ބިދޭސީންގެ މުސާރަ އެކައުންޓަށް ޖަމާނުކުރުމުން ޖޫރިމަނާކުރުން ފަސްކޮށްފި
16 ޖުލައި 2017 | އާދީއްތަ 03:15ފައިސާ އެކައުންޓަށް ޖަމާ ނުކުރުމުން ޖޫރިމަނާ ކުރުން ފަސްކޮށްފި
ރާއްޖޭގައި މަސައްކަތްކުރާ ބިދޭސީ މުވައްޒަފުންތަކެއް
ބިދޭސީންގެ މުސާރަ އެކައުންޓަށް ޖަމާނުކުރުމުން 10 ހާސް ރުފިޔާ އާއި 50 ހާސް ރުފިޔާއާ ދެެމެދުގެ އަދަދަކުން ޖޫރިމަނާވާގޮތަށް އެކުލަވާލެވިފައިވާ ގަވައިދަށް އަމަލުކުރުން ފަސްކޮށްފި އެވެ.
ކުރިން މި ގަވައިދަށް އަމަލުކުރުން އޮތީ މިމަހުގެ އެއް ވަނަ ދުވަހުން ފެށިގެންނެވެ.
އިކޮނޮމިކް މިނިސްޓްރީން އާންމުކޮށްފައިވާ ގަވައިދުގައި ބަޔާންކޮށްފައިވަނީ، މުސާރައާބެހޭ ކަންކަން ވަޒީފާދޭ ފަރާތުގެ މައްޗަށް ތަންފީޒުކުރުމާބެހޭ ގަވައިދު 2016 ގެ ހަތްވަނަ މާއްދާގެ (ބ) އަށް އިސްލާހު ކޮށްފައިވާ ކަމަށެވެ.
ޖޫރިމަނާ ފައިސާގެ އެއްވެސް އަދަދެއް ސަރުކާރުގެ އެއްވެސް އިދާރާއަކުން ނަގާނީ އަންނަ އަހަރުގެ ޖެނުއަރީ އެއްވަނަ ދުވަހުން ފެށިގެން ކަމަށް ބަޔާނުގައިވެ އެވެ.
މި ގެނެވުނު އިސްލާހުގެ ދަށުން ގަވާއިދަށް އަަމަލުކުރަން ފެށުމަށްފަހު އެއްވެސް ފަރާތެއް ޖޫރިމަނާކޮށްފައިވާނަމަ، އެޖޫރިމަނާއެއް ބާތިލުވާނެ ކަމަށް އިކޮނޮމިކް މިނިސްޓްރީން ބުނެ އެވެ. އެއްވެސް ފަރާތަކުން އެފަދަ ޖޫރިމަނާއެއްގެ ފައިސާ ސަރުކާރުގެ އެއްވެސް އިދާރާއަކަށް ދައްކާފައިވާނަމަ އެ ފައިސާއެއްވެސް އެ އިދާރާއަކަށް އެފަރާތަކުން އަނބުރާ ދޭންވާނެ އެވެ.
މިފަދަ އިސްލާހެއް މި ގަވައިދަށް ގެނެސްފައިވާ އިރު މިއީ މުސާރައާ ބެހޭ ކަންކަން ވަޒީފާދޭ ފަރާތުގެ މައްޗަށް ތަންފީޒުކުރުމާބެހޭ ގަވައިދުގެ ދެ ވަނަ އިސްލާހެވެ.
މި ގަވައިދަށް ފުރަތަމަ އިސްލާހު ގެނެސްފައިވަނީ މިދިޔަ މަރޗު މަހުގެ 26 ވަނަ ދުވަހު އެވެ.
މުސާރައާބެހޭ ކަންކަން ވަޒީފާދޭ ފަރާތުގެ މައްޗަށް ތަންފީޒުކުރުމާބެގޭ ގަަވއިދަށް އަމަލުކުރަން ފަށާފައިވަނީ މިދިޔަ އަހަރުގެ ނޮވެމްބަރު މަހުގެ 24 ވަނަ ދުވަހު އެވެ.
