މީޑިއާނެޓުން "ޕީސް ޓީވީ" ބެލޭނެ ގޮތް އަލުން ހަމަޖައްސައިފި
ކުރިން ޗެނަލް މެދުކެނޑުނީ ޓެކްނިކަލް މައްސަލަތަކެއް ދިމާވުމުގެ ސަބަބުން
ޑރ ޒާކިރް ނައިކް- ޒާކިރް ނައިކަކީ 2006 ވަނަ އަހަރު އުފެއްދި ޕީސް ޓީވީގެ ފައުންޑަރ
ދީނީ ތަގުރީރުތަކުން މަޝްހޫރުކަން ހޯދި ޑރ. ޒާކިރު ނައިކް އުފެއްދި "ޕީސް ޓީވީ އިންގްލިޝް" މީޑިއާނެޓުގެ ޗެނަލްތަކުގެ ތެރޭގައި އަލުން ހިމަނައިފިއެވެ.
އެކަމާ ގުޅޭގޮތުން މީޑިއާނެޓުން އާންމުކުރި ބަޔާނެއްގައި ބުނީ، ކުރިން ޓެކްނިކަލް މައްސަލަތަކެއް ދިމާވުމުގެ ސަބަބުން މީޑިއާނެޓުގެ ކަސްޓަމަރުންނަށް މި ޗެނަލް ނުލިބުނު ނަމަވެސް، މީޑިއާނެޓުގެ ޓީމުން އެ މައްސަލަތައް ހައްލުކޮށްފައިވާ ކަމަށެވެ. އެގޮތުން "ޕީސް ޓީވީ އިންގްލިޝް" (ޗެނަލް 152) މިހާރު މީޑިއާނެޓުގެ ކޭބަލްތަކުންނާއި، ހިޓްސް، ހިޓްސް ޕްލަސް އަދި ކުޅުދުއްފުއްޓަށްވެސް ލިބޭނެ ކަމަށް ބުނެފައިވެއެވެ.
މީޑިއާނެޓުން ބުނީ، ޗެނަލް މެދުކެނޑިގެން ދިއުމުން އޭރު ބެލުންތެރިންނަށް ކުރިމަތިވި ދަތިތަކަށް އެ ކުންފުނިން ނިހާޔަތަށް މާފަށް އެދޭ ކަމަށެވެ. އަދި ކުރިއަށް އޮތް ތަނުގައިވެސް ބެލުންތެރިންގެ މެދުގައި މަޤްބޫލު ކޮންޓެންޓުތައް ގެނެސްދިނުމަށް މަސައްކަތް ކުރާނެ ކަމަށް ބަޔާނުގައި ބުނެފައިވެއެވެ.
2006 ވަނަ އަހަރު އުފެއްދި ޕީސް ޓީވީއަކީ ދީނީ ޕްރޮގްރާމްތަކާއި، މައުލޫމާތުތައް ގެނެސްދޭ ޗެނަލެކެވެ. އެގޮތުން މި ޗެނަލް މެދުވެރިކޮށް ޑރ. ޒާކިރު ނައިކުގެ ދަރުސްތައްވެސް ވަގުތުން ބަލާލުމުގެ ފުރުސަތު ލިބިގެންދެއެވެ. މި ޗެނަލް އޭޝިއާއާއި، ޔޫރަޕާއި، އެފްރިކާ އާއި އޮސްޓްރޭލިއާގެ އިތުރުން ދެކުނު އެމެރިކާގައި ވެސް ބްރޮޑްކާސްޓް ކުރެއެވެ.
