ޖަލުތަކުގައި ޙުކުމް ތަންފީޒުކުރަމުންދާ 105 މީހަކަށް ރައީސުލް ޖުމްހޫރިއްޔާ އިބްރާހިމް މުހައްމަދު ސާލިހު އަދަބު ލުއިކޮށްދެއްވައިފިއެވެ.
ހޯމް މިނިސްޓްރީން މިކަމާއި ގުޅިގެން ނެރުނު ބަޔާނެއްގައި ވަނީ ޖަލުތަކުގައި ޙުކުމް ތަންފީޒުކުރަމުންދާ 105 މީހަކަށް ރައިސުލްޖުމްހޫރިއްޔާ އަދަބު ލުއިކޮށްދެއްވުމަށް ނިންމެވީ ކޮވިޑް-19ގެ ބިރު ދިވެހިރާއްޖެއަށް އިންތިހާޔަށް ކުރިމަތިވެފައިވާ މިދަނޑިވަޅުގައި ޖަލުތަކުގައި ބަންދުކޮށްފައި ތިބި ގައިދީންނާއި ބަންދުމީހުންނާއި ދިވެހިރާއްޖޭގެ ޖަލުތައް ބެލެހެއްޓުމާއި ގައިދީންނާއި ބަންދުމީހުންނާ ގުޅުންހުރި ކަންކަމުގައި މަސައްކަތްކުރާ މުވައްޒަފުންގެ ސިއްޙީ ރައްކާތެރިކަމަށްޓަކައި އަޅަމުންދާ ފިޔަވަޅުތަކުގެ ތެރެއިން ކަމަށެވެ.
އެގޮތުން، 105 މީހަކަށް އަދަބު ލުއިކޮށްދެއްވުމުގައި ރިޢާޔަތްކުރައްވާފައިވަނީ މާޢާފުދިނުމާއި އަދަބު ލުއިކޮށްދިނުމުގެ ޤާނޫނުގައި ބަޔާންވެގެންވާހަމަތަކަށާއި، ޙުކުމް ތަންފީޒުކުރަމުންދާ މީހުން ރިހިބިލިޓޭޓްކޮށް އަލުން އަނބުރާ މުޖުތަމަޢަށް ނެރުމަށް މޯލްޑިވްސް ކަރެކްޝަނަލް ސަރވިސްގެ ފަރާތުން ހިންގާ ޕްރޮގްރާމްތަކުގައި ބައިވެރިވެ އެ ޕްރޮގްރާމްތަކުން ނެރެފައިވާ ނަތީޖާއަށްކަމަށް ހޯމް މިނިސްޓްރީން ބުންޏެވެ. އަދި ސިއްޙީ ކުއްލި ނުރައްކަލުގެ މިހާލަތުގައި، އަދަބު ލުއިކޮށްދެވުނު މީހުން ދިރިއުޅެން ހުރިތަންތަނުގެ ޙާލަތަށާއި، އެމީހުންގެފަރާތުން މުޖުތަމަޢަށް ނުރައްކާ އޮތް މިންވަރަށާއި އަދި އެ ފަރާތްތަކުން ކޮށްފައިވާ ކުށުގެ ބާވަތަށާއި ވަށައިގެންވާ އެހެންކަންކަމަށް ވެސް ރިއާޔަތް ކުރެއްވި ކަމަށް މިނިސްޓްރީން ބުންޏެވެ.
ހޯމް މިނިސްޓްރީން ބުނީ ޤައިދީންނާއި ބަންދުމީހުން ހިމެނޭހެން، ޖަލުތަކާ ގުޅުންހުރި އެންމެހާ ފަރާތްތަކުގެ ސިއްޙީރައްކާތެރިކަން ކަށަވަރުކުރުމަށްޓަކައި ޖަލުތަކުގެ އާބާދީ މަދުކޮށް ތޮއްޖެހުން ކުޑަކުރުމަކީ ކޮންމެހެން މުހިންމު ކަމެއްކަމުގައިކަމާ ގުޅުންހުރި ފަންނީ މާހިރުން ލަފާދީފައިވާކަމަށެވެ.
ސަރުކާރުގެ މި ފިޔަވަޅަކީ އަނިޔާކުރުމާއި ދަށު ދަރަޖައިގެލާއިންސާނީ ޢަމަލުތައް ހުއްޓުވުމާ ގުޅޭ އދ. ގެ ސަބްކޮމިޓީ (SPT) އިން، އަނިޔާކުރުމާއި ދަށުދަރަޖައިގެ ލާއިންސާނީޢަމަލުތައް ހުއްޓުވުމާ ގުޅޭ ބައިނަލްއަޤުވާމީ މުޢާހަދާގައި ބައިވެރިވެފައިވާ ގައުމުތަކަށް ކޮވިޑް-19 ގެ ޙާލަތާ ގުޅޭގޮތުންދީފައިވާ ލަފަޔާއި، އިންޓަނޭޝަނަލް ކޮމިޓީ އޮފް ދި ރެޑް ކްރޮސް (ICRC) އިން ދިވެހިރާއްޖޭގެ މިނިސްޓްރީ އޮފްހޯމްއެފެއާޒަށް ކޮވިޑް-19 ގެ ޙާލަތާ ގުޅޭގޮތުން ދީފައިވާ އިރުޝާދުގެ އިތުރުން، މަސްތުވާތަކެއްޗާއި ރާވައިގެން ހިންގާ ބޮޑެތިކުށްތަކާބެހޭ އދގެ އޮފީސް (UNODC) އިން ނެރެފައިވާ ގައިޑްލައިނަށް ރިއާޔަތްކޮށްގެން އެޅި ފިޔަވަޅެއް ކަމަށް ހޯމް މިނިސްޓްރީން ބުންޏެވެ.
ހޯމް މިނިސްޓްރީން ވަނީ މި ދަނޑިވަޅުގައި ކަމާ ގުޅުންހުރި ރަސްމީ އިދާރާތަކުގެ އިރުޝާދަށް ބޯލެނބުމަށާއި އެންމެންގެ ސަލާމަތަށްޓަކައި ސިއްޙީ މާހިރުންގެ އިރުޝާދާއެކު ސަރުކާރުން އަޅަމުންގެންދާ ފިޔަވަޅުތަކަށް ފުރިހަމަޔަށް ތަބަޢަވުމަށް އިލްތިމާސްކޮށްފައެވެ.
ހޯމް މިނިސްޓްރީގެ ނިންމުމާއި ގުޅިގެން ކަރެކްޝަނަލް ސަރވިސް އިން ބުނީ 105 ޤައިދީން، އިއްޔެގެ ނިޔަލަށް މިނިވަންވެފައި ވާތީ އެ ފަރާތްތަށް ގެތަކަށް ގެންގޮސްދީފައިވާކަމަށެވެ.
