ރައީސް ސޯލިހުގެ މޭސްތިރިކަމުގައި ކޮވިޑް-19 އިން ރާއްޖެއަށް އަރައިގަނެވޭނެ: ޗައިނާ
ޗައިނާގެ ތަޖުރިބާ ރާއްޖެއާ ހިއްސާކުރާނެ
ހާރިޖީ ވަޒީރު އަބްދުﷲ ޝާހިދު ޗައިނާ އަށް ކުރެއްވި ދަތުރުފުޅުގައި ވަންގް ޔީ އާ އެކު
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ މޭސްތިރިކަމުގައި ކޮވިޑް-19 އިން ރާއްޖެއަށް އަރައިގަނެވޭނެ ކަމުގެ ފުރިހަމަ ޔަގީންކަން އެބައޮތް ކަމަށް ޗައިނާއިން ބުނެފިއެވެ.
ބުރާސްފަތި ދުވަހު ޗައިނާގެ ފޮރިން މިނިސްޓަރު ވަންގް ޔީ އަށް ފޯނުން ގުޅުއްވައި ހާރިޖީ ވަޒީރު އަބްދުﷲ ޝާހިދުއާ ވަނީ ވާހަކަފުޅު ދައްކަވާފައެވެ. ދެ ބޭފުޅުންގެ ދެމެދުގައި ކުރެވުނު މަޝްވަރާތަކުގައި ވަންގް ވިދާޅުވީ، ކޮވިޑް-19 އާ ގުޅިގެން ރާއްޖެއިން ބޭނުންވެއްޖެ ހާލަތެއްގައި އެހީތެރިކަން ފޯރުކޮށް ދިނުމަށް ޗައިނާއިން އޮތީ ތައްޔާރަށް ކަމަށެވެ. ބަލިމަޑުކަމާ ދެކޮޅަށް ކުރަމުންދާ ހަނގުރާމާގައި ޗައިނާ އޮތީ، އަބަދުވެސް އެހީތެރިކަން ފޯރުކޮށް ދިނުމަށް ތައްޔާރަށްކަން ފާހަގަކުރައްވަމުން ވަންގް ވިދާޅުވީ، އެ ގައުމުން މިހާތަނަށް 120 އަށް ވުރެ ގިނަ ގައުމުތަކަށް ބޭނުންވާ ސިއްހީ އާލަތްތައް ފޯރުކޮށްދީފައިވާ ކަމަށެވެ. ވަންގް ވަނީ ހުރިހާ ގައުމެއް އެކަތިގަނޑަކަށްވެގެން މަސައްކަތް ކުރުމުގެ މުހިއްމު ކަމުގެ މައްޗަށް އަލިއަޅުއްވާލާފައެވެ.
ކޮވިޑް-19 ކޮންޓްރޯލް ކުރުމުގެ ގޮތުން ރާއްޖެއިން އަޅާފައިވާ ފިޔަވަޅުތަކަށް ތައުރީފް ކުރައްވަމުން ޗައިނާގެ ހާރިޖީ ވަޒީރު ވިދާޅުވީ، ރައީސް އިބްރާހިމް މުހައްމަަދު ސޯލިހުގެ ލީޑަރޝިޕްގެ ދަށުން ރާއްޖެއިން ކޮވިޑް-19 އަރައިގަނެވޭނެ ކަމުގެ ފުރިހަމަ ޔަގީންކަން ޗައިނާ އަށް އެބައޮތް ކަމަށެވެ.
ޗައިނާ އިން ބުނީ، ކޮވިޑް-19 ކޮންޓްރޯލް ކުރުމަށް ޗައިނާގެ ތަޖުރިބާ ރާއްޖެއާ ހިއްސާކުރާނެ ކަމަށެވެ. ފޮރިން މިނިސްޓަރު ޝާހިދު ވަނީ ކޮވިޑް-19 އާ ދެކޮޅަށް ޗައިނާއިން އަޅާފައިވާ ފިޔަވަޅުތަކަށް ތައުރީފް ކުރައްވަފައެވެ.
