ހުކުރު ދުވަހުގެ ހަވީރު ޒަޚަމްތަކާއި އެއްކޮށް މަރަލާފައި އޮއްވާ ފެނިފައިވާ ޅ. ހިންނަވަރަށް އުފަން އިސްމާއިލް އުމަރު (އިއްސެ) ،54، ގެ މަރުގެ މައްސަލައިގައި ތުހުމަތުކުރެވޭ އިތުރު 4 ބިދޭސީއަކު ހައްޔަރުކޮށްފައިވާކަމަށް ފުލުހުން ބުނެފިއެވެ.
މި މީހުން ހައްޔަރުކުރުމާއި އެކު މި މައްސަލައިގައި މިހާތަނަށް ހައްޔަރުކުރި މީހުންގެ އަދަދު ވަނީ ފަހަކަށް އަރާފައެވެ. މި 5 މީހުންނަކީވެސް ބިދޭސީންނެވެ.
މި މައްސަލައިގައި ފުރަތަމަ ހައްޔަރުކޮށްފައިވަނީ އިއްސެއާއިއެކު އިހަވަންދޫ އައިސްޕްލާންޓްގައި މަސައްކަތްކުރަމުންދާ ބަންގާޅު ރައްޔިތެކެވެ.
އިއްސެއަކީ އިހަވަންދޫ އައިސްޕްލާންޓްގައި މެކޭނިނެއްގެ ވަޒީފާ އަދާކުރަމުންދިޔަ މީހެކެވެ. އެ ޕްލާންޓް ބެލެހެއްޓުމާއި ހަވާލުވެގެން ހުންނަނީވެސް އިއްސެއެވެ. މައުލޫމާތު ލިބިފައިވާ ގޮތުގައި އިއްސެގެ ހަށިގަނޑުގައި ތޫނު އެއްޗަކުން ހަމަލާދީފައިވާ ފުން ޒަޚަމްތަކެއް ހުރިއިރު، އޭނާގެ ކަރުގައި އެއްޗެއް އައްސާފައިވާ ކަމުގެ ނިޝާންތައް ހުއްޓެވެ.
މި މައްސަލަ ތަހުގީގު ކުރުމަށް ފުލުހުންގެ ފޮރިންސިކް ދެޓީމެއް މިހާރު އިހަވަންދޫއަށް ގޮސް އައިސްޕްލާންޓު ހުރި އިމާރާތުގައި ހަރަކާތްތެރި ވަމުންދާއިރު، އައިސްޕްލާންޓު ހުންނަ އިމާރާތް ވަށައިގެން ފުލުހުން ވަނީ ބަންދުކޮށްފައެވެ.
