މާލެއިން ކޮވިޑް-19 އަށް ޕޮޒިޓިވް މީހާގެ އެއްވެސް ޓްރެވަލް ހިސްޓްރީ އެއް ނެތް

މާލެ އިން ކޮވިޑް-19 އަށް ޕޮޒިޓިވްވި މީހާގެ ފަހުގެ ޓްރެވަލް ހިސްޓްރީ އެއް ނެތްކަމަށް ރާއްޖެއެމްވީ އަށް މައުލޫމާތު ލިބިއްޖެ އެވެ.

އެ މީހާގެ އާއިލާގެ ފަރާތުން މައުލޫމާތު ދެއްވި ބޭފުޅަކު ވިދާޅުވީ، އޭނާ ދިރިއުޅޭ އެޕާޓްމަންޓުގައި ދިރިއުޅެނީ ދެ މީހެއް ކަމަށެވެ. އަދި މިދިޔަ ހަފުތާ ބަންދުގައި ހުޅުމާލެއަށް ގޮސްފައިވާ ކަމަށް ވެސް ވިދާޅުވިއެވެ.

މި މައުލޫމާތު އަދި އެއްވެސް ރަސްމީ މަސްދަރަކުން ކަށަވަރު ކޮށްދީފައެއް ނުވެއެވެ. މިއީ މާލެ ތެރެއިން މި ވައިރަސް އަށް ޕޮޒިޓިވްވީ ފުރަތަމަ މީހާއެވެ. އޭނާ ވައިރަސް ހުރިތޯ ޓެސްޓުކޮށްފައި ވަނީ ބަލީގެ އަލާމާތްތައް ހުރެގެން ފްލޫ ކްލިނިކަށް ޑޮކްޓަރަށް ދައްކަން ދިއުމުންނެވެ.

މިއާއެކު މިހާތަނަށް ރާއްޖެއިން ކޮވިޑް-19 މީހުންގެ އަދަދަކީ 21 އެވެ. މީގެ ތެރޭގައި ރާއްޖެއިން ފުރަވާލި ފަހުން ސާމްޕަލް ޕޮޒިޓިވް ކަމަށް ދެއްކި އިޓަލީގެ ދެ މީހަކު ހިމެނެއެވެ. ޕޮޒިޓިވްވީ މީހުންގެ ތެރެއިން 16 މީހެއްގެ ބަލި ވަނީ ފަސޭހަވެފައެވެ. އެންމެ ފަހުން ޕޮޒިޓިވްވީ މީހާ ހިމަނައިގެން، މި ވަގުތު ބައްޔަށް ރާއްޖޭގައި ފަރުވާ ހޯދަމުން ދަނީ ތިން މީހެކެވެ.