އެއްވެސް ކްލަސްޓަރއެއްގެ ފުރަތަމަ ފެންނަ ކޭސްއަކީ ކޮންމެހެން ކޭސްގެ ފެށުމެއް ނޫން ކަމަށާއި އެއީ ފުރަތަމަ ދެނެގަނެވޭ ކޭސް ކަމަށް ޑރ. ނަޒްލާ ރަފީގް ވިދާޅުވެއްޖެ އެވެ.

އާދިއްތަ ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. ނަޒްލާ ވިދާޅުވީ އެއްވެސް ހާލެއްގައި ވަކި މީހަކީ ބަލި ޖެއްސި މީހާކަމަށް ނުވަތަ، ބަލި ގެނައި މީހާހެން ހީވާ ގޮތަށް އެއްވެސް ވާހަކައެއް ދެއްކުމަކީ ރަނގަޅުކަމެއް ނޫންކަމަށެވެ.

އެންމެ ފުރަތަމަ ފާހަގަކުރެވޭ ފަރާތަކީ އަލާމާތްތައް ހުރެގެން އެންމެ ފުރަތަމަ ޑޮކްޓަރަށް ދެއްކި މީހާކަމަށާއި އެންމެ އަވަހަށް ދެނެގަނެވޭނީ ރަނގަޅަށް އަމަލުކުރި ފަރާތް ކަމަށް ޑރ. ނަޒްލާ ވިދާޅުވި އެވެ. އަދިވެސް އިންޑެކްސް ކޭސް ހޯދުމަށް މަސައްކަތް ކުރަމުންދާ ކަމަށާއި ހޯދުނުހާ އަވަހަކަށް އެމައުލޫމާތު ހިއްސާ ކުރައްވާނެ ކަމަށް ވިދާޅުވި އެވެ.

ޑރ ނަޒްލާ ވިދާޅުވީ، އެބޭފުޅުންނަށް ވެސް ބަލި މީހާގެ މައުލޫމާތު ހާމަކުރެވެނީ އާއްމު ސިއްހަތު ރައްކާތެރިކުރުމުގެ ގާނޫނުގެ ދަށުން ގަވާއިދެއް ހަދައިގެން ކަމަށެވެ. ބަލި މީހުންގެ މައުލޫމާތު ގާނޫނުގެ ދަށުން ހާމަކުރެއްވުމުގެ ބާރު ލިބިވަޑައިގަންނަވަނީ ހަމައެކަނި ޑިރެކްޓަރ ޖެނެރަލް އޮފް ޕަބްލިކް ހެލްތަށެވެ.

ޞިއްޙީ ޚިދުމަތް ދިނުމުގެ ޤާނޫނުގައި ވާގޮތުން ޞިއްޙީ ޚިދުމަތް ލިބިގަންނަ ފަރާތުގެ ޞިއްޙީ ޙާލަތާއި، އޭނާއަށް ދީފައިވާ ނުވަތަ ދެވޭނެ ފަރުވާ އާއި، އެނޫންވެސް އޭނާގެ ޞިއްޙީ ޙާލަތާއި އޭނާ ލިބިގަތް ޚިދުމަތާ ގުޅުންހުރި އެންމެހައި މަޢުލޫމާތަކީ، ސިއްރު އަދި އިމްތިޔާޒު ލިބިފައިވާ މަޢުލޫމާތެވެ.

އެފަދަ ކުށެއް ކޮށްފި މީހެއްގެ އަދަބަކީ ދިހަ ހާސް ރުފިޔާ އާއި އެއްލައްކަ ރުފިޔާއާ ދެމެދުގެ ޢަދަދަކުން ޖޫރިމަނާކުރުމެވެ. އަދި މިކުށް ތަކުރާރު ކޮށްފިނަމަ ޖޫރިމަނާ ކުރުމުގެ އިތުރުން، އެމީހަކު އެއް އަހަރަށްވުރެ ދިގު ނޫން މުއްދަތަކަށް ޖަލަށްލުމުގެ އިޚްތިޔާރު ފަނޑިޔާރަށް ލިބިގެންވާކަމަށް ވެސް ގާނޫނުގައިވެއެވެ.