އެންމެ ބޭނުން ޖެހިފައިވާ ފަރާތްތަކަށް ޗެލްސީން 78،000 މީލް ޕެކް ފޯރުކޮށްދެނީ

ދުނިޔޭގައި ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) އާ ގުޅިގެން އެންމެ ބޭނުން ޖެހިފައިވާ ފަރާތްތަކަށް ޗެލްސީން 78،000 މީލް ޕެކް ފޯރުކޮށްދެން ނިންމައިފި އެވެ.

ޗެލްސީގެ ޗެއާމަން ބްރޫސް ބަކް ވިދާޅުވީ ޗެލްސީ އަކީ އަބަދުވެސް މުޖުތަމައަށް ބޭނުންވާ ކަންކަމުގައި އެހީތެރިވަމުން އަންނަ ކްލަބެއް ކަމަށާއި، ދުނިޔެއަށް މިހާރު ދިމާވެފައިވާ ދަތި ހާލުން އަރައިގަތުމަށް މަސައްކަތް ކުރުމަކީ އެންމެންގެ ވެސް ޒިންމާއެއް ކަމަށެވެ. އެހެންކަމުން އިނގިރޭސިވިލާތުގައި ކޮވިޑް-19 އާ ދެކޮޅަށް މަސައްކަތް ކުރަމުން އަންނަ ނެޝަނަލް ހެލްތު ސާވިސަސްގެ މުވައްޒަފުންނާއި، ހާލުގައި ޖެހިފައިވާ ފަރާތްތަކަށް އެހީވުމަށް މަސައްކަތް ކުރަމުން އަންނަ ޗެރީޓިތަކަށް އެހީވުމުގެ ގޮތުން 78،000 މީލް ޕެކް ހަދިޔާކުރަން ނިންމާފައިވާ ކަމަށްވެސް ވިދާޅުވި އެވެ.

ބްރޫސް އިތުރަށް ވިދާޅުވީ ޗެލްސީން ކުރިޔަށް އޮތް ތަނުގައިވެސް މިފަދަ ހާލަތްތަކުގައި އެހީވަމުން އަންނާނެ ކަމަށާއި، މި ދަނޑިވަޅުގައި ޗެލްސީގެ އޯނަރު ރޯމަން އަބްރަމޮވިޗް އެންމެ އިސްކަމެއް ދެއްވާ އެއްކަމަކީ ނެޝަނަލް ހެލްތު ސާވިސަސްއަށް ބޭނުންވާ އެހީ ފޯރިކޮށްދިނުން ކަމަށެވެ.

ބްރޫސް މިހެން ވިދާޅުވިއިރު، ޗެލްސީގެ ސްޓެމްފޯޑް ބްރިޖްގެ އެއް ހޮޓާވެސް ވަނީ ނެޝަނަލް ހެލްތު ސާވިސަސްގެ ބޭނުމަށް ދޫކޮށްފައި ކަމަށެވެ. އަދި ކުރިޔަށް އޮތް ހަ ހަފްތާގައިވެސް ބޭނުން ޖެހިފައިވާ ފަރާތްތަކަށް މީލް ޕެކް ފޯރުކޮށްދެމުންދާނެ ކަމަށް އެ ކްލަބުން ވަނީ ބުނެފައެވެ.

ކޮވިޑް-19 އާ ގުޅިގެން އިނގިރޭސި ޕްރިމިއާ ލީގުގެ ކުޅުން މުއްދަތެއް ނެތް ގޮތަށް މެދުކަނޑާލައިފައިވާއިރު، ޕްރިމިއާ ލީގުގެ ކްލަބްތަކުން މީގެ ކުރިން ވަނީ ނެޝަނަލް ހެލްތް ސާވިސަސް އަށް 20 މިލިއަން ޔޫރޯ ހަދިޔާ ކުރަން ނިންމާފައެވެ.