މިދުވަސްވަރު މާލެސިޓީ ޖަލަށް އަލަށް ގެންނަ ގައިދީން 14 ދުވަހަށް އެކަހެރިކުރާނެ: ކޮމިޝަނަރ އޮފް ޕްރިޒަންސް
17 އެޕްރީލު 2020 | ހުކުރު 06:47ޖަލުތަކުގެ އާންމު ހާލަތު ރަނގަޅު
ކޮމިޝަނަރ އޮފް ޕްރިޒަންސް ބައެއް އޮފިސަރުންނާއި ބައްދަލުކުރައްވަނީ
މާލެސިޓީން ކޮވިޑް-19އަށް ޕޮޒިޓިވްވި މީހުންތަކެއްގެ ފެނިފައިވާ މިދަނޑިވަޅުގައި މާލެސިޓީގެ ޖަލުތަކަށް ބަންދަށް ގެންނެވޭ ނުވަތަ ގައިދީން ބައިތިއްބާނީ ވަކި ގޮޅިތަކެއްގައި ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.
ރާއްޖެޓީވީގެ ކޮވިޑް-19އަށް ކަވަރޭޖްއަށް ދެއްވި ޚާއްޞަ އިންޓަވިއުއެއްގައި ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވީ ކޮވިޑް-19އާ ގުޅިގެން މޯލްޑިވްސް ކަރެކްޝަންސް ސަރވިސްއިން ރައްކާތެރިވުމުގެ ގޮތުން ފިޔަވަޅުތަކެއް އަޅަމުންދާ ކަމަށާއި، ޖަލުތަކުގެ ޢާންމު ޙާލަތު ރަނގަޅު ކަމަށެވެ. އަދި ވިދާޅުވީ މާލެ ޖަލާއި، ހުޅުމާލެ ޖަލު ވެސް ރެޑް އެލަރޓް ލެވަލްއަށް ގެނެސްފައިވާ ކަމަށެވެ.
އެގޮތުން ލޮކްޑައުންގެ ޙާލަތަށް މާލެ ދިއުމާއެކު ޖަލުގައި ތިބި މުއައްޒަފުން ޖަލުގައި ތިބޭ ގޮތަށް ހުރިހާ އިންތިޒާމުތައް ހަމަޖައްސާފައިވާ ކަމަށާއި، ކޮންމެހެން ނުކުންނަން މަޖުބޫރީ ޙާލަތެއްގައި އިންތިޒާމުތައް ހަމަޖެހިގެންދާނެ ކަމަށް މުހައްމަދުފުޅު ވިދާޅުވިއެވެ.
މުހައްމަދުފުޅު ވިދާޅުވީ ޤައިދީންނާއި މުވައްޒަފުންނަށް ބޭނުންވާ ތަކެތި ޖަލުތަކަށް ފޯރުކޮށްދެމުންދާ ކަމަށެވެ. އެކަށީގެންވާ މިންވަރަށް މާސްކް، ސާފުކުރުމަށް ބޭނުންވާ ސާމާނު ފަދަ ތަކެތި ހުރިކަން މުހައްމަދުފުޅު ފާހަގަކުރެއްވިއެވެ. އަދި ވިދާޅުވީ ޖަލުތަކުގައި ތިބި ޤައިދީންގެ ޗެކަޕް ކުރުމުގެ މަސައްކަތްތައް ކުރިއަށްދާ ކަމަށެވެ.
ކޮވިޑް-19އާ ގުޅިގެން އެޗްޕީއޭ އާއި ނޭޝަނަލް އެމެޖެންސީ ސެންޓަރުގެ ލަފައާ އިރުޝާދުގެ ދަށުން ޖަލުތަކުގައި އަމަލުކުރާނެ ޚާއްސަ ޕްލޭނެއް އެކުލަވާލާފައިވާކަން ފާހަގަކުރައްވައި މުހައްމަދުފުޅު ވިދާޅުވީ އެއްވެސް މީހެއްގެ ފަރާތުން އެފަދަ އެއްވެސް އަލާމާތެއް ފެނިއްޖެނަމަ ވަގުތުން އައިސޮލޭޝަންގައި ބަހައްޓަމުންދާ ކަމަށެވެ.
މުހައްމަދުފުޅު ވިދާޅުވީ އަލަށް ޖަލަށް ގެނެވޭ ބަންދުގައި ތިބޭ މީހުންނާއި، ޤައިދީން ފުރަތަމަ 14 ދުވަސް ބައިތިއްބަނީ ވަކި ގޮޅިތަކެއްގައި ކަމަށާއި، އެހެން ޤައިދީން ތިބޭ ގޮޅިތަކަށް ނުލާ ކަމަށެވެ. އަދި މި14 ދުވަސް ތެރޭގައި އެމީހުންގެ ގައިން އެއްވެސް އަލާމާތެއް ފެނޭތޯ ކަށަވަރުކުމުގެ މަސައްކަތްތައް ކުރިއަށް ގެންދާނެ ކަމަށް މުހައްމަދުފުޅު ވިދާޅުވިއެވެ.
ޢާއިލީ ބައްދަލުވުންތައް މެދުކަނޑާލާފައިވާތީ އެކަމަށް އަލިއަޅުއްވާލައްވާ މުހައްމަދުފުޅު ވިދާޅުވީ ކޮންމެ ޤައިދީއަކަށް ހަފުތާއަކު އެއްފަހަރު 07 މިނެޓްގެ ފޯނު ކޯލެއް ކުރުމުގެ ފުރުޞަތު ދެމުން ގެންދާ ކަމަށެވެ. އަދި ވީޑިއޯ ކޮންފަރެންސްގެ އިންތިޒާމު ހަމަޖައްސާފައިވާ ކަމަށްވެސް މުހައްމަދުފުޅު ވިދާޅުވިއެވެ.
ޝަރީޢަތްތައް ވީޑިއޯ ކޮންފަރެންސް މެދުވެރިކޮށް ކުރިއަށް ގެންދަން ކޯޓުތަކުން ނިންމާފައިވާ ނިންމުމާ ބެހޭ ގޮތުން މުހައްމަދުފުޅު ވިދާޅުވީ ޝަރީޢައަތްތައް ކުރިއަށް ގެންދިއުމަށް ކޯޓުން ވަކި ގޮތަކަށް ޢަމަލުކުރާކަށް އަންގާފައި ނެތް ކަމަށެވެ. ނަމަވެސް ކޯޓުން ވަކި ގޮތަކަށް ޢަމަލުކުރުމަށް އަންގައިފި ކަމަށްވާނަމަ އެގޮތަށް ޢަމަލުކުރެވޭ ވަރަށް އިންތިޒާމުތައް ހަމަޖެހިފައިވާކަން މުހައްމަދުފުޅު ވިދާޅުވިއެވެ.
