ޒަކާތު ފަންޑުން ކޮވިޑް-19އަށް އެހީވުމަށް ތިން މިލިއަން ރުފިޔާ ހަރަދުކޮށްފި
7 އެޕްރީލު 2020 | އަންގާރަ 16:20ރާއްޖެއިން ބޭރަށް ގޮސް ހާލުގައި ޖެހިފައި ތިބި ދިވެހިންނަށް އެހީވުމަށް މަސައްކަތްތަކެއް ކުރެވޭ
އިސްލާމިކް މިނިސްޓަރު ނައިބް ރައީސް ފައިސަލް ނަސީމް އަރިހުގައި
ކޮވިޑް-19އާ ގުޅިގެން ސަރުކާރުން ކުރަމުންދާ މަސައްކަތްތަކަށް އެހީވުމަށް ޒަކާތު ފަންޑުން ތިން މިލިއަން ރުފިޔާ ޚަރަދުކޮށްފައިވާ ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު ޢަލީ ވިދާޅުވެއްޖެއެވެ.
ހޯމަ ދުވަހުގެ ރާއްޖެޓީވީ ފަލަސުރުޚީ ޕްރޮގުރާމުގައި މިނިސްޓަރު ޒާހިރު ވިދާޅުވީ ޒަކާތުން މިހާރު ކަނޑައަޅާ ކަންތައްތަކެއް އެބަހުރި ކަމަށާއި، އެކަންތައްތަކަށް ޒަކާތު ފައިސާއިން ހަރަދުކުރެވޭނެ ކަމަށެވެ.
މިނިސްޓަރު ޒާހިރު ވިދާޅުވީ ކޮވިޑް-19އަކީ ބޮޑު ކާރިޘާއެއް ކަމަށާއި، ކޮވިޑް-19އާ ގުޅިގެން ރާއްޖެއިން ބޭރަށް ގޮސް ޙާލުގައި ޖެހިފައި ތިބި ދިވެހިންނަށް އެހީވުމަށް ސަރުކާރުން ބުރަ މަސައްކަތްތަކެއްކޮށް ގިނަ ފައިސާތަކެއް ޚަރަދުކުރާ ކަމަށެވެ. އެހެންކަމުން ސަރުކާރަށް އިތުރު ސަޕޯޓެއް ދިނުމަށްށާއި، އެފަރާތްތަކަށް އެހީވުމަށް ޒަކާތު ފައިސާއިން ތިން މިލިއަން ރުފިޔާ ޚަރަދުކޮށްފައިވާކަމަށް މިނިސްޓަރު ވިދާޅުވިއެވެ.
ޒަކާތު ކޮމެޓީ އެކުލަވާލާފައިވާ ގޮތަށް އަލިއަޅުއްވާލައްވާ މިނިސްޓަރު ޒާހިރު ވިދާޅުވީ ޒަކާތު ކޮމެޓީ އަލުން އެކުލަވާލާފައިވާއިރު، ޒަކާތުގެ ފައިސާ ރަނގަޅަށް ޚަރަދު ކުރުމަށް ޒަކާތުގެ އެޑްވައިޒަރީ ބޯޑެއް އެކުލަވާލާފައިވާ ކަމަށެވެ. އަދި ޒަކާތު އެޑްވައިޒަރީ ބޯޑު އެއީ ދީނީ ޢިލްމުވެރިން ތިއްބަވާ ކޮމެޓީއެއްކަން ވެސް މިނިސްޓަރު ފާހަގަކުރެއްވިއެވެ.
މިނިސްޓަރު ޒާހިރު ވިދާޅުވީ ޒަކާތު ކޮމެޓީގެ މައްޗަށް އޮންނަނީ އެޑްވައިޒަރީ ކޮމެޓީ ކަމަށާއި، ޒަކާތު ކޮމެޓީގެ ދަށަށް އޮންނާނީ ޒަކާތު ބޭސްފަރުވާ ކޮމެޓީއާ ޒަކާތު ސްކޮލަރޝިޕް ކޮމެޓީ ކަމަށެވެ. އަދި ކޮންމެ ކޮމެޓީއަކުން ކުރާނީ އެކޮމެޓީއަކާ ގުޅުން ހުންނަ މަސައްކަތެއް ކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ޒާހިރު ވިދާޅުވީ ޒަކާތު ފައިސާއިން ޚަރަދުކުރަން ނުޖެހޭ ކަމަކަށް ފަންޑުގެ ފައިސާ ޚަރަދުކޮށްފައިނުވާ ކަމަށާއި، މަސައްކަތްތައް ކުރިއަށްދަނީ ތަރުތީބުން ކަމަށެވެ. އަދި ޒަކާތު ފަންޑުން ޚަރަދުކުރަނީ ޙައްޤު ފަރާތްތަކަށް ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ޒާހިރު ވިދާޅުވީ ބޭސްފަރުވާއަށް އެދުނު ކަމުގައި ވިޔަސް ހަފުތާއެއްގެ ތެރޭގައި ހަމަޖެހިގެންދާނެ ކަމަށެވެ. އެގޮތުން ޒަކާތު ބޭސްފަރުވާއަށް ފާއިތުވި އަހަރު 16 މިލިއަން ރުފިޔާ ޚަރަދުކޮށްފައިވާ ކަމަށް މިނިސްޓަރު ވިދާޅުވިއެވެ.
