ސިފައިންގެ މަސައްކަތަށް ޑިފެންސް މިނިސްޓަރުގެ ޝުކުރު
ކޮންމެ ކަމެއްގައި ވެސް ސިފައިން އެންމެ އިސް ސަފުގައި ހަރަކާތްތެރިވާނެ
ސިފައިން އާންމުންނަށް ތަކެތި ޑެލިވަރީ ކުރުމަށް ހަރަކާތްތެރިވަނީ
ކޮވިޑް-19 މި ހާލަތުގައި ސިފައިން ކުރަމުންގެންދާ ބުރަ މަސައްކަތް ފާހަގަކުރައްވާ އެކަމަށް ޑިފެންސް މިނިސްޓަރު މާރިޔާ އަހްމަދު ދީދީ ޝުކުރު އަދާކުރައްވައިފިއެވެ.
ރާއްޖެޓީވީ އިން ކޮވިޑް-19 އާ ގުޅޭ ގޮތުން ކުރިއަށް ގެންދާ ހާއްސަ ލައިވް ކަވަރޭޖަށް ދެއްވި ފޯން އިންޓަވިއުއެއްގައި ޑިފެންސް މިނިސްޓަރު ވިދާޅުވީ ފެސިލިޓީތަކުގައި ވެސް ސިފައިން މަސައްކަތް ކުރަމުންދާ ކަމަށާއި ކޮވިޑް ވިލެޖް ނިންމުމަށްޓަކައި ވެސް 24 ގަޑިއިރު ކަހަލަ ގޮތަކަށް އަވަދިނެތި ސިފައިން މަސައްކަތް ކުރަމުންދާ ކަމަށެވެ.
ޑިފެންސް މިނިސްޓަރުގެ މަޤާމުގައި މިއަދު ހުންނެވި ނަމަވެސް ދިވެހި ރައްޔިތެއްގެ ހަސިއްޔަތު ސިފައިން ކުރަމުން ގެންދާ މަސައްކަތްތަކަށް ޝުކުރުވެރި ވެވަޑައިގަންނަވާ ކަމަށް މާރިޔާ ވިދާޅުވިއެވެ.
ކޮންމެ ހާލަތެއް ނުވަތަ ކާރިސާއެއް ކުރިމަތިވިޔަސް ސިފައިން އަބަދުވެސް އޮންނަނީ ތައްޔާރަކޮށް ކަމަށާއި ކޮންމެ ކަމެއްގައި ވެސް ސިފައިން އެންމެ އިސް ސަފުގައި ހަރަކާތްތެރިވާނެ ކަމަށް މިނިސްޓަރު ވިދާޅުވިއެވެ. އެގޮތުން މިހާރު ވެސް ރައްޔިތުންނަށް ހިދުމަތް ދިނުމަށްޓަކައި އެސްޓީއޯގެ ޑެލިވަރީ ހިދުމަތުގައި އަދި ރައްޔިތުންނަށް ފެން ފޯރުކޮށްދިނުމަށްޓަކައި ސިފައިން ހަރަކާތްތެރިވާ ކަމަށް މާރިޔާ ވިދާޅުވިއެވެ.
ސިފައިންގެ މަސައްކަތްތަކަށް ޝުކުރު އަދާކުރައްވާ މާރިޔާ ވާހަކަފުޅު ދައްކަވާފައިވާއިރު ސޯޝަލް މީޑިއާގެ އެކި ޕްލެޓްފޯމްތަކުގައި ގިނަ އަދަދެއްގެ އާންމުން ރައްޔިތުން ވެސް ދަނީ ސިފައިން ކުރަމުންދާ ބުރަ މަސައްކަތް ފާހަގަކޮށް، އެކަމަށް ހިތުގެ އެންމެ ފުންމިނުން ޝުކުރު އަދާކުރަމުންނެވެ.
ސިފައިންގެ ރައްކާތެރިކަމަށްޓަކައި ގިނަ ފިޔަވަޅުތައް އަޅާފައިވާކަން ފާހަގަކުރައްވާ ޑިފެންސް މިނިސްޓަރު ވިދާޅުވީ ސިފައިންގެ ތެރޭގައި އަދި ފްރަންޓް ލައިންގައި ސިފައިން ހަރަކާތްތެރިވަމުންދާއިރު ރައްކާތެރިކަމުގެ ފިޔަވަޅުތައް ކަނޑައަޅާ އުސޫލުތައް ޤާއިމުކޮށްފައިވާ ކަމަށެވެ. އަދި އެ އުސޫލުގެ ދަށުން ކަންތައްތައް ކުރިއަށްދާ ކަމަށް ވެސް ވިދާޅުވިއެވެ.
މި ހާލަތުގައި ފުރަންޓް ލައިންގައި މަސައްކަތް ކުރާ ސިފައިން އުޅޭނީ އާއިލާއާ ވަކިންކަން ފާހަގަކުރައްވާ މާރިޔާ ވިދާޅުވީ އެ ސިފައިން އާއިލާ ކައިރިއަށްދަނީ ކަރަންޓީންގެ މުއްދަތު ހަމަކުރުމަށްފަހު ކަމަށެވެ.
އާއިލާއާ ދުރުގައި ގިނަ ސިފައިންތަކެއް ބޮޑު ގުރުބާނީއެއްވާކަމަށް މިނިސްޓަރު ވިދާޅުވިއެވެ. އަދި އެކަމަނާ ވަނީ ޖުމްލަ ގޮތެއްގައި ހުރިހާ ސިފައިންގެ މަސައްކަތް ފާހަގަކޮށް ޝުކުރު އަދާކުރައްވާފައެވެ.
