ހޮނިހިރު ބާޒާރު ވަކި އުޞޫލު ތަކަކާއި އިންތިޒާމުތަކެއްގެ މަތިން އަލުން ފެށުމަށް މަޝްވަރާ ކުރާ ކަމަށް ކުޅުދުއްފުށީ ކައުންސިލްގެ އިދާރާއިން ބުނެފިއެވެ.

ކުޅުދުއްފުށީ ކައުންސިލުން ބުނީ ކޮވިޑް-19 ރޯގާއާ ގުޅިގެން ކުޅުދުއްފުށީގައި އުފައްދާފައިވާ ޓާސްކްފޯސްގެ ފަރާތުން ކުޅުދުއްފުށީ ހޮނިހިރު ބާޒާރު ވަކި އުޞޫލު ތަކަކާއި އިންތިޒާމު ތަކެއްގެ މަތިން އަލުން ފެށުމަށް މަޝްވަރާތައް ކުރެވެމުންދާ ކަމަށެވެ.

ކައުންސިލުން ބުނީ ހޮނިހިރު ބާޒާރު އަލުން ކުރިއަށް ގެންދިއުމަށް ހަމަޖެހިފައި ވަނީ ވަކި އުޞޫލުތަކެއްގެ މަތިން ކަމުން ބާޒާރުގައި ބައިވެރިވާން ބޭނުންވާ މީހުން ކައުންސިލްގައި ރަޖިސްޓްރީވުން އެދޭ ކަމަށެވެ. އަދި ހޮނިހިރު ބާޒާރު އަލުން ފަށާއިރު ބައިވެރިވުމުގެ ފުރުޞަތު ދިނުމަށް ހަމަޖެހިފައި ވަނީ ރަޖިސްޓްރީ ވާ މީހުންނަށް އެކަނިކަމުން މިކަމަށް ޚާއްޞަ ސަމާލުކަމެއް ދިނުމަށް ވެސް ކައުންސިލުން އެދިފައިވެއެވެ.

ކައުންސިލުން ބުނީ ހޮނިހިރު ބާޒާރުގައި ރަޖިސްޓްރީވުމަށް މިމަހުގެ 14، 15 އަދި 16 ވަނަ ދުވަހު ހެނދުނު 10:15އިން މެންދުރު 12:00އާއި ދެމެދު 6527188 ނުވަތަ 6527177 ނަންބަރު ފޯނަށް ގުޅައި، ރަޖިސްޓްރީވުމަށްއެދޭ ކަމަށެވެ. މި ގަޑިތަކުގައި ގުޅަން ދަތި މީހުން ކައުންސިލްގެ ހޮޓްލައިން 9531312 އަށް ޓެކްސްޓް ނުވަތަ ވައިބަރ މެދުވެރިކޮށް ފުރިހަމަ ނަން، ގުޅޭނެ ނަންބަރު އަދި ބޭނުން ބަޔާންކޮށް މެސެޖް ކުރެއްވުމުން އެމީހުންނަށް ގުޅައި ރަޖިސްޓްރީކުރުން ކުރިއަށް ގެންދިއުމަށް ވަނީ ހަމަޖެހިފައިވާ ކަމަށް ކުޅުދުއްފުށީ ކައުންސިލުން ބުނެއެވެ.

ކޮވިޑް-19އާ ރައްކާތެރިވުމުގެ ގޮތުން މާލެސިޓީގެ އިތުރުން އަތޮޅުތެރޭގެ ގިނަ ރަށްރަށުގެ ޕާކުތަކާއި، މީހުން އެއްވެ އުޅޭ މައިޒާންތައް ވަނީ ބަންދުކޮށްފައެވެ.