ރައީސް ޔާމީން ގެއަށް ބަދަލުކޮށް، އިސްތިއުނާފް އަވަސްކޮށް ދިނުމަށް އިދިކޮޅުން ގޮވާލައިފި
އެއްބައިވަންތަކަމަށް އިސްކަންދިނުމަށް ވަނީ ގޮވާލާފައި
ކުރީގެ ރައީސް އަބްދުﷲ ޔާމީން
މަނީ ލޯންޑަރިންގެ ކުށް ސާބިތުވެ ފަސް އަހަރުގެ ޖަލު ހުކުމް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ މިހާރުން މިހާރަށް ގެއަށް ބަދަލުކޮށްދީ އެމަނިކުފާނުގެ އިސްތިއުނާފްގެ މައްސަލަ އަވަސްކޮށް ދިނުމަށް އިދިކޮޅު ޕީޕީއެމް/ޕީއެންސީ އިން ގޮވާލައިފިއެވެ.
ހުކުރު ދުވަހު އިދިކޮޅު ޕްރޮގްރެސިވް ކޯލިޝަނުން ނެރެފައިވާ ބަޔާނެއްގައި ބުނެފައިވަނީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ގެ ބިރު ރާއްޖޭގައިވެސް އޮތް މިދަނޑިވަޅުގައި ކުރީގެ ރައީސް ޔާމީން ފަރާތްޕުޅުން ހައިކޯޓުގައި އިސްތިއުނާފް ކުރައްވާފައިވާ މައްސަލަ ކުރިއަށް ނުގޮސް ދިގުލަމުން ދިއުމަކީ އެ ކޯލިޝަނުން އިންތިހާއަށް ކަންބޮޑުވާ މައްސަލައެއް ކަމަށެވެ.
އިދިކޮޅުން ބުނީ، ކޮވިޑް-19 އާ ގުޅިގެން ރައްޔިތުންގެ މަޖިލީހުގެ ޖަލްސާތަކާއި، ދަށު ކޯޓުތަކުގެ މައްސަލަތައްވެސް ވީޑިއޯ ކޮންފަރަންސިންގ އުސޫލުން ކުރިއަށް ގެންދެވޭއިރު ހައިކޯޓުގެ މައްސަލަތައްވެސް އެގޮތުގެ މަތިން ކުރިއަށް ގެންދެވެން ވާނެކަމަށް އެ ކޯލިޝަނުން ގަބޫލުކުރާ ކަމަށެވެ.
އެހެން ކަމުން ޔާމީނަށް ގާނޫނީ ގޮތުން ލިބިދޭންހޭ ކަފާލާތުގެ ހައްގު ދެވިފައި ނުވަނީ ހައިކޯޓުގައި އިސްތިއުނާފު ކުރެވިފައިވާ މައްސަލައިގައި ގޮތެއް ނިންމުމުގައި ލަސްތަކެއް ނުވާނެތީ ކަމަށް ބުނެފައިވާތީ އާއިއެކު، އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފް ކުރެވިފައިވާ މައްސަލަ އަވަސްކޮށްދެއްވުން އެދި ކަމާ ބެހޭ ފަރާތްތަކަށް ޕީޕިއެމް/ޕީއެންސީން ވަނީ ގޮވާލާފައެވެ.
މިފަދަ ދަނޑިވަޅެއްގައި ސިޔާސީ ހަސަދަވެރިކަމާއި ބަދަލު ހިފުމުގެ ރޫހު ކުރިއަށް ނެރުމުގެ ބަދަލުގައި އެއްބައިވަންތަކަމަށް އިސްކަންދިނުމަށާއި، ޔާމީން މިހާރަށް ގެއަށް ބަދަލުކޮށް ދިނުމަށް ޕްރޮގްރެސިވް ކޯލިޝަނުން ވަނީ ގޮވާލާފައެވެ.
