އިސްމާއިލްގެ މަރު: 6 ބިދޭސީންގެ ބަންދަށް 15 ދުވަސް ޖަހައިފި
2 ޖުލައި 2017 | އާދީއްތަ 13:52އިސްމާއިލަކީ އައިސްޕްލާންޓްގައި މެކޭނިކެއްގެ ވަޒީފާ އަދާކުރަމުންދިޔަ މީހެއް
އުމުރުން 54 އަހަރުގެ އިސްމާއީލް
ހއ. އިހަވަންދޫ އައިސްޕްލާންޓް ތެރޭގައި އަނިޔާވެރި ގޮތަކަށް މަރާލާފައި އޮއްވައި ފެނުނު އިސްމާއިލް އުމަރުގެ މަރުގެ މައްސަލާގައި ހައްޔަރުކުރި 6 ބިދޭސީންގެ ބަންދަށް 15 ދުވަސް އިތުރުކޮށްފިއެވެ.
ކުޅުދުއްފުށީ މެޖިސްޓްރޭޓް ކޯޓުން މި 6 މީހުންގެ ބަންދުގެ މުއްދަތު އިތުރުކޮށްދިފައިވަނީ އާދިއްތަ ދުވަހުގައެވެ.
ޖޫން 16 ވަނަ ދުވަހު އަނިޔާވެރިގޮތަކަށް މަރާލާފައި އޮއްވާ ފެނިފައިވަނީ ޅ. ހިންވަރު، އުމުރުން 54 އަހަރުގެ އިސްމާއީލްއެވެ.
އިސްމާއިލަކީ އިހަވަންދޫ އައިސްޕްލާންޓްގައި މެކޭނިކެއްގެ ވަޒީފާ އަދާކުރަމުންދިޔަ މީހެކެވެ. އެ ޕްލާންޓް ބެލެހެއްޓުމާއި ހަވާލުވެގެން ހުންނަނީވެސް އޭނާއެވެ. މައުލޫމާތު ލިބިފައިވާ ގޮތުގައި އިސްމާއިލްގެ ހަށިގަނޑުގައި ތޫނު އެއްޗަކުން ހަމަލާދީފައިވާ ފުން ޒަޚަމްތަކެއް ހުރިއިރު، އޭނާގެ ކަރުގައި އެއްޗެއް އައްސާފައިވާ ކަމުގެ ނިޝާންތައް ހުއްޓެވެ.
މި މައްސަލައިގައި މިހާތަނަށް 6 މީހަކު ހައްޔަރުކޮށްފައިވާއިރު، މައްސަލައިގައި އެންމެ ފުރަތަމަ ހައްޔަރުކޮށްފައިވަނީ އިސްމާއިލާ އެކު އައިސްޕްލާންޓްގައި ހުރި ކޮޓަރިއެއްގައި ދިރިއުޅެމުންދިޔަ ބަންގްލަދޭޝްގެ ރައްޔިތެއްކަމުގައިވާ ޝުމޮން މިއާއެވެ.
އެނާ ހައްޔަރުކޮށްފައިވަނީ ހދ. ކުޅުދުއްފުށިންނެވެ. މި މައްސަލައިގައި ދެން ހައްޔަރުކޮށްފައިވަނީ ޝުމޮން އާއި ގާތް ގުމެއް އޮންނަ އޭނާގެ އެކުވެރި 5 ބިދޭސީއެކެވެ.
