ބޮޑުންގެ އާއިލީ ބޭފުޅުން ކަރަންޓީން ނުކުރާކަމަށް ބުނެ ފަތުރަނީ ދޮގު ވާހަކައެއް: އަލީ ޒާހިރު
ރާއްޖެ އަންނަ ހުރިހާ އެންމެން ކަރަންޓީނު ކުރާ ގޮތަށް ސަރުކާރުން ނިންމީ މަރޗް މަހުގެ 21 ވަނަ ދުވަހު
އަލީ ޒާހިރު - ރައީސް އޮފީހުގެ ޗީފް އޮފް ސްޓާފް
ސަރުކާރުގެ އިސް ބައެއް ފަރާތްތަކުގެ ޢާއިލާގެ ބޭފުޅުންނާއި އިސްފަރާތްތަކާއި ގުޅިފައިވާ ބައެއް މީހުން ރާއްޖެއިން ބޭރުން ގެނެސް ކަރަންޓީން ނުކޮށް މާލެ ތެރެއަށް ދޫކޮށްލިކަމަށް ބުނެ ދައްކަމުންދާ ވާހަކައަކީ ދޮގެއްކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެ އެވެ.
މާލޭގައި ދިރިއުޅޭ މީހެއް ކޮވިޑް-19 އަށް ޕޮޒިޓިވްވުމާއި ގުޅިގެން އަދި އެމީހާއަކީ ޓްރެވަލް ހިސްޓްރީއެއް ނެތް މީހެއްކަމަށް ހެލްތު ޕްރޮޓެކްޝަން އެޖެންސީން ހާމަކުރުމާއި ގުޅިގެން ސަރުކާރުގެ އިސް ބޭފުޅުންގެ ޢާއިލާތަކުގެ ބޭފުޅުން ރާއްޖެ އައުމަށްފަހު ކަރަންޓީނު ފެސިލިޓީތަކަށް ގެންގޮސްފައިނުވާކަމަށް ބުނެ ސޯޝަލް މީޑިޔާގައި އަންނަނީ ވާހަކަ ދައްކަމުންނެވެ. އަދި މާލެ ތެރެއިން ވައިރަސް ފެންނަން ދިމާވި ސަބަބަކީ އެމީހުން މާލެތެރެއަށް ދޫކޮށްލުން ކަމަށް ބުނެ އަންނަނީ ވާހަކަތައް ދައްކަމުންނެވެ. ރާއްޖެއިން ބޭރުގައި ތިބި މީހުންގެ ތެރެއިން ރާއްޖެ އަންނަ ހުރިހާ އެންމެން ކަރަންޓީނު ކުރާ ގޮތަށް ސަރުކާރުން ނިންމީ މަރޗް މަހުގެ 21 ވަނަ ދުވަހުން ފެށިގެންނެވެ.
މިވާހަކަތާއި ގުޅިގެން އަލީ ޒާހިރު ކުރެއްވި ޓްވީޓެއްގައި ވިދާޅުވެފައިވަނީ ކޮވިޑް-19 އާއި ގުޅިގެން އަޅަމުންދާ ފިޔަވަޅުތަކާއި ގުޅިގެން މާލޭގެ ބޮޑުންނާއި ސަރުކާރު މަތީ މީހުންގެ ޢާއިލާތައް މާލެ ތެރެއަށް ދޫކޮށްލާފައިވާ ކަމަށް ބުނެ ފަތުރަމުންދަނީ ދޮގުވާހަކަ އެއްކަމަށެވެ. އަދި އެފަދަ އެންމެ މީހެއްގެ މަޢުލޫމާތު ނަމަވެސް ހިއްސާކުރުމަށާއި އެފަދަ އެއްވެސް މީހެއްގެ މަޢުލޫމާތެއް ނުދެވޭނެކަމަށް އަލީ ޒާހިރު ވަނީ ވިދާޅުވެފައެވެ.
މިހާރުވެސް ކަރަންޓީނު ފެސިލިޓީތަކުގައި 983 މީހުން އެބަތިއްބެވެ. ރާއްޖޭގައި މިހާތަނަށް އާއިރު 25 މީހަކަށް ވައިރަސް ޖެހިފައިވާއިރު މީގެތެރެއިން 5 މީހުންނަކީ މާލޭގައި ދިރިއުޅެމުން އަންނަ މީހުންނެވެ.
