ފިލިޕީންސްގެ 10 ޑޮކްޓަރަކަށް ކޮރޯނާވައިރަސް ޖެހިގެން މަރުވެއްޖެ

ކޮވިޑް-19 ޖެހިގެން ފިލިޕީންސްގެ 10 ޑޮކްޓަރު މަރުވެފައިވާ ކަމަށް އެ ގައުމުގެ ޑިޕާޓްމެންޓް އޮފް ހެލްތުން ހާމަކޮށްފިއެވެ.

އެ ޑިޕާޓްމެންޓުން ބުނީ، ސިއްހީ ހިދުމަތްތެރިންގެ ތެރެއިން އެންމެ ފަހުން މަރުވެފައިވަނީ، ޔުނިވާސިޓީ އޮފް ސަންޓޯސް ޓޯމަސް އެންޑް މަކާޓީ މެޑިކަލް ސެންޓަރ ގައި މަސައްކަތް ކުރައްވާ ޑރ. ރޮބަޓް އެނަސްޓާސިއޯ ކަމަށެވެ. އޭނާ މަރުވެފައިވަނީ، މި މަހުގެ 10 ވަނަ ދުވަހުއެވެ. މިހާތަނަށް ފިލިޕީންސްގެ 800 ޑޮކްޓަރަކަށް ވަނީ ކޮވިޑް-19 ޖެހިފައެވެ.

އެންމެ ފަހުގެ ތަފާސް ހިސާބުތަކަށް ބަލާއިރު ފާއިތުވި 24 ގަޑިއިރު ތެރޭގައި ފިލިޕީންސްގެ 200 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. އެއާކު އެ ގައުމުގެ 6،459 މީހަަކަށް ވަނީ ބަލި ޖެހިފައެވެ. ފާއިތުވި 24 ގަޑިއިރު ތެރޭގައި 19 މީހަކު މަރުވެ ޖުމްލަ މަރުވި މީހުންގެ އަދަދު ވަނީ 428 އަށް އަރާފައެވެ. އަދި މި ބަލިން 613 މީހަކު ރަނގަޅުވެފައިވާ ކަމަށް އެ ގައުމުގެ ހެލްތް މިނިސްޓްރީން ވަނީ ބުނެފައެވެ.

މާޗް މަހުގެ 16 ވަނަ ދުވަހުން ފެށިގެން ފިލިޕީންސް ވަނީ ލޮކްޑައުން ކޮށްފައެވެ.