އޭޑީކޭއިން ގޭގެއަށް ޒިޔާރަތްކޮށްގެން ދެމުންގެންދިޔަ ހިދުމަތްތައް ވަގުތީ ގޮތުން މެދުކަނޑާލައިފި
ހޯމް ކޮންސަލްޓޭޝަން، ހޯމް ސާމްޕަލް ކަލެކްޝަން އަދި އޭޑީކޭ އެޓް ހޯމްގެ ޚިދުމަތްތައް ވަގުތީގޮތުން ވަނީ މެދުކަނޑާލާފައި
އޭޑީކޭ- އޮންލައިންކޮށް ދެމުންގެންދާ ޚިދުމަތްތައް ލިބޭނެކަމަށް އޭޑީކޭއިން ބުނޭ
މާލޭގައި ދިރިއުޅެމުންދާ މީހެއް ކޮވިޑް-19 އަށް ޕޮޒިޓިވް ވުމާއި ގުޅިގެން އޭޑީކޭ އިން ގޭގެއަށް ޒިޔާރަތްކޮށްގެން ދެމުން ގެންދިޔަ ޚިދުމަތްތައް މެދުކަނޑާލައިފިއެވެ.
އެކަމާއި ގުޅިގެން އޭޑީކޭއިން ކޮށްފައިވާ ޓްވީޓެއްގައި ބުނެފައިވަނީ ހޯމް ކޮންސަލްޓޭޝަން، ހޯމް ސާމްޕަލް ކަލެކްޝަން އަދި އޭޑީކޭ އެޓް ހޯމްގެ ޚިދުމަތްތައް ވަގުތީގޮތުން މެދުކަނޑާލާފައި ވާކަމަށެވެ. އެހެންނަމަވެސް އޮންލައިން ކޮންސަލްޓޭޝަންގެ ޚިދުމަތް ކުރިއެކޭ އެއްގޮތަށް ލިބެމުންދާނެކަމަށް އޭޑީކޭއިން ބުނެއެވެ.
މާލެ ލޮކްޑައުންކޮށްފައި އޮންނަ ވަގުތުތަކުގައި ސްޕެޝަލިސްޓް އަދި ސުޕަރ ސްޕެޝަލިސްޓުންގެ ޚިދުމަތްތައް އޮންލައިންކޮށް ލިބެމުންދާނެކަމަށާއި 1440 އަށް ގުޅައިގެން އެޕޮއިޓްމަންޓް ހެއްދުމަށް އޭޑީކޭއިން ވަނީ އެދިފައެވެ.
ކޮވިޑް-19 މާލޭގައި ފެތުރެން ފެށުމުން ރައްކާތެރިކަމުގެ ފިޔަވަޅެއްގެ ގޮތުން ހޮސްޕިޓަލްގައި އެޑްމިޓްކޮށްފައިވާ ބަލިމީހުންނަށް ޒިޔާރަތްކުރުން ވަނީ ހުއްޓާލާފައެވެ. އަދި ބަލި މީހާގެ ގާތުގައި މަޑުކުރެވޭނީ އެކަކަށް ކަމަށް ވެސް އެހޮސްޕިޓަލުން ބުނެއެވެ. މީގެއިތުރުން ހޮސްޕިޓަލަށް މިހާރު ވަދެވޭނީ ހަމައެކަނި އެމަރޖެންސީ ދޮރާށިން ކަަމަށާއި ހޮސްޕިޓަލަށް ވަދެވޭނީ ހޮސްޕިޓަލަށް ވަނުމަށް ހުއްދަދެވޭ ފަރާތްތަކަށް އެކަނިކަމަށް ވެސް އޭޑީކޭއިން ބުނެއެވެ.
މީގެއިތުރުން ހޮސްޕިޓަލަށް އަންނަ މީހުންގެ ތެރެއިން ހުން ހުންނަ އަދި ރޯގާ ޖެހި ކެއްސާ މީހެއްނަމަ ވަގުތުން ފްލޫ ކުލިނިކަށް ފޮނުވާ ލެވޭނެކަމަށްވެސް އެ ހޮސްޕިޓަލުން ބުނެއެވެ.
ކޮވިޑް-19 އާއި ގުޅިގެން އޭޑީކޭ އިން ވަނީ އޮންލައިން ފްލޫ ކްލިނިކެއް ތައާރަފްކޮށްފަ އެވެ. މިހާތަނަށް އެ ކްލިނިކަށް 902 މީހަކު ދައްކާފައިވާކަމަށް އޭޑީކޭ އިން ބުނެއެވެ.
ކޮވިޑް-19 އަށް މިހާތަނަށް މާލެއިން މިވައިރަސް އަށް 3 މީހަކު ވަނީ ޕޮޒިޓިވްވެފައެވެ. އެއާއެކު ރާއްޖެއިން މިވައިރަސް އަށް ޕޮޒިޓިވްވި މީހުންގެ އަދަދުވަނީ 23 އަށް އަރާފައެވެ.
