އާއިލާއިން ގައިދީންނަށް އޮންލައިންކޮށް ފައިސާ ފޮނުވޭނެ ގޮތް ހަމަޖައްސައިފި
20 އެޕްރީލު 2020 | ހޯމަ 04:09މިއުސޫލަށް ހޯމަ ދުވަހުން ފެށިގެން އަމަލުކުރާނެ
ކޮވިޑް-19 ފެތުރެމުންދާތީ ވީހާ ވެސް ބޮޑަށް އޮންލައިންކޮށް ޚިދުމަތްތައް ހޯދުމަށް ކަމާބެހޭ މުއައްސަސާތަކުން އިލްތިމާސްކުރޭ
މިހާރު ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން ސަރުކާރުން މާލެ ފުރަބަންދު ކުރުމާ ގުޅިގެން އާއިލާތަކުގެ ފަރާތުން ޖަލުތަކުގައި ތިބި ގައިދީންނަށާއި ބަންދުމީހުންނަށް އޮންލައިންކޮށް ފައިސާ ފޮނުވޭނެ އިންތިޒާމް ހަމަޖައްސައިފިއެވެ.
މޯލްޑިވްސް ކަރެކްޝަނަލް ސަރވިސްއިން ބުނީ އެ ސަރވިސްގެ އާންމު އުސޫލު ނަންބަރު (ޤައިދީންނާއި ބަންދުމީހުންނަށް، އޮންލައިންކޮށް ފައިސާ ފޮނުވުމުގައި ޢަމަލުކުރަންވީ ގޮތުގެ އުސޫލު) އަށް ހޯމަ ދުވަހު އަމަލުކުރަން ފަށާނެ ކަމަށެވެ. އަދި އެ ސަރވިސްގެ ވެބްސައިޓްގައި އެ އުސޫލު ވަނީ ޝާއިއުކޮށްފައެވެ.
ކަރެކްޝަންސްއިން ބުނީ އޮންލައިންކޮށް ފައިސާ ފޮނުވޭނެ އިންތިޒާމް ހަމަޖެއްސުމުގެ މަގުސަދަކީ، ކޮވިޑް-19 އާ ގުޅިގެން މިހާރު މިއޮތް ހާލަތުގައިވެސް، ޖަލުގައި ތިބޭ ފަރާތްތަކަށް ކެންޓީނު މެދުވެރިކޮށް ގަންނަން ބޭނުންވާ ތަކެތި ގަތުމަށް، އެ ފަރާތްތަކުގެ އާއިލާއިން ފައިސާ ފޮނުވުމުގެ ކަންތައް މެދުކެނޑުމެއްނެތި ކުރިއަށް ގެންދެވޭނެ އިންތިޒާމް ހަމަޖައްސާފައިވާ ކަމަށެވެ.
ކަރެކްޝަންސްއިން ބުނީ މިއުސޫލުގެ ދަށުން އޮންލައިންކޮށް ފައިސާ ފޮނުވުމަށް ހަމަޖައްސާފައިވާ ބޭންކް އޮފް މޯލްޑިވްސްގެ އެކައުންޓަށް ފައިސާ ޓްރާންސްފަރ ކުރުމަށްފަހު، ފައިސާ ޖަމާކުރި ސްލިޕް ނުވަތަ އޭގެ ސްކްރީންޝޮޓް، ފައިސާ ލިބެންވި ގައިދީ ނުވަތަ ބަންދު މީހާގެ ނަމާއި އެޑްރެސް އަދި އައިޑީ ކާޑް ނަންބަރާއި ފައިސާ ފޮނުވި ފަރާތުގެ ނަމާއި އެޑްރެސް އަދި އައިޑީ ކާޑް ނަންބަރުގެ އިތުރުން ފޮނުވި ފައިސާގެ އަދަދާއި ފައިސާ ޓްރާންސްފަރ ކުރި އެކައުންޓްގެ ނަން ބަޔާންކޮށްonlinetransfer@corrections.gov.mvއަށް އީމެއިލް ކުރަންޖެހޭ ކަމަށެވެ.
ކަރެކްޝަންސްއިން ބުނީ ހުރިހާ މައުލޫމާތާއެކު ފައިސާ ފޮނުވިކަމުގެ އީމެއިލް ފޮނުވުމުން، އެ ފައިސާ ލިބުނުކަން ކަށަވަރުކޮށް ފައިސާ ލިބުނުކަމުގެ ރަސީދު އެފަރާތަކަށް ފޮނުވާނެ ކަމަށެވެ.
