭކަމަށާއި އެ އިންތިޒާމްތައް ލަސްވާނަމަ ބޭރަށް ނުނިކުމެ ގޭގައި ތިބެން ޖެހިދާނެ ކަމަށެވެ. ގޭގައި ގިނަ ބަޔަކު ތިބޭކަމުގައި ވާނަމަ އަމިއްލައަށް ކޮޓަރީގައި ކަރަންޓީން ވާންޖެހޭކަމަށްވެސް ޑރ ލަތީފް ވަނީ ވިދާޅުވެފައެވެ. އަދި 24 ގަޑީއިރު ވިޔަސް 48 ގަޑިއިރުވިޔަސް އެ މީހަކު ކަރަންޓީން ފެސިލިޓީއަށް ގެންދަން އެޗްޕީއޭއިން އައުމުން މެނުވީ ނުނިކުތުމަށް ޑރ ވަނީ އިލްތިމާސް ކުރައްވާފައެވެ.
އިތުރަށް ވާހަކަ ދައްކަވަމުން ޑރ ލަތީފް ވިދާޅުވީ، ޕޮޒިޓިވް ވެފައިވާ މީހެއް ކަމުގައި ވާނަމަ މި ދަނޑިވަޅުގައި ޙާސްކަން އުފެދޭނެކަން ގަބޫލު ކުރައްވާ ކަމަށާއި ބަލީގެ އެއްވެސް އަލާމާތެއް ހުރިނަމަ ލަސްނުކޮށް އެޗްޕީއޭއަށް އަންގަން ޖެހޭކަމަށެވެ.
މިހާތަނަށް ރާއްޖެއިން 67 ކޭސް ފެނިފައިވާއިރު، ކަރަންޓީނުގައި 1141 ފަރާތެއް އަދި އައިސޮލޭޝަން 115 ފަރާތެއް ވާކަމަށް އެޗްޕީއޭއިން ވަނީ ބުނެފައެވެ. އަދި 945 ކޮންޓެކްޓް ޓްރޭސް ކުރެވިފައިވާ ކަމަށް އެޗްޕީއޭއިން ވަނީ ހާމަކޮށްފައެވެ.
