ރާއްޖޭން ބޭރުގައި ބީއެމްއެލް ކާޑުން ފައިސާ ނެގޭ އަދަދު އިތުރުކޮށް، ދިވެހި ފައިސާ އެކައުންޓް ބޭނުންކޮށްގެން ފައިސާ ފޮނުވޭ ގޮތް ބީއެމްއެލް އިން ހަމަޖައްސައިފި
16 އެޕްރީލު 2020 | ބުރާސްފަތި 11:04ޑެބިޓް ކާޑު ބޭނުންކޮށްގެން ދުވާލަކު އޭޓީއެމް އިން ނެގޭ އަދަދު 1000 ޑޮލަރާ ހަމަޔަށް އިތުރުކޮށްފައިވޭ
ބީއެމްއެލްގެ އޭޓީއެމްތަކުން އާންމުން ހިދުމަތް ލިބިގަންނަނީ
ކޮވިޑް-19 އާ ގުޅިގެން ރާއްޖޭން ބޭރުގައި ތަފާތު ދަތިތަކާ ކުރިމަތިވެފައިވާ ދިވެހިންނަށް ބޭންކިން ހިދުމަތް ހޯދުމުގައި އިތުރު ލުއިތަކެއް ދިނުމުގެ ގޮތުން ބޭންކް އޮފް މޯލްޑިވްސް އިން މުހިންމު ބަދަލުތަކެއް ގެނެސްފިއެވެ.
މި ގޮތުން ރާއްޖޭން ބޭރުގައި ބީއެމްއެލް އިން ދޫކޮށްފައިވާ ޑެބިޓް ކާޑު ބޭނުންކޮށްގެން ދުވާލަކު އޭޓީއެމް އިން ނެގޭ އަދަދު މިވަނީ 1000 ޑޮލަރާ ހަމަޔަށް އިތުރުކޮށްފައެވެ. މިހާރު ކަސްޓަމަރުންނަށް އޭޓީއެމް މެދުވެރިކޮށް ނެގެނީ ދުވާލަކު 400 ޑޮލަރާ އެއްވަރުގެ އަދަދެކެވެ. މީގެ އިތުރުން ރާއްޖެއިން ބޭރުގައި އޭޓީއެމްތަކުން ފައިސާ ނަގާއިރު ބޭންކުން ނަގާފީ މިވަނީ 15 ރުފިޔާއަށް (ކާޑު ނެޓްވޯކްތަކަށް ދައްކާ ފީ) ކުޑަކޮށްފައެވެ. އަދި މީގެ އިތުރުން ކުރިއެކޭ އެއްގޮތަށް ކަސްޓަމަރުންނަށް ޕީއޯއެސް މެދުވެރިކޮށް ދުވާލަކު 600 ޑޮލަރުގެ ވިޔަފާރި ކުރެވޭނެއެވެ.
ބީއެމްއެލް މެދުވެރިކޮށް ރާއްޖޭން ބޭރަށް ފައިސާ ފޮނުވުމުގައި ވެސް ވަނީ ބަދަލުތަކެއް ގެނެވިފައެވެ. މި ގޮތުން ކޮންމެ ކަސްޓަމަރަކަށް ވެސް މަހެއްގެ މައްޗަށް 500 ޑޮލަރާ ހަމަޔަށް ފައިސާ ފޮނުވުމުގައި ދިވެހި ރުފިޔާ އެކައުންޓުން ފައިސާ ފޮނުވޭ ގޮތް ވަނީ ހަމަޖެހިފައެވެ. މިގޮތަށް ފައިސާ ފޮނުވުމުގައި ބީއެމްއެލް އިން އެއްވެސް ފީއެއް ނުނެގުމަށްވަނީ ނިންމާފައެވެ. ކަސްޓަމަރުން ދައްކަންޖެހޭނީ ހަމައެކަނި ފޮރިން ބޭންކް ޗާޖު ކަމަށް ބީއެމްއެލް އިން ބުނެއެވެ. އަދި މީގެ އިތުރުން ބީއެމްއެލް މޯބައިލް ޕޭ މެދުވެރިކޮށް ރާއްޖޭން ބޭރަށް ފައިސާ ފޮނުވާ ކަސްޓަމަރުންނަށްވެސް ދިވެހި ފައިސާގެ ޑިޖިޓަލް ވޮލެޓް ބޭނުންކޮށްގެން 500 ޑޮލަރާ ހަމަޔަށް ފައިސާ ފޮނުވޭނެއެވެ. މި ޚިދުމަތް ލިބިގެންދާނީ މިނިސްޓްރީ އޮފް ފޮރިން އެފެއާޒްއިން ކަނޑައަޅުއްވާފައިވާ އުސޫލުތަކާ އެއްގޮތަށް ރާއްޖޭން ބޭރުގައި ހުންނަ އެމްބަސީތަކުގައި ރަޖިސްޓަރކޮށްފައިވާ ފަރާތްތަކަށް ކަމަށް ބީއެމްއެލް އިން މައުލޫމާތުދެއެވެ.
މި ވަގުތަށް ކަނޑައެޅިފައިވާ އުސޫލުގެ ދަށުން މޭ މަހުގެ ނިޔަލަށް މި ފުރުސަތު ކަސްޓަމަރުންނަށް ލިބިގެންދާނެ ކަމަށާއި ދުވަހެއް ދުވަހަކަށް ބަދަލުވަމުން އަންނަ ހާލަތަށް ބަލައި، ބޭންކުން ދާނީ އަމިއްލަ ފަރުދުންނާއި ވިޔަފާރިތަކަށް ކޮވިޑް-19 ގެ ސަބަބުން ކުރިމަތިވާނެ ދަތިތަކުން އަރައިގަތުމަށް އެހީވެވޭނެ ގޮތްތައް ބަލަމުން އަންނަ ކަމަށް ބީއެމްއެލް އިން ބުނެއެވެ.
