މާލެއިން ކޮވިޑް-19 އަށް ޕޮޒިޓިވްވި މީހާ އަށް ބަލި އެރިގޮތް ހޯދަން ދަތިތަކެއް
16 އެޕްރީލު 2020 | ބުރާސްފަތި 17:56ކޮމިއުނިޓީ ސްޕްރެޑް އޮތްތޯ ބަލަން ސާވޭއެއް ދަނީ ކުރަމުން
ރައްކާތެރި ކަމުގެ ގޮތުން ބަޔަކު މާސްކު އަޅައިގެން
މާލެއިން ފުރަތަމަ ފަހަރަށް ކޮވިޑް-19 އަށް ޕޮޒިޓިވްވި މީހާ އަށް ބަލި އެރިގޮތް ހޯދުމުގައި ދަތިތަކެއް އެބަހުރި ކަމަށް ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފި އެވެ.
މާލެއިން ކޮވިޑް-19 އަށް ތިން މީހަކު ވަނީ ޕޮޒިޓިވްވެފަ އެވެ. އޭގެ ތެރެއިން ބަލި ޖެހުނު ފުރަތަމަ މީހާ އަކީ ޓްރެވެލް ހިސްޓްރީ އެއް ނެތް މީހެކެވެ. އެމީހާ އަކީ މ. ޖަރީމާގޭގައި ދިރިއުޅޭ މީހެކެވެ. އެމީހާއާ އެކި ގޮތްގޮތުން ބައްދަލުވި މީހުން ހޯދައި އެމީހުން އެކަހެރި ކުރުމުގެ މަސައްކަތް ހެލްތް ޕްރޮޓެކްޝަން އެޖްނެސީ (އެޗްޕީއޭ) އިން ދަނީ ކުރަމުންނެވެ.
ބުރާސްފަތި ދުވަހު އެންއީއޯސީން ބޭއްވި ނޫސްވެރިންގެ ބައްދަލުވުމުގައި ޑރ. އިބްރާހިމް އަފްޒަލް ވިދާޅުވީ، މާލެ އިން ޕޮޒިޓިވްވި މީހާ އަށް ބަލިއެރި ގޮތް ނުވަތަ ''އިންޑެކްސް ސޯސް'' ހޯދުމަށް ވަރަށް ގިނަ މަސައްކަތްތަކެއް އެބަކުރެވޭ ކަމަށެވެ. އެކަމަކު އެއީ ކާކުކަން އަދި މިހާތަނަށް ހޯދިފައި ނުވާކަން އޭނާ ފަހާގަކުރެއްވި އެވެ.
އޭނާ ވިދާޅުވީ، އެމީހާ ނުފެންނަ ހާލަތަކީ އެއީ ޓްރޫ ކޮމިއުނިޓީ ސްޕްރެޑްގެ ހާލަތު ކަމަށެވެ. އެ ހާލަތުގެ ތަފްސީލު ދެއްވަމުން ޑރ. އަފްޒަލް ވިދާޅުވީ، އެމީހާ އަށް ބަލި ޖެހުނު ގޮތް ހޯދައިގެން ނުފެނުމުން އެހިސާބުން ނިންމަން ޖެހެނީ ޓްރޭސް ނުކުރެވޭ ވަރަށް ބަލި ރާއްޖެގައި ފެތުރިފައި އޮތް ކަމަށެވެ.
ފުރަތަމަ ކޭސް ފެނުނުއިރު އެޗްޕީއޭއިން ވަނީ ކޮމިއުނިޓީ ސްޕްރެޑެއް އޮއްތޯ ބެލުމުގެ ސާވޭ އެއް ފަށާފައެވެ. ޑރ. ވިދާޅުވީ، ލޮކްޑައުން އުވާލާ ހިސާބުން ފެށިގެން ސަރވޭ ކުރިޔަށް ގެންދިޔުމުގެ މަސައްކަތް ދާނެ ކަމަށެވެ.
