ސިފައިންގެ އާއިލީ ހަވީރު ބާއްވައިފި
12 މެއި 2017 | ހުކުރު 22:39މި ހަވީރަށް އާންމުންގެ ބޮޑު ތަރުޙީބެއް ލިބުނު ކަމަށް އެމްއެންޑީއެފުން މަޢުލޫމާތު ދޭ
ސިފައިންގެ އާއިލީ ހަވީރުގެ ތެރެއިން
ސިފައިންގެ 125 ވަނަ އަހަރީ ދުވަސް ފާހަގަކުރުމުގެ ގޮތުން ޢާންމުކޮށް ހުޅުވާލައިގެން ޢާއިލީ ހަވީރެއް ބާއްވައިފިއެވެ.
"އައިލެންޑް ލައިފް" ތީމަށް ރަސްފަންނު ބީޗްގައި ބޭއްވި މި ހަވީރަށް އާންމުންގެ ބޮޑު ތަރުޙީބެއް ލިބުނު ކަމަށް އެމްއެންޑީއެފުން މަޢުލޫމާތު ދެއްވައެވެ.
އެމްއެންޑީއެފްގެ 125 ވަނަ އަހަރީ ދުވަސް ފާހަގަކުރެއްވުމުގެ ގޮތުން ބޭއްވި އާއިލީ ހަވީރަކީ، ސިފައިންގެ މަސައްކަތްތައް ޢާންމުކޮށް ދައްކާލުމާ އެކު އާއިލާތަކަށް އުފާވެރި މާހައުލެއް ފަހިކޮށްދެއްވުމުގެ ގޮތުން ބޭއްވި ހަވީރެއް ކަމަށް އެމްއެންޑީއެފުން ބުންޏެވެ.
އިހުޒަމާނުގައި ދިވެހިންގެ ދިރިއުޅުމާއި އާދަކާދަ ދައްކުވައިދޭ ތަފާތު ހަރަކާތްތައް މިހަވީރުގައި ވަނީ ދައްކާލާފައެވެ.
މި އާއިލީ ހަވީރު ޝަރަފުވެރިކޮށްދެއްވީ ނިޝާން އިއްޒުދީން އިއްޒަތުގެ ވެރިޔާ އަބްދުއް ރަޝީދު ހުސެއިންއެވެ. މި ހަވީރުގައި ޗީފް އޮފް ޑިފެންސް ފޯސް އަޙުމަދު ޝިޔާމާއި، ވައިސް ޗީފް އޮފް ޑިފެންސް ފޯސްއާއި ސިފައިންގެ އިސްވެރިން ބައިވެރިވެވަޑައިގެންނެވިއެވެ.
ސިފައިންގެ އެކި ޑިޕާޓްމަންޓުތަކުން ބައިވެރިވި މި ހަވީރުގައި އައިލެންޑް ލައިފް ތީމާ ގުޅޭ ގޮތަށް އިހުޒަމާނުގައި ދިވެހިންގެ ދިރިއުޅުން ވަރަށް ބޮޑަށް ދައްކުވައިދީފައިވާނެ ކަމަށް އެމްއެންޑީއެފުން ބުންޏެވެ.
މި ހަވީރަށް ގިނަ ބަޔަކު ޒިޔާރަތްކޮށް، އެކި ކުޅިވަރުތަކުގައި ވަނީ ބައިވެރިވެފައެވެ.
