މޯލްޑިވިއަންގެ އެތެރޭގެ އުދުހުންތަކުގެ އޮޕަރޭޝަން އަލުން ފެށޭނީ ލޮކްޑައުންޑް އުވާލުމުން
16 އެޕްރީލު 2020 | ބުރާސްފަތި 11:16އެތެރޭގެ ހުރިހާ އުދުހުންތަކެއް ވަގުތީ ގޮތުން ހުއްޓާލާފައިވޭ
މޯލްޑިވިއަންގެ ފްލައިޓެއް
މާލެ ސަރަހައްދުގައި ލޮކްޑައުން ކުރުމުން މޯލްޑިވިއަން އިން ކުރިއަށްގެންދާ އެތެރޭގެ ހުރިހާ އުދުހުންތަކެއް ވަނީ ހުއްޓާލާފައެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މާލެ ސަރަހައްދުގައި ލޮކްޑައުންގެ މުއްދަތު އިތުރު 24 ގަޑިއިރަށް އިއުލާން ކުރުމާއި ގުޅިގެން މޯލްޑިވިއަން އިން ބުނީ އެތެރޭގެ ހުރިހާ އުދުހުންތަކެއް ވަގުތީ ގޮތުން ހުއްޓާލާފައިވާ ކަމަށެވެ. އަދި އެތެރޭގެ އުދުހުންތަކުގެ އޮޕަރޭޝަން އަލުން ފެށޭނީ ލޮކްޑައުންޑް އުވާލުމުން ކަމަށް ވެސް މޯލްޑިވިއަން އިން ބުނެއެވެ.
އެޗްޕީއޭއިން ވަނީ މާލެސިޓީ "ލޮކްޑައުން" ހާލަތަކަށް ގެނެވިފައިވާ މި ދަނޑިވަޅުގައި، މާލެ ސިޓީގެ އެއްވެސް ސަރަހައްދެއްގައި ބަނދަރުކޮށްފައިވާ އެއްވެސް އުޅަނދެއްވެސް ފުރުމަކީވެސް މަނާކަމެއްކަމުގައި ކަނޑައަޅާފައެވެ.
އެއަރޕޯޓުގެ ތަފާސް ހިސާބުތައް ދައްކާ ގޮތުން އެއަރޕޯޓުގެ އޮޕަރޭޝަންތައް މާރޗް މަހުގެ 27 ވަނަ ދުވަހު ހުއްޓާލި ފަހުން އެތެރޭގެ އުދުހުންތަކުގެ އަދަދުވެސް އޮތީ މަދުކޮށްފައެވެ. އެގޮތުން ގައުމީ އެއަރލައިން އިން ދަތުރުކުރާ އެތެރޭގެ ގިނަ މަންޒިލުތަކަށް ބާއްވަމުން ދިޔައީ ދުވާލަކު އެއް ފްލައިޓެވެ.
