ރައީސް ސޯލިހު ފަރުކޮޅުފުށީގެ ހާލަތު ބައްލަވައިފި
11 އެޕްރީލު 2020 | ހޮނިހިރު 15:02ކަރަންޓީނު ފެސިލިޓީގެ ގޮތުގައި ރިސޯޓްތައްވެސް ދަނީ ބޭނުން ކުރަމުން
ރައީސް ސޯލިހު ފަރުކޮޅުފުށި އަށް ކުރެއްވި ޒިޔާރަތުގެ ތެރެއިން
ސަރުކާރުން ފަރުކޮޅުފުށީގައި ގާއިމްކޮށްފައިވާ އައިސޮލޭޝަން ފެސިލިޓީ އަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ޒިޔާރަތް ކުރައްވައިފިއެވެ.
ހޮނިހިރު ދުވަހު ރައީސް ސޯލިހު އެ ފެސިލިޓީއަށް ކުރެއްވި ޒިޔާރަތުގައި އެމަނިކުފާނު ވަނީ އެތަންތަނުގެ މަސައްކަތްތައް ކުރިއަށްދާ ގޮތް ބައްލަވާލައްވާ، މައުލޫމާތު އޮޅުންފިލުއްވާފައެެވެ. ރައީސްގެ އަރިހުގައި ހެލްތް މިނިސްޓަރު އަބްދުﷲ އަމީނާއި، ޓޫރިޒަމް މިނިސްޓަރު އަލީ ވަހީދު އިތުރުން ޑިފެންސް މިނިސްޓަރު މާރިޔާ އަހުމަދު ދީދީ ބައިވެރިވެވަޑައިގެންނެވިއެވެ.
ފަރުކޮޅުފުށި ހާއްސަ ކޮށްފައިވަނީ ކޮވިޑް-19 ޖެހޭ މީހުންގެ ތެރެއިން ''ހައި ރިސްކު'' މީހުންނަށެވެ. އެ ރަށް ކަރަންޓީނު ފެސިލިޓީއެއްގެ ގޮތުގައި ހެދުމަށް 5.9 މިލިއަން ރުފިޔާ ހޭދަކޮށްފައިވާ ކަމަށް ސަރުކާރުން ވަނީ ހަމަކޮށްފައެވެ.
ރައީސް ސޯލިހު ވަނީ މީގެ ކުރިންވެސް ފަރުކޮޅުފުށިއަށް ޒިޔާރަތް ކުރައްވާފައެވެ. ކޮވިޑް-19 އާ ގުޅިގެން ރައީސް ވަނީ ގިނަ ވުޒާރާތަކެއް ހިމެނޭ ގޮތަށް ކޮވިޑް-19 ގެ ޓާސްކް ފޯހެއް އެކުލަވާލާފައެވެ. އެމަނިކުފާނު ގެންދަވަނީ މި ފަހަކަށް އައިސް ކޮންމެ ރެޔަކު ކަހަލަ ގޮތަކަށް ވަޒީރުންގެ މަޖިލީހުގެ ބައްދަލުވުން ބާއްވަމުންނެވެ.
ގައުމާ މުހާތަބު ކުރައްވާ ވާހަކަ ދައްކަވަމުން ރައީސް ސޯލިހު ވިދާޅުވެފައިވަނީ، ކޮވިޑް-19 އިން ސަލާމަތްވުމަށް ސަރުކާރުން ކުރަމުން އަންނަ މަސައްކަތުގައި ހުރިހާ އެންމެންގެ އެހީތެރިކަމާއި އެއްބާރުލުން ސަރުކާރަށް ބޭނުންވާ ކަމަށެވެ. އަދި އެކަމާއި ގުޅިގެން އެމަނިކުފާނު އަމަލުކުރައްވަމުން ގެންދަވަނީ ސިއްހީ މާހިރުންގެ ލަފާގެ މަތިން ކަމަށްވެސް ރައީސް ވަނީ ވިދާޅުވެެފައެވެ.
