ދުވަސްވީ ބޭފުޅުންގެ ވެރިކަން ރާއްޖެއަށް ބޭނުމެއް ނޫން: ރައީސް ޔާމީން
ރައީސް މައުމޫނުގެ ވެރިކަމުގައި ގެންނެވި ތަރައްޤީ މިއަދުވެސް ދިވެހި ޤައުމުން ފެނިގެންދޭ
ރައީސް މައުނޫނާއި ރައީސް އަބްދުﷲ ޔާމީން ސަލަމްކުރައްވަނީ
ރާއްޖެއަށް ދުވަސްވީ ބޭފުޅުން ވެރިކަން ކުރެއްވުމަށް ބޭނުން ނުވާކަމަށް ރައީސް ޔާމީން ވިދާޅު ވެއްޖެއެވެ. ރައީސް މިހެން ވިދާޅުވީ، އަންގާރަ ދުވަހުގެ ރޭ ދަރުބާރުގޭގައި ޕީޕީއެމްއަށް އަލަށް ގުޅުނު ފަރާތްތަކުގެ ފޯމު ހަވާލު ކުރުމަށް ބޭއްވި ހަފްލާއެއްގައި ވާހަކަފުޅު ދައްކަވަމުންނެވެ.
ރައީސް ޔާމީން ދުވަސްވީ ބޭފުޅުންގެ ވެރިކަން ރާއްޖެއަށް ބޭނުން ނުވާކަމަށް ވިދާޅުވި ވާހަކަފުޅަށް އިތުރަށް ބާރު ލައްވަމުން ވިދާޅުވީ، ދުވަސްވީ ބޭފުޅުން ޒުވާނުންނަށް ފުރުސަތުދޭންޖެހޭކަމަށް ދެކެވަޑައިގަންނަވާ ކަމަށެވެ.
އެ މޭރުމުން ވާހަކަދައްކަވަމުން ރައީސް ޔާމީން ވިދާޅުވީ، ވަކި އުމުރެއްގެ ބޭފުޅުންތަކަކަށް ވެރިކަމަށް ވަޑައިނުގެންނެވޭ ގޮތަށް ޤާނޫނު އަސާސީއަށް ބަދަލުގެނައީ، އުމުރުން ދުވަސްވީ ބޭފުޅުން ވެރިކަން ކުރެއްވުމުގެ ބަދަލުގައި ޒުވާނުންނަށް ފުރުސަތު ދިނުމުގެ ގޮތުން ކަމަށެވެ. އަދި ވިދާޅުވީ ވަކި ބޭފުޅެއްގެ ވެރިކަން ދިގުލައިގެންދިއުމަށް ރައްޔިތުން ނެދޭ ކަމަށެވެ.
ރައީސް ޔާމީންގެ މި ވާހަކަފުޅު އަމާޒު ކުރެއްވީ، އެމަނިކުފާނުގެ އެއްބަފާ ބޭބޭފުޅު އަދި ކުރީގެ ރައީސް މައުމޫނު އަބްދުލް ގައްޔޫމަށް އިޝާރާތް ކުރައްވާ ކަމަށް ގަބޫލު ކުރެވެއެވެ.
އުމުރުން ދުވަސްވީ ބޭފުޅުންގެ ވެރިކަމަށް ރާއްޖެ ނޭދޭ ކަމަށް ވިދާޅުވެ، ވާހަކަ ފުޅު ދައްކަވަމުން ރައީސް ޔާމީން ވިދާޅުވީ، ކުރީގެ ރައީސް މައުމޫނު އަބްދުއްޤައްޔޫމަކީ، ޤައުމަށް ގިނަ ހިދުމަތްތަކެއް ކޮށްދެއްވި ބޭފުޅެއް ކަމަށެވެ.
ރައީސް އަބްދުﷲ ޔާމީން ވިދާޅުވީ، ރައީސް މައުމޫނު ޤައުމަށް ގިނަ ހިދުމަތްތަކެއް ކޮށްދެއްވިކަމަށް ހުރިހާ ފަރާތްތަކުންވެސް އިއްތިފަޤުވާނެ ކަަމަށެވެ. އަދި ރައީސް މައުމޫނުގެ ވެރިކަމުގައި ގެންނެވި ތަރައްޤީ މިއަދުވެސް ދިވެހި ޤައުމުން ފެނިގެންދާކަަށް ރައީސް އަބްދުﷲ ޔާމީން ވިދާޅުވި އެވެ.
ރައީސް އަބްދުﷲ ޔާމީން ވިދާޅުވީ، ޕީޕީއެމްގެ ތެރެއިން ބައެއް ފަރާތްތަކުން ރައީސް މައުމޫނަށް ފާޑު ކިޔަމުންގެންދާކަމަށާއި، ނަމަވެސް އެގޮތަށް ފާޑު ނުކިޔުމަށް އެދިވަޑައިގަންނަވާކަމަށެވެ.
ކުރީގެ ރައީސް މައުމޫނު އަބްދުއްޤައްޔޫމަކީ، ޤައުމަށް ގިނަ ހިދުމަތްތަކެއް ކޮށްދެއްވި ބޭފުޅެއް ކަމަށް ރައީސް އަބްދުﷲ ޔާމީން ވިދާޅުވިއިރު، ރައީސް އަބްދުﷲ ޔާމީންގެ ފެކްޝަނަށް ނިސްބަތްވެ ވަޑައިގަންނަވާ ވަޒީރުންނާއި މަޖިލިސް މެމްބަރުން ގެންދަވަނީ ރައީސް މައުމޫނަށް ވަރަށް ބޮޑަށް ފާޑުވިދާޅުވަމުންނެވެ. އަދި ރައީސް ޔާމީންގެ ފެކްޝަނުން ވަނީ ޕާޓީންވެސް ރައީސް މައުމޫނު ބޭރު ކޮށްފައެވެ. ބޭރުކުރެއްވުމަށްފަހު، ކޯޓު އަމުރެއްގެ ދަށުން، ރައީސް މައުމޫނުގެ އޮފީސްވެސް ވަނީ ބަންދުކޮށްފައެވެ.
