ކަރަންޓީނު ފެސިލިޓީތަކަށް ދާން ނިންމާފައެއް ނުވޭ: އެޗްއާރްސީއެމް
މަދު ޕީޕީއީ ބޭނުންކުރުމުގެ ވިސްނުމެއްވެސް ނުގެންގުޅޭނެ: އެޗްއާރްސީއެމް
ފަރުކޮޅުފުށި ގައި ގާއިމްކޮށްފައިވާ އައިސޮލޭޝަން ފެސިލިޓީ
ކަރަންޓީނު ފެސިލިޓީތަކަށް ދާން ނިންމާފައިނުވާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބުނެފިއެވެ.
އެޗްއާރްސީއެމުން އެހެން ބުނެފައިމިވަނީ ''ހިއުމަން ރައިޓްސް ކޮމިޝަނުން ކަރަންޓީން ފެސިލިޓީތަކަށް ދާން ބޭނުންވެއްޖެ" މި މައޫޝޫގެ ދަށުން ރާއްޖެ.އެމްވީން ޝާއިއު ކޮށްފައިވާ ހަބަރަކާއި ގުޅިގެންނެވެ.
އެކަމާއި ގުޅިގެން އެ ކޮމިޝަނުން އާދިއްތަ ދުވަހު ނެރެފައިވާ ބަޔާނެއްގައި ބުނީ، ކޮވިޑް-19 އިން ރައްކާތެރިވުމަށް "ސަބްކޮމިޓީ އޮން ޕްރިވެންޝަން އޮފް ޓޯޗަރ" އެސްޕީޓީ އިން ފެބްރުއަރީ މަހުގެ 10 އިން 14 އަށް ކުރިޔަށް ގެންދިޔަ އެސްޕީޓީގެ 40 ވަނަ ބައްދަލުވުމުގައި ނޭޝަނަލް ޕްރިވެންޓިވް މެކޭނިޒަމް (އެންޕީއެމް) ތަކުން ކަރަންޓީނު ފެސިލިޓީތަކަށް ޒިޔާރާތްކުރުމާ ގުޅޭގޮތުން މަޝްވަރާކޮށް، އޮޕްޝަނަލް ޕްރޮޓޮކޯލް ޓު ދަ ކޮންވެންޝަން އަގެއިންސްޓް ޓޯޗަރ (އޮޕްކެޓް) އިން އެންޕީ އެމްތަކަށް ދީފައިވާ ބާރުގެ ދަށުން، އެފަދަ ތަންތަނަށް ޒިޔާރާތްކުރުމަކީ އެންޕީއެމްގެ އިހްތިސާސް ތަކުގެ ތެރޭގައި ކުރެވޭނެކަމެއް ކަން ބަޔާންކޮށްފައިވާކަމަށެވެ.
އެޗްއާރްސީއެމްގެ ބަޔާނުގައި ބުނީ، ދައުލަތުގެ ބެލުމުގެ ދަށުގައި ތިބޭ ފަރާތްތަކުގެ ހައްގުތައް ކަށަވަރުކުރުމަކީ އެ ކޮމިޝަނުގެ ގާނޫނީ ޒިންމާއެއް ކަމުގައިވީނަމަވެސް، ކަރަންޓީނު ފެސިލިޓީތަކަށް ޒިޔާރާތްކުރުމުގައި ދިމާވެދާނެ ގޮންޖެހުންތައް ހުރުމާއެކު މިވަގުތު އެފެސިލިޓީތަކަށް އެ ކޮމިޝަނުން ދިޔުމަށް ނިންމާފައިނުވާ ކަމަށެވެ. އަދި އެފަދަ ތަންތަނަށް ދާންޖެހިއްޖެ ޙާލަތެއްގައިވެސް ސިއްހީ ދާއިރާގައި މަސައްކަތްކުރާ ފަރާތްތަކުން ބޭނުންކުރުމަށް ހުރި މަދު ޕީޕީއީ ބޭނުންކުރުމުގެ ވިސްނުމެއްވެސް ނުގެންގުޅޭ ކަމަށްވެސް އެޗްއާރްސީއެމުން ބުންޏެވެ.
މީގެއިތުރުން، ކަރަންޓީނު ފެސިލިޓީތަކަށް ދިޔުމަކީ މިހާލަތުގައި އެންމެ އެދެވޭ ގޮތެއްކަމުގައި ކޮމިޝަނަށް ނުފެންނާތީ ފެސިލިޓީތަކަށް ޒިޔާރާތް ކުރުމުގެ ބަދަލުގައި، މި ފެސިލިޓީތަކާއި އެތަންތަނުގައި ބައިތިއްބާފައި ތިބި ފަރާތްތަކާ ގުޅޭ މައުލޫމާތު ހޯދުމަށް މި މަހުގެ ހަތް ވަނަ ދުވަހު ސިޓީއަކުން އެޗްޕީއޭގައި އެދިފައިވާ ކަމަށް އެ ކޮމިޝަނުން ބުންޏެވެ.
އެޗްއާރުސީއެމުން ކުއްލިގޮތަކަށް ހަރަކާތްތެރިވާން ފެށުމުން ގިނަ ބަޔެއްގެ ފާޑުކިޔުންތަށް އެ ކޮމިޝަނަށް ވަނީ އަމާޒުވެފަ އެވެ. އަދި ރައްޔިތުންގެ ސަލާމނަތާއި ރައްކާތެރިކަމަށްޓަކައި، ސަރުކާރުން ގިނަ ފިޔަވަޅުތަކެއް އަޅަމުންގެންދިކޮށް، ކުއްލިގޮތަށް އެ ކޮމިޝަނުން ތެދުވެ، ހަރަކާތްތެރިވާން ފެށުމުން ކޮމިޝަންގެ މަޤްސަދާއިމެދުވެސް ގިނަ ބަޔަކު ސުވާލު އުފައްދަ، ސޯޝަލް މީޑިއާގައި ކޮމިޝަނަށް ފާޑުކިޔުންތައް އަމާޒުކުރަމުންގެންދެ އެވެ. އެ ކޮމިޝަނަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ހިނގި ލާއިންސާނީ އެތައްކަމެއް ނުފެންނަކަމަށް ހެދިގެން އޮތް ކޮމިޝަނެކެވެ. މިދިޔަ އަހަރުތަކުގައި އެޗްއާރްސީއެމް އަށް ފުރިހަމަ ގޮތުގައި މަސްއޫލިއްޔަތު އަދާކުރެވިފައިނުވާ ކަމަށް ރައީސް އިބްރާހިމް މުހައްމަދު ސޯލިހުވެސް ވަނީ ވިދާޅުވެފައެވެ.
