ރީރެޖިސްޓްރީ ކުރުމަށް އެމްޑީޕީގެ ޓީމްތައް ގޭގެއަށް!
18 ޖުލައި 2018 | ބުދަ 17:1411 އޮގަސްޓްގެ ކުރިން ރީރެޖިސްޓްރީ ކުރުމަށް އިބޫ އެދިލައްވާ
އައްޑޫ ސިޓީ ފޭދޫގައި ރީރަޖިސްޓްރީ ކުރުމަށް އެމްޑީޕީގެ ޓީމް ގޭގެއަށް ޒިޔާރަތް ކުރަނީ
މިއަހަރުގެ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލުމަށް ރީ ރަޖިސްޓްރީ ކުރުމަށް އެމްޑީޕީން ފަށާފައިވާ ހަރަކާތުގެ ތެރެއިން އެޕާޓީގެ ޓީމްތައް ގޭގެއަށް ގޮސް ރީ ރަޖިސްޓްރީ ކޮށްދެން ފަށައިފިއެވެ.
ރަށްވެހިވެފައިވާ ރަށް ނޫން އެހެން ރަށެއްގައި 23 ސެޕްޓެމްބަރުގައި ވޯޓުލާނަމަ ވީހާވެސް އަވަހަށް 11 އޮގަސްޓްގެ ކުރިން ރީރެޖިސްޓްރީ ކުރެއްވުމަށް އެދޭ ކަމަށް ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ގޮވާލައްވާފައިވާއިރު، އެމްޑީޕީގެ ޓީމްތަކުން މުޅި ރާއްޖޭގައި އެ ހަރަކާތްތައް ދަނީ ކުރިއަށް ގެންދަމުންނެވެ. ރަށްތަކުގެ ހަރުގެތަކުގައި ރީ ރަޖިސްޓްރީކުރެވޭ ގޮތަށް އިންތިޒާމްތަށް ހަމަޖައްސާފައިވާއިރު، ދާއިރާތަކުގެ ޕެޗު އެޖެންޓުން ދަނީ ގޭގެއަށް ގޮސް ރީރަޖިސްޓްރީ ފޯމް ފުރާދެމުންނެވެ.
އެގޮތުން މާލޭގައި ދިރިއުޅޭ އަތޮޅުތެރޭގެ ރައްޔިތުންނަން ހާއްސަކޮށްގެން އެމްޑީޕީ ހަރުގޭގައި ކޮންމެ ދުވަހަކު ހެނދު 10:00 އިން ރޭގަނޑު 11:00 އަށް ރީރެޖިސްޓްރީކުރުވޭ ގޮތަށް ވަނީ ހަމަޖައްސާފައެވެ. އަދި ރީރަޖިސްޓްރީ ކުރުމަށް މާލޭގެ އެކި ދާއިރާތަކުގެ ކެމްޕެއިން ޓީމްތަކުން ގޭއަށް ޒިޔާރަތް ކުރަމުންދާއިރު، ބުދަ ދުވަހު އައްޑޫ ސިޓީ ފޭދޫއާއި، ވައިކަރަދޫގައި ވަނީ ކެމްޕެއިން ޓީމުތަކުން ވަނީ ރީރަޖިސްޓްރީ ކުރުމަށް ގޭގެއަށް ޒިޔާރަތް ކޮށްފައެވެ. ފޭދޫގައި ރީރަޖިސްޓްރީ ކުރުމުގެ ޕްރޮގްރާމްގައި ފަށާފައި ވަނީ އެމްޑީޕީގެ ކެމްޕެއިންގައި ޕެޗު އެޖެންޓުންގެ ގޮތުގައި އެ އަވަށުގައި ހަރަކާތެރިވާ މީހުންނާއި ފޭދޫ ދާއިރާގެ ފަރާތުން ބައްދަލުކުރުމަށް ފަހުގައެވެ.
ރަޖިސްޓްރޭޝަނަށް އިލެކްޝަން ކޮމިޝަނުން ބުނީ ރަށްވެހިވެފައިވާ ރަށް ނޫން ރާއްޖޭގެ އެހެން ރަށަކަށް ވޯޓުލުމަށް ރަޖިސްޓަރީވުމަށް އެދޭ ފަރާތްތަކަށް ފޯމު ދޫކުރުމާއި ފޯމުތައް ބަލައިގަތުމަށް ހަމަޖެހިފައި ވަނީ ރާއްޖޭގެ ހުރިހާ ރަށެއްގެ ރަށު ކައުންސިލް އިދާރާތަކުންނާއި، އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުންނާއި މާލޭ ސިޓީގައި ނަމަ އިންތިހާބީ މަރުކަޒު (ބައު ޖަމާލުއްދީން) އިން ކަމަށެވެ. ކޮމިޝަނުން ބުނީ ހުޅުމާލޭގެ ކޮމިއުނިޓީ ސެންޓަރުންނާއި، ވިލިނގިލި މޯބައިލް ސްޓޭޝަނުން ވެސް ފޯމު ދޫކުރުމާއި ފޯމު ބަލައިގަތުމަށް ހަމަޖެހިފައިވާ ކަމަށެވެ.
މީގެ އިތުރުން ކެމްޕެއިން ހަރަކާތަށް ވަރުގަދަ ކުރުމުގެ ގޮތުން މާލެ އާއި އަތޮޅުތެރޭގައި ޓީމްތަށް ދަނީ ހަރަކާތެރިވަމުންވެ. ލ. އަތޮޅުގެ ކޯޑިނޭޓަރ ޑރ. މުސްތަފާ ލުތުފީގެ ޓީމް އެ އަތޮޅުގެ ރަށްތަކަށް ވަޑައިގެން ކެމްޕެއިނުގެ ހަރަކާތްތައް ވަރުގަދަ ކުރުމުގެ ގޮތުން ކެމްޕޭންގެ އޮނިގަނޑު އެކުލަވާލުމުގެ މަސައްކަތް ފެއްޓެވީ ހޯމަ ދުވަހުގައެވެ. މުސްތަފާ ލުތުފީގެ ޓީމުން ލ. އަތޮޅުގައި ދޮރުން ދޮރަން ކެމްޕެއިން ހިންގެވުމުގެ އިތުރުން ރަށްތަކުގައި ކެމްޕެއިން ޓީމުތަކާއި ޕެޗު އެޖެންޓުން ދަނީ ބައްދަލުކުރައްވަމުންނެވެ.
ޑރ. މުސްތަފާ ލުތުފީގެ ޓީމުން ލ. އަތޮޅުގެ ގަމާއި، އެ އަތޮޅު މުންޑޫ އާއި، ދަނބިދޫ އާއި، މާއިބައިދޫ އާއި މާވަށާއި، މާމެންދު އާއި، ފޮނަދޫ އާއި، އިސްދޫ، ކަލައިދޫއަށް ވަޑައިގެން ކެމްޕެއިން ޓީމްތަކާއި ބައްދަލުކުރުމަށް ވަނީ ހަމަޖެހިފައެވެ. ލ. އަތޮޅުގެ ކެމްޕެއިން ހަރަކާތްތައް ވަރުގަދަ ކުރުމަށް ވެސް ދަނީ ރަށު ފެންވަރުގައި ހާއްސަ ހަރަކާތްތަކެއް ކުރިއަށް ގެންދަމުންނެވެ. ހާއްސަކޮށް ރިޔާސީ އިންތިހާބަށް ތައްޔާރުވުމުގެ ގޮތުން ގަމު ދާއިރާގެ އެމްޑީޕީގެ މެމްބަރުން ދަނީ ގިނަ ކަންތައްތަކެއް ހިންގަމުންނެވެ.
ކުރީގެ ރައީސް މުހައްމަދު ނަޝީދު ލަންކާގައި ހުންނަވައިގެން އެކި ދާއިރާތަކުގެ ޕެޗު އެޖެންޓުންނާއި ސްކައިޕް މެދުވެރިކޮށްގެން ދަނީ ބައްދަލުކުރައްވަމުނެވެ. ބުދަ ދުވަހު އެމަނިކުފާން ވަނީ މާފަންނު ދެކުނު ދާއިރާގެ ޕެޗު އެޖެންޓުންނާއި ބައްދަލުކުރައްވާ ކެމްޕެއިން ހަރަކާތަށް ކުރިއަށްދާ ގޮތް އޮޅުންފިލުވާފައެވެ.
