ޕޮޗެޓީނޯ އަށް ދޭން ޖެހޭ މުސާރަ ކުޑަކުރަން އެދިއްޖެ

މިދިޔަ އަހަރު ޓޮޓެންހަމް ހޮޓްސްޕާގެ ކޯޗުކަމުން ވަކިކުރި މައުރީސިއޯ ޕޮޗެޓީނޯ އަށް ދޭން ޖެހޭ މުސާރަ ކުޑަކުރަން އެ ކްލަބުން އެދިފައިވާ ކަމަށް މީޑިއާ ރިޕޯޓުތައް ބުނެފި އެވެ.

ކޮރޯނާވައިރަސް (ކޮވިޑް-19) ސަބަބުން މާލީ ގޮތުން ޓޮޓެންހަމަށް ވަނީ ވަރަށް ބޮޑު ގޮންޖެހުންތަކަކާ ކުރިމަތިލާން ޖެހިފައެވެ. ފަސް އަހަރަށްފަހު ޓޮޓެންހަމްގެ ކޯޗުކަމުން ޕޮޗެޓީނޯ ވަކިކޮށްފައިވަނީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ. ޓޮޓެންހަމުން އޭނާ ވަކިކުރީ އެހެން ޓީމަކާ އޭނާ ހަވާލުވަންދެން އޭނާގެ މުސާރަ އަށް ވާ ވަކި އަދަދެއް ޓޮޓެންހަމުން ދޭ ގޮތަށް އެއްބަސްވުމަށްފަހު އެވެ. އެގޮތުން ޓޮޓެންހަމުން ޕޮޗެޓީނޯ އަށް މި ސީޒަނަށްވާ 8.5 މިލިއަން ޕައުންޑް ދޭންޖެހޭގޮތަށް ކުރިން އޮތީ އެއްބަސްވެފައެވެ.

އެކަމަކު ކޮވިޑް-19 އާ ގުޅިގެން ޓޮޓެންހަމަށް ލިބޭ މާލީ ގޮންޖެހުންތަކުގެ ސަބަބުން ޕޮޗެޓީނއޯ އަށް ދައްކަންޖެހޭ ފައިސާގެ ވަކި އަދަދެއް މަދުކުރަން އެދިފައިވާ ކަމަށް ރިޕޯޓުތައް ބުނެއެވެ. އަދި ޕޮޗެޓީނޯގެ އެސިސްޓަންޓުންގެ ގޮތުގައި މަސައްކަތްކުރި ކޯޗިން ސްޓާފުންނަށް ދޭން ޖެހޭ މުސާރައިގެ ބައެއް ވެސް މަދުކުރަން މަޝްވަރާކުރަމުން އަންނަ ކަމަށް ރިޕޯޓުތައް ބުނެއެވެ.

ކޮވިޑް-19 އާ ގުޅިގެން ޓޮޓެންހަމަށް މާލީ ގޮންޖެހުންތަކަކާ ކުރިމަތިލާން ޖެހިފައިވާއިރު، އެ ޓީމުން އަލަށް ތަރައްގީ ކުރި ފުޓްބޯޅަ ދަނޑުގެ މަސައްކަތަށް ނަގާފައިވާ އެއް ބިލިއަން ޕައުންޑުގެ ލޯނު އަދި ނުނިމެއެވެ. މި ލޯނުގައި އަދި ބާކީ ނުދައްކާ 637 މިލިއަން ޕައުންޑު އެބަހުރި ކަމަށް ރިޕޯޓުތައް ބުނެއެވެ.

އެހެންކަމުން މި ލޯނުގެ ބާކީބައި ދެއްކުމަށް، އެޓީމުގެ ފޯވާޑް ހެރީ ކޭން 200 މިލިއަން ޔޫރޯ އަށް ވިއްކާލަން ޓޮޓެންހަމުން އޮތީ ތައްޔާރަށް ކަމަށް މީޑިއާތަކުން ވަނީ ރިޕޯޓުކޮށްފައެވެ.

މީގެކުރިން ޓޮޓެންހަމުން ވަނީ މާލީ ގޮންޖެހުންތަކުން އަރައިގަތުމަށް، އެ ކްލަބުގެ 550 މުވައްޒަފުންގެ މުސާރައިން 20 އިންސައްތަ އުނިކުރަން ނިންމާފައެވެ. އަދި މުސާރަ ކުޑަކުރަން އެއްބަސްނުވާ މުވައްޒަފުން ނޯޕޭ ލީވްއަށް ފޮނުވާލުމަށް ވަނީ ނިންމާފައެވެ. އެކަމަކު ޓޮޓެންހަމްގެ މި ނިންމުމަށް އެޓީމުގެ ސަޕޯޓަރުން ފާޑުކިޔުމާ ގުޅިގެން އެ ކްލަބުން ވަނީ އެ ނިންމުން ބަދަލުކޮށްފައެވެ.