ކެއަރ ޕެކޭޖްތައް ފޮނުވުމުގެ މަސައްކަތް ހުއްޓުމެއް ނެތި ކުރިއަށް ދާނެ: ފޮރިން މިނިސްޓްރީ
13 އެޕްރީލު 2020 | ހޯމަ 11:11ވީހާވެސް އަވަހަށް ޕެކޭޖްތައް ހަވާލުކުރާނަން
ކެއާރ ޕެކޭޖްތައް ހަވާލުކުރުމަށް ކިޔޫގައި
ރާއްޖެއިން ބޭރުގައި ދިރިއުޅެމުންދާ ދިވެހިންނަށް ފޮނުވާފައިވާ ކެއަރ ޕެކޭޖްތަކަށް ހަވާލުކުރުމުގެ މަސައްކަތް ހުއްޓުމެއްނެތި ކުރިޔަށްދާކަމަށް ފޮރިން މިނިސްޓްރީން ބުނެފިއެވެ.
މިކަމުގެ އެންމެ ފަހުގެ ތަފްސީލް ހާމަކޮށް ފޮރިންމިނިސްޓްރީން ބުނެފައިވަނީ، ސްރީލަންކާގެ ވެރިރަށް ކޮލަމްބޯއަށް ފޮނުވާފައިވާ 622 ޕެކޭޖްގެ ތެރެއިން 500 ޕެކޭޖް މިހާތަނަށް ހަވާލުކޮށްފައިވާކަމަށާއި އޭގެތެރެއިން ބާކީ 122 ޕެކޭޖް ހޯމަ އަދި އަންގާރަ ދުވަހު ހަވާލުކުރާނެކަމަށެވެ.
މެލޭޝިއާއަށް ފޮނުވާފައިވާ 452 ޕެކޭޖްގެ ތެރެއިން މިހާތަނަށް ހަވާލުކުރެވިފައިވަނީ 65 ޕެކޭޖެއެވެ. ފޮރިން މިނިސްޓްރީން ބުނެފައިވަނީ، ބާކީ 387 ޕެކޭޖް ހަވާލުކުރުމުގެ މަސައްކަތް މި ހަފުތާތެރޭގައި ކުރިޔަށް ދާނެކަމަށާއި އާއިލާތަކަށް އެތަކެތި ފޯރުކޮށްދިނުމުގެ ދަތިކަމެއް އުޅެނީ، ހަފުތާ ބަންދުގައި އެތަކެތި ލިބުމުންކަމަށެވެ. އަދި ގައުމުގައި އަޅާފައިވާ ފިޔަވަޅުތަކާއި ގުޅިގެން ލަސްތަކެއް އުޅޭކަމަށް ވަނީ ފާހަގަކޮށްފައެވެ.
އިންޑިއާއަށް ފޮނުވާފައިވާ ޖުމުލަ ޕެކޭޖްތަކުގެ އަދަދަކީ 144 އެކެވެ. އެތަކެތި ލިބުމާއެކު އިންޑިއާގެ ޓްރިވެންޑްރަމްގައި ހުންނަ ދިވެހި ކޮންސިއުލޭޓުން އެ ތަކެތި ކަސްޓަމުން ކްލިއަރ ކުރުމަށްފަހު އެތަކެތި އާއިލާތަކަށް ފޯރުކޮށްދިނުމުގެ މަސައްކަތް މިހާރު ކުރިޔަށްގެންދާކަމަށް ފޮރިން މިނިސްޓްރީން ވަނީ ބުނެފައެވެ.
ކެއަރ ޕެކޭޖްގެ ގޮތުގައި ކޮންމެ އާއިލާ އަކަށް ފޮނުވޭނީ 15 ކިލޯގެ ތަކެއްޗެެވެ. ފޮރިން މިނިސްޓްރީން ވަނީ މީގެ ކުރިން ސްރިލަންކާ އަދި މެލޭޝިޔާ ގައި ދިރިއުޅޭ ފަރާތްތަކަށް ކެއަރ ޕެކޭޖް ފޮނުވޭނެ އިންތިޒާމު ހަމަޖައްސައިދީފައެވެ.
ފޮރިން މިނިސްޓްރީން ބުނެފައިވަނީ، ޢާއިލާތަކަށް ފޮނުވާފައިވާ ތަކެތި ފޯރުކޮށްދިނުމުގެ ލަސްތަކެއް އުޅެނީ ކޮވިޑް-19 އާއި ގުޅިގެން ޤައުމުތަކުގައި އަޅާފައިވާ ފިޔަވަޅުތަކުގެ ސަބަބުންނެވެ. އަދި މި ޤައުމުތަކުގެ ހައިކޮމިޝަންތަކުން ވީހާވެސް އަވަހަކަށް ހުރިހާ ގެތަކަށް ތަކެތި ފޯރުކޮށްދިނުމުގެ މަސައްކަތް ކުރަމުންދާކަމަށް ފޮރިން މިނިސްޓްރީން ވަނީ ބުނެފައެވެ،
