ލޮކްޑައުން މުއްދަތުގައި "ޑެމަރޭޖް" އެއް ނުނަގާނެ: އެމްޕީއެލް
ހޮނިހިރު ދުވަހުން ފެށިގެން ހެނދުނު 8:30 ން 16:00 ށް ޚިދުމަތްދޭނެ
މޯލްޑިވްސް ޕޯޓްސް ލިމިޓެޑް ވިޔަފާރި ބަނދަރު
މާލެ އިން ކޮވިޑް-19 ފެނުމާއި ގުޅިގެން ލޮކްޑައުން ކޮށްފައިވާއިރު އެ މުއްދަތުގައި މުދާ ނެރުން ލަސްވުމުން އަރާ "ޑެމަރޭޖް" ނުނަގަން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ނިންމައިފިއެވެ.
ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ހުކުރު ދުވަހު އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ މިހާރު އެތެރެކުރެވިފައިވާ ކޮންޓެއިނަރތަކަށް ޑެމަރޭޖް ނުނަގާނެ ކަމަށެވެ.
ޝާހިދު ވިދާޅުވީ ލޮކްޑައުންގެ މުއްދަތު ނިމުމުން މުދާތައް ގެންދެވޭނެ ކަމަށެވެ.
މީގެއިތުރުން، ހޮނިހިރު ދުވަހުން ފެށިގެން މުދާ ދޫކުރެވޭނެ ކަމަށާއި އިސްކަންދޭނީ ކާބޯތަކެއްޗާއި ބޭހުގެ ބާވަތްތަކަށް ކަމަށް ޝާހިދު ވިދާޅުވިއެވެ. އަދި ކާބޯތަކެތި ނޫނަސް މުހިއްމު ތަކެއްޗަށް އިސްކަމެއް ދެއްވާނެ ކަމަށް ވެސް ވިދާޅުވިއެވެ.
ޝާހިދު ވިދާޅުވީ މުދާ އެތެރެކުރާ ފަރާތްތަކާއި އެކު، ވަރަށް ގާތުން މަސައްކަތް ކުރައްވާނެ ކަމަށެވެ.
އެމްޕީއެލް އިން ބުނީ ހޮނިހިރު ދުވަހުން ފެށިގެން ހެނދުނު 8:30 ން 16:00 ށް ޚިދުމަތްދޭނެ ކަމަށެވެ.
