ތޮއްޖެހިގެން ތަކެތި ނުގަނޭ، އޮންލައިންކޮށްވެސް ގަނެވޭނެ: އަމްރު
އެސްޓީއޯގެ ސުޕަމާރޓުތައް ތޮއްޖެހެން ފަށާފައިވޭ
މާލެއިން ދިވެއްސަކު ޕޮޒިޓިވްވުމާއެކު، އެސްޓީއޯގެ ސުޕަމާރޓުތައް ތޮއްޖެހެން ފަށާފައިވޭ
މިދަނޑިވަޅުގައި ތޮއްޖެހިގެން ތަކެތި ގަތުމަށް ނުދިއުމަށާއި، ޑެލިވަރީގެ ޚިދުމަތް ހޯދުމަށް ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) ގެ މެނޭޖިންގ ޑިރެކްޓަރ ހުސައިން އަމްރު އެދިވަޑައިގެންފި އެވެ.
ބުދަ ދުވަހު މާލެއިން ދިވެއްސަކު ޕޮޒިޓިވްވުމާއެކު، އެސްޓީއޯގެ ސުޕަމާޓުތައް ތޮއްޖެހެން ފަށާފައިވާއިރު، ގިނަ ބަޔަކު ކިއޫގައި ޖެހިގެން މުދާ ގަންނަމުންދާ ވީޑިއޯތަކާއި ފޮޓޯތައް މީސްމީޑިއާގައި ދަނީ ދައުރުވަމުންނެވެ.
އެކަމާ ގުޅޭގޮތުން ބުދަ ދުވަހު އަމްރު ކުރެއްވި ޓްވީޓެއްގައި ވަނީ، މިފަދަ ދަނޑިވަޅެއްގައި ތޮއްޖެހިގެން ތަކެތި ގަންނަން ނުދިއުމަށް އިލްތިމާސް ކުރައްވާފަ އެވެ. އަދި އެސްޓީއޯ ސުޕަރމާޓުން ގަންނަން ބޭނުންވާ މުދާ ބޭނުންވާ ފަރާތްތަކަށް ޑެލިވަރީގެ ޚިދުމަތް އެސްޓީއޯއިން ފޯރުކޮށްދޭނެކަމަށް އަމްރު ވިދާޅުވި އެވެ.
އަމްރު އެހެން ވިދާޅުވެފައިވާއިރު، އެސްޓީއޯއިން ވަނީ އޮންލައިންކޮށް ވިޔަފާރި ކުރުމަށް "އީ ސްޓޯރ" ގެ ޚިދުމަތް ބޭނުން ކުރުމަށް އެދިފަ އެވެ. އެގޮތުން އީ ސްޓޯރ ގެ ބޭނުންކޮށްގެން މުދާ ގަތުމުން، ގެއަށް ޑެލިވަރ ކޮށްދޭނެ ކަމަށް އެސްޓީއޯއިން ބުނެ އެވެ.
ބުދަ ދުވަހު މާލެއިން ދިވެއްސަކު ޕޮޒިޓިވްވެފައިވާއިރު، މިކަން ކަށަވަރުވުމާއިއެކު ރެޕިޑް ރެސްޕޮންސް ޓީމުން ޙަރަކާތްތެރިވާން ފަށާފައިވާ ކަމަށާއި، މި މަޢުލޫމާތު އެމީހާއަށް އެންގުމަށްފަހު ވަގުތީގޮތުން ޞަރަޙައްދު ބަންދުކޮށް އޭނާ ދިރިއުޅޭ ގެ ކަރަންޓީނުކޮށްފައިވާ ކަމަށް އެޗްޕީއޭއިން ބުނެ އެވެ.
އެޗްޕީއޭއިން ބުނީ މިކަން ކަށަވަރުވެފައިވަނީ ރޯގާގެ އަލާމާތްތައް ފެނިގެން މިމަހު 14 ވަނަ ދުވަހު މާލެހިޔާ ކައިރީ ހުންނަ ފުލޫ ކްލިނިކަށް ދެއްކި ދިވެއްސެއް ކޮވިޑް-19 އަށް ޓެސްޓުކުރުމުން ކަމަށެވެ.
އޭގެ އިތުރުން، ކޮވިޑް-19 އާއި ގުޅިގެން ހެލްތު ޕްރޮޓެކްޝަން އެޖެންސީން ދެމުންދާ އިރުޝާދުތަކާއި އެއްގޮތަށް ޢަމަލުތައް ބެހެއްޓުމަށް އިލްތިމާސްކުރާ ކަމަށާއި، މިގޮތުން ކޮންމެހެން ބޭނުންވެއްޖެ ޙާލަތެއްގައި ނޫނީ ބޭރަށް ނުނިކުތުމާއި، އިޖުތިމާޢީ ގައިދުރުކަން ދެމެހެއްޓުމަށް އިތުރަށް ސާމާލުވުމަށް އެޗްޕީއޭއިންވެސް ވަނީ އެދިފަ އެވެ.
