އެންމެބޮޑު އިސްކަމެއް މިވަގުތު މިދެނީ ބިދޭސީން ބައިތިއްބަން ތަންތަން ހެދުމުގެ މަސައްކަތަށް: ސުހައިލް

ހައުސިންގ ޑިވެލޮމްމަންޓް ކޯޕަރޭޝަން (އެޗްޑީސީ) މިވަގުތު އެެންމެ އިސްކަމެއް ދީގެން ކުރިއަށް ގެންދަނީ މާލެއާއި ހުޅުމާލޭގައި އުޅޭ ބިދޭސީން ބޭތިއްބުމަށް ހަދަންޖެހޭ ތަންތަން ހެދުމުގެ މަސައްކަތް ކަމަށް އެކުންފުނީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވެއްޖެ އެވެ.

ކޮވިޑް-19 ރާއްޖޭގައި ފެތުރެމުންދާތީ، ރާއްޖެޓީވީ ގެނެސްދޭ ކަވަރޭޖްގައި ވާހަކަ ދައްކަވަމުން ސުހައިލް ވިދާޅުވީ، މާލޭއާއި ހުޅުމާލޭގައި ގިނަ އަދަދެއް ބިދޭސީން އެކިތަންތާނގައި މަސްހުނިވެގެން އުޅެމުންދާތީ، އެމީހުން ބޭތިއްބުމަށް ފެސިލީޓީތަކެއް ހުޅުމާލޭގަ އާއި ގުޅީފަޅުގައި ގާއިމު ކުރަމުންދާ ކަމަށެވެ.

ސުހައިލް ވިދާޅުވީ، މިހާރު ބިދޭސީން ބައިތިއްބަން ހުޅުމާލޭގައި ގާއިމު ކޮށްފައިވާ ތަނުގައި 700 ވަރަކަށް ބިދޭސީންނަށް ތިބެވޭނެ ކަމަށާއި، މާލެ ސަރަހައްދު ކޮލްޑައުން ކުރުމުގެ ކުރިން އެތަންނަށް ބިދޭސީން ބައިތިއްބަމުންދިޔަ ކަމަށެވެ. އަދި މިހާރުވެސް އެތަނުގައި ޖާގަ އެބަހުރިކަމަށެވެ. އަދި އިތުރު 700 ބިދޭސީން ބައިތިއްބުމަށް އިތުރުތަނެއް ހަދަމުންދާ ކަމަށް ސުހަައިލް ވިދާޅުވި އެވެ.

މީގެއިތުރުން ސުހައިލް ވިދާޅުވީ، ހުޅުމާލެ ފޭސް ދޭއްގައި ހުރި ބައެއް ސައިޓްތައް އިތުރަށް މަރާމާތު ކޮށްލައިގެންނާއި އިތުރު ތަންތަން ހެދުމުގެ މަސައްކަތް މިހާރު ފަށާފައިވާ ކަމަށެވެ.

ސުހައިލް ވިދާޅުވީ، ހުޅުމާލޭގައި ގާތްގަނޑަށް 2،000 ބިދޭސީން އަދި ގުޅިފަޅުގައި ގާތްގަނޑަށް 4،000 ބިދޭސީން ބައިތިއްބުމަށް ތަންތަން ހެދެމުންދާއިރު، ޖުމްލަ 6،000 ބިދޭސީން ބައިތިއްބޭނެ ކަމަށް ލަފާ ކުރެވޭ ކަމަށެވެ.

ރާއްޖޭގައި ދެލައްކައެއްހާ ބިދޭސީން އުޅޭއިރު، ގަވާއިދާ ހިލާފަށް ލައްކައެއްހާ ބިދޭސީން އުޅޭކަމަށް ބައެއް ފަރާތްތަކުން ބުނަމުންދެވެ.