މިހާރު މުޅި ދުނިޔޭގައި ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ދުނިޔޭގެ ފުޓުބޯޅަ ހުއްޓުމަކަށް އައި ނަމަވެސް، ބެލަރޫސްގައި ކުރިއަށްދާ ބެލަރޫސިއަން ޕްރިމިއާ ލީގުގެ މެޗުތަކަށް ސަޕޯޓަރުން ނުވަންނަން ފަށައިފި އެވެ.

ބެލަރޫސިއަން ޕްރިމިއާ ލީގަކީ މިހާރު ޔޫރަޕްގައި ކުރިޔަށްދާ ހަމައެކަނި ލީގެވެ. ލީގު މެދުކަނޑާ ނުލާ ކުރިޔަށް ގެންދާތީ ބެލަރޫސްގެ ކްލަބުތަކުގެ ކޯޗުންނާއި ކުޅުންތެރިންގެ ނުރުހުން ވަނީ އެގައުމުގެ ފުޓްބޯޅަ ފެޑަރޭޝަނަށް އަމާޒުވެފައެވެ. އަދިވެސް ލީގުގެ ކުޅުން ކުރިއަށްދާއިރު، މިހާރު ދަނޑުތައް އޮންނަނީ ފަޅަށެވެ. ރިޕޯޓުތައް ބުނާގޮތުން މީގެ ކުރިން ދަނޑަށް ވަތް ސަޕޯޓަރުންނަށް ވަނީ ރޯގާގެ އަސަރު ކޮށްފައެވެ.

ފުޓްބޯޅަ ކުޅުންތެރިންގެ ޔޫނިއަން ފިފްޕްރޯގެ ޖެނެރަލް ސެކްރެޓަރީ ޖޯނަސް މީގެކުރިން ވިދާޅުވީ މި ދަނޑުވަޅުގައި ބެލަރޫސްގައި ފުޓްބޯޅަ މެޗުތައް ކުރިއަށް ދިޔުމަކީ ބަލައިގަނެވޭނެ ކަމެއް ނޫން ކަމަށާއި ލީގުގެ ކުޅުން ހުއްޓުވުމަށް ހުށަހަޅާނެ ކަމަށެވެ. އަދި މި ދަނޑިވަޅުގައި އާންމު ރައްޔިތުންނާއި ކުޅުންތެރިންގެ ސިއްހަތަށް އިސްކަން ދޭން ޖެހޭނެ ކަމަށްވެސް ވިދާޅުވި އެވެ.

މުޅި ދުނިޔޭގައި ހަލުވިކަމާއެކު ކޮވިޑް-19 ފެތުރެމުން އަންނައިރު، ބެލަރޫސްއިން މިހާތަނަށް ވަނީ 2،578 މީހަކު މި ވައިރަހަށް ޕޮޒިޓިވްވެފައެވެ. އަދި މި ވައިރަސް ޖެހިގެން އެ ގައުމުން 26 މިހާތަނަށް ވަނީ މަރުވެފައެވެ.

ކޮވިޑް-19 ގެ ސަބަބުން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، މެދުކަނޑާލާފައިވާ ޔޫރަޕްގެ ފުޓްބޯޅަ މުބާރާތްތަށް އަލުން ފަށަން ކަނޑައަޅާފައިވާ ޕްލޭނާ އެއްގޮތަށް ނުގޮސްފިނަމަ ފުޓްބޯޅަ ސީޒަން ގެއްލުމުގެ ބިރު އެބައޮތް ކަމަށް ޔުއެފާ ރައީސް ސްލޮވީނިއާގެ އަލެކްސަންޑަ ސެފެރިން ދާދު ފަހުން ވަނީ ވިދާޅުވެފައެވެ.

މިހާރު މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ޔޫރަޕްގެ ގަދަ ފަސް ލީގުގެ ކުޅުންވެސް ވަނީ މެދުކަނޑާލާފައެވެ. އެއީ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގާއި، ޖަރުމަން ލީގުގެ އިތުރުން ފްރެންޗު ލީގެވެ. އަދި ޔުއެފާ އިން ވަނީ ޔުއެފާ ޗެމްޕިއަންސް ލީގާއި ޔުއެފާ ޔޫރޮޕާ ލީގުވެސް ފަސްކޮށްފައެވެ. އަދި ކުރިއަށް އޮތް ހޫނު މޫސުމަށް ތާވަލުކޮށްފައި އޮތް ޔޫރޯ ފުޓްބޯޅަ މުބާރާތާއި ކޮޕަ އެމެރިކާ ފުޓްބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ.