ވާރޭ ވެހި ދ. މީދޫގައި ވަރަށް ބޮޑަށް ފެންބޮޑުވެ، ގޭގެއަށް ގެއްލުން ވެއްޖެ
ރޭ ފަތިސްނަމާދު ވަގުތުން ފެށިގެން ބޯކޮށް ވާރޭ ވެހެމުންދޭ
ދ. މީދޫގައި ވާރޭވެހި ފެންބޮޑު ވެފައި
ރާއްޖެއަށް މިހާރު ކުރަމުންދާ ވިއްސާރައިގައި ދ. މީދޫގައި ފެން ބޮޑުވެ، ގޭގެއަށާއި ހިފާ ގެންގުޅޭ ތަކެއްޗަށް ވަރަށް ބޮޑަށް ގެއްލުން ވެއްޖެ އެވެ.
ބުރާސްފަތި ދުވަހު "ރާއްޖެއެމްވީ"އަށް މައުލޫމާތު ދެމުން މީދޫ ކައުންސިލް މެމްބަރު މުހައްމަދު ތައުފީގު ވިދާޅުވީ، ބުދަ ދުވަހުގެ ރޭ ފަތިސްނަމާދު ވަގުތުން ފެށިގެން އެރަށަށް ވަރަށް ބޯކޮށް ވާރޭވެހެމުންދާ ކަމަށެވެ. އަދި ދޭތެރެ ދޭތެރެއިން މެދުކަނޑާލި ނަމަވެސް ގިނަ ވަގުތު ބޯކޮށް ވާރޭ ވެހުމުގެ ސަބަބުން ރަށުގެ ހުރިހާ ގެއަކަށް ކަހަލަ ގޮތަށް ފެންވަދެ، ގޭގައި ހިފާ ގެންގުޅޭ ސާމާނުތަކަށް ވަރަށް ބޮޑަށް ގެއްލުން ވަމުންދާ ކަމަށްވެސް ތައުފީގު ވިދާޅުވި އެވެ.
ދ. މީދޫގައި ވާރޭވެހި ފެންބޮޑު ވެފައި
ތައުފީގު ވިދާޅުވީ އެ ސަރަހައްދަށް ވައިވެސް ގަދަ ކަމަށާއި ކަނޑުވެސް ގަދަ ކަމަށެވެ.
ތައުފީގު ވިދާޅުވީ ރަށު ތެރޭގައި ފެން ބޮޑުވާން ދިމާވީ އެ ރަށުގައި ހިއްކާފައިވާ ބިން އުސްކޮށް އޮތުމުންނާއި ރަށު ތެރޭގެ ފަސްގަނޑު ތިރިކަމުން، ރަށު ތެރެއަށް ފެންގަނޑު އަންނަމުންދާތީ ކަމަށެވެ.
ދ. މީދޫގައި ވާރޭވެހި ފެންބޮޑު ވެފައި
ތައުފީގު ވިދާޅުވީ ރަށުގައި ތިބި ފުލުހުންނާއި އާއްމު ރައްޔިތުން ނިކުމެ ވެލި ބަސްތާތައް ޖަހާ، އަދި ފެން ހިއްކާ ޕަންޕު ބޭނުންކޮށްގެން ގޭގެއަށް އިތުރަށް ފެންވަނުން ކޮންޓްރޯލްކުރުމަށް މަސައްކަތް ކުރަމުންދާ ކަމަށެވެ.
ތައުފީގު ވިދާޅުވީ ކުޑަ ހުވަދޫ ކޯސްޓްގާޑަށް ވެސް ގުޅައިގެން އެހީތެރިކަމަށް އެދިފައިވާ ކަމަށާއި ކޯސްޓްގާޑުގެ އުޅަނދެއް މީދޫއަށް އަންނަން ފުރާފައިވާ ކަމަށެވެ.
ދ. މީދޫގައި ވާރޭވެހި ފެންބޮޑު ވެފައި
