އައިފޯން އެސްއީ އުރީދޫ އިން ލޯންޗްކޮށްފި، މޫލީ މެދުވެރިކޮށް ގަނެވޭނެ
މިއީ ސްމާޓްފޯންތަކުގައި ބޭނުންކުރާ އެންމެ ބާރުގަދަ ޗިޕް ބޭނުންކުރާ ފޯނެއް
އައިފޯން އެސްއީ ލޯންޗާއެކު އުރީދޫއިން ނެރިފައިވާ ޕޯސްޓަރު
އެޕަލްގެ އެންމެ ބާރުގަދަ އަދި އެންމެ އަގުހެޔޮ ފޯން، އައިފޯން އެސްއީ އުރީދޫ މޯލްޑިވްސް އިން ލޯންޗްކޮށްފިއެވެ.
އައިފޯން އެސްއީ ރާއްޖެއަށް ލޯންޗްކުރިކަން އިއުލާންކޮށް އުރީދޫ އިން ނެރުނު ބަޔާނެއްގައި ބުނެފައިވަނީ، އައިފޯން އެސްއީ (ޖެން 2) ގެ ދެ މޮޑެލްއެއް ލިބޭނެ ކަމަށެވެ. އެގޮތުން 128 ޖީބީ ސްޓޯރޭޖްގެ މޮޑެލް ލިބޭނީ 9،399ރ. އަށެވެ. އަދި 256 ޖީބީ ސްޓޯރޭޖްގެ މޮޑެލް ލިބޭނީ 11،499ރ. އަށެވެ.
އައިފޯން އެސްއީ އުރީދޫގެ އީ ކޮމަރސް ޕްލެޓްފޯރމް މޫލީ މެދުވެރިކޮށް ބަލައިގަތުމުން، ރާއްޖޭގެ ކޮންމެ ހިސާބަކަށް ވެސް މުޅިން ހިލޭ ގެންގޮސްދޭނެ ކަމަށް އުރީދޫއިން ބުނެފައި ވެއެވެ.
މިކަމާއި ގުޅިގެން އުރީދޫގެ އުރީދޫގެ އެކްޓިންގް ޗީފް ކޮމާރޝަލް އޮފިސަރ، ހުސެއިން ނިޔާޒް ވިދާޅުވީ ދިވެހިންނަކީ މާކެޓަށް ނިކުންނަ އެންމެ ފަހުގެ އުފެއްދުންތައް އަވަހަށް ގަތުމަށް ޝައުގުވެރިގަން ހުންނަ ބައެއް ކަމަށެވެ. އެހެންކަމުން، އުރީދޫގެ ކަސްޓަމަރުންނަށް އައިފޯން އެސްއީ ބަލައިގަތުމުގެ ފުރުސަތު ފަހިކޮށްދިނުމަކީ ލިބޭ އުފަލެއްގެ ގޮޮތުގައި ނިޔާޒް ސިފަކުރެއްވިއެވެ.
އުރީދޫ އިން ބުނި ގޮތުގައި، ފަހުގެ އެހެން އައިފޯނުތަކާ އަޅާ ބަލާއިރު ސައިޒުން ކުޑަ ކަމުގައި ވީނަމަވެސް މި ފޯނު ފަރުމާ ކުރެވިފައިވަނީ ސްމާރޓް ފޯނުތަކުގައި ބޭނުންކުރެވޭ އެންމެ އަވަސް ޗިޕް ކަމުގައިވާ އޭ13 ބައޯނިކް ޗިޕް ބޭނުންކޮށްގެނެވެ. އައިފޯން މޮޑެލްތަކުގެ ތެރެއިން އެންމެ ވަރުގަދަ ސިންގަލް ކެމެރާ ސިސްޓަމް ހަރުކުރެވިފައިވަނީ ވެސް އައިފޯން އެސްއީގައެވެ.
