ކަންބޮޑުނުވޭ، ސަރުކާރުން ވަނީ ތައްޔާރުވެފައި: ރައީސް ނަޝީދު
15 އެޕްރީލު 2020 | ބުދަ 08:19ކޮވިޑް-19 ފެތުރިދާނެކަން އަބަދުވެސް އާންމު ސިއްޙީ މާހިރުންނަށް އެނގޭކަމަށް ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު
ކޮވިޑް-19 އާއި ގުޅިގެން ސަރުކާރުން ވަނީ ތައްޔާރުވެފައި ކަމަށާއި، ރައްޔިތުން ކަންބޮޑު ނުވުމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ބުދަ ދުވަހު މާލެއިން ދިވެއްސަކު ޕޮޒިޓިވްވެފައިވާއިރު، ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ރާއްޖޭގެ ރަށްރަށުގައި ކޮވިޑް-19 ފެތުރިދާނެކަން އަބަދުވެސް ޢާންމު ސިއްޙީ މާހިރުންނަށް އެނގޭ ކަމަށާއި، ކަންކަން މި ހިނގަމުންދަނީ އެންމެ ފުރަތަމަވެސް އަންދާޒާ ކުރެވުނު ގޮތަށް ކަމަށެވެ.
އެގޮތުން ސަރުކާރުން އެކަމަށް ތައްޔާރުވެފައިވާ ކަމަށާއި، ރައްޔިތުން ކަންބޮޑުނުވުމަށް ރައީސް ނަޝީދު ވަނީ އިލްތިމާސް ކުރައްވާފައެވެ.
ރައީސް ނަޝީދު އެހެން ވިދާޅުވެފައިވާއިރު، ބުދަ ދުވަހު އެޗްޕީއޭއިން ނެރުނު ބަޔާނެއްގައި ބުނީ، ކޮވިޑް-19 އަށް ޕޮޒިޓިވް މީހަކު މާލެއިން 15 އެޕްރީލް 2020 (ބުދަ ދުވަހު) ފެނިފައިވާއިރު، މިކަން ކަށަވަރުވެފައިވަނީ ރޯގާގެ އަލާމާތްތައްފެނިގެން މިމަހު 14 ވަނަ ދުވަހު މާލެހިޔާ ކައިރީ ހުންނަ ފުލޫ ކްލިނިކަށް ދެއްކި ދިވެއްސެއް ކޮވިޑް-19 އަށް ޓެސްޓުކުރުމުން ކަމަށެވެ.
އެގޮތުން މިކަން ކަށަވަރުވުމާއިއެކު ރެޕިޑް ރެސްޕޮންސް ޓީމުން ޙަރަކާތްތެރިވާން ފަށާފައިވާ ކަމަށާއި، މިމަޢުލޫމާތު އެމީހާއަށް އެންގުމަށްފަހު ވަގުތީގޮތުން ޞަރަޙައްދު ބަންދުކޮށް އޭނާ ދިރިއުޅޭ ގެ ކަރަންޓީނުކޮށްފައިވާ ކަމަށް އެޗްޕީއޭއިން ބުނެއެވެ.
