ކުށްވެރިންނަށް ދަނޑިވަޅުގެ ނާޖާއިޒު ފައިދާ ނެގުމަށް ޖާގައެއް ނުދޭނަން: ޕީޖީ
ކުށްވެރިންގެ މައްސަލަތައް ބަރާބަރަށް ފުލުހުން ތަހުގީގު ކުރާނެ
ޕީޖީ ހުސައިން ޝަމީމު
ކޮވިޑް-19 ރާއްޖޭގައި ފެތުރެން ފެށުމާއެކު މުޅި ރާއްޖެ ލޮކްޑައުން ކޮށްފައިވާއިރު، ކުށްވެރިންނަށް މި ދަނޑިވަޅުގެ ނާޖާއިޒު ފައިދާ ނެގުމަށް ޖާގަ ނުދެއްވާނެ ކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމު ވިދާޅުވެއްޖެ އެވެ.
ރާއްޖެޓީވީ ގެނެސްދޭ ކޮވިޑް-19 ކަވަރޭޖްގައި ފޯނުން މައުލޫމާތުދެއްވަމުން ޕީޖީ ޝަމީމު ވިދާޅުވީ، ޖިނާއީ މައްސަލަތަކުގައި ފުލުހުން ބަންދުކޮށްލައިވާ މީހުންގެ މައްސަލަތަކާއި އަދި ކުށުގެ ތުހުމަތު ކުރެވޭ މީހުންގެ މައްސަލަތައް ބަރާބަރަށް ފުލުހުން ތަހުގީގު ކުރައްވަމުން ގެންދަވާނެ ކަމަށެވެ.
މީގެއިތުރުން ޝަމީމު ވިދާޅުވީ، މިހާލަތުގައި ޝަރީއަތްތައް ހިންގުމާބެހޭ ގަވާއިދެއް ސުޕްރީމް ކޯޓުން އެކުލަވާލައި އާންމުކޮށްފައިވާކަމަށެވެ. އަދި ޕީޖީ އޮފީހުންވެސް އަމަލު ކުރާނީ އެ ސުޕްރީމް ކޯޓުން އާންމުކޮށްފައިވާ އުސޫލާ އެއްގޮތަށް ކަމަށްވެސް ޝަމީމު ވިދާޅުވި އެވެ.
ރާއްޖެ ލޮކްޑައުންގެ މިހާލަތުގައި ޝަމީމު ވެސް ވަނީ، ނޭޝަނަލް އެމަޖެންސީ އޮޕަރޭޝަން ސެންޓަރުން އަންގާ އެންގުންތަކަށް ހުރިހާ ދިވެހި ރައްޔިތުންވެސް ކަމޭހިތައި އަމަލު ކުރުމަށް އިލްތިމާސްކުރައްވާފަ އެވެ.
ކަސްރަތު ކުރުމަށް ލޯބި ކުރައްވާ، އަދި ކަސްރަތު ކުރައްވައިގެން ހަށިގަނޑަށް ބޮޑު ބަލެއް ގެނެސްފައިވާ ޝަމީމު ވިދާޅުވީ، އަބަދު މަސައްކަތުގައިި އުޅޭ މީހުންނަށް ކުއްލިއަކަށް ގޭގައި ތިބެންޖެހުން އުނދަގޫވެ ނުތަނަވަސްކަން ވެރިވުމަކީ އެކަށީގެންވާ ކަމެއް ކަަމަށާއި، އެހެންކަމުން ހެލިފެލިވެ އުޅުމަށް ގޭގައި ކުރެވޭ ކަހަލަ ކަސްރަތުތައް ކުރުމަށް އެދިވަޑައިގަންނަވާ ކަމަށެވެ.
ޝަމީމަކީ މިހާރުވެސް، ކަސްރަތާއި ދުވުމާއި ފެތުމުގައި ފާހަގަކޮށްލެވޭ ބޭފުޅެކެވެ. ޝަމީމަކީ ހެނދުނު ތެދުވެ، ގަވާއިދުން ދުވަން ނިކުންނަވާ ބޭފުޅެކެވެ. ނަމަވެސް މިދުވަސްވަރު ޝަމީމުވެސް ކަސްރަތު ކުރައްވަނީ ގޭގަ އެވެ. އެހެންކަމުން ޝަމީމު ވަނީ ހުރިހާ ފަރާތްތަކުންވެސް ގޭގައި ތިއްބަވައިގެން ކަސްރަތު ކުރެއްވުމަށް އެދިލައްވާފަ އެވެ.
ޝަމީމު ވިދާޅުވީ، ކަޝްރަތާ ގުޅޭ ވަރަށް ގިނަ ވީޑިއޯ ޔޫޓިއުބާއި، ޗެނަލްތަކުންވެސް ދައްކަމުންދާ ކަމަށާއި ގޭގައި ކުރެވޭނެ ކަސްރަތުތައް ވެސް ގިނަ އަދަދަކަށް ޔޫޓިއުބު ޗެނަލްތަކުންވެސް ލިބެން އެބަހުރި ކަމަށެވެ.
ޝަމީމު ވިދާޅުވީ، ގޭގައި ހުންނައިރު ކޮންމެ ދުވަހަކުވެސް ކުރާނެ ކަންތައްތަކެއް ރާވާލައި ތާވަލެއް ހަދައިގެން، އެ ތާވަލަށް އަމަލުކުރުމަކީވެސް ރަނގަޅު ކަމެއް ކަމަށެވެ.
