ޖަރުމަން ލީގުގެ ބައެއް ކްލަބުތަކުން ފަރިތަކުރުންތައް ފަށައިފި އެވެ.

މުޅި ދުނިޔޭގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ޖަރުމަން ލީގުގެ މެޗުތައް ވަނީ އޭޕްރީލް 30 ގެ ނިޔަލަށް ފަސްކުރުމަށް ނިންމާފައެވެ. ޖަރުމަން ކްލަބުތަކަށް ފަރިތަކުރުންތައް ކުރިއަށް ގެންދަން މިހާތު ހުއްދަ ދީފައިވާއިރު، އެންމެ ފަހުގެ ޗެމްޕިއަން ބަޔާން މިއުނިކާއި، ބޮރޫޝިއާ މޮންޗެގްލަޑްބަކާއި ވުލްފްސްބާގުން ވަނީ ހޯމަ ދުވަހު ފަރިތަކުރުންތައް ކުރިއަށް ގެންގޮސްފައެވެ.

މި ތިން ކްލަބުންވެސް ފަރިތަކުރުންތައް ކުރިއަށް ގެންގޮސްފައިވަނީ ކުޅުންތެރިން ގައިގޯޅި ނުވާގޮތަށެވެ. އެގޮތުން ބަޔާންގެ ފަރިތަކުރުންތައް ކުރިއަށް ގެންގޮސްފައިވަނީ 5 ކުޅުންތެރިން ވަކިން ގްރޫޕް ހަދައިގެން ގައިގޯޅި ނުވާ ގޮތަށެވެ.

ބަޔާންގެ ކެޕްޓަން މެނުއަލް ނޯޔާ ބުނީ ގިނަ ދުވަސްތަކަކަށްފަހު ފަރިތަކުރުންތައް ކުރިއަށް ގެންދަން ފުރުސަތު ލިބުމުން ކުޅުންތެރިން ތިބީ ވަރަށް ބޮޑަށް ހިތްހަމަޖެހިފައި ކަމަށެވެ.

ކޮވިޑް-19 ގެ ސަބަބުން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، ގިނަ ކްލަބުތަކަކަށް ވަނީ މާލީ ގޮތުން ގޮންޖެހުންތަކާ ކުރިމަތިލާން ޖެހިފައެވެ.

މާލީ ގޮތުން ކުރިމަތިވާނެ ގޮންޖެހުންތަކުން ސަލާމަތްވުމަށް މީގެ ކުރިން ޖަރުމަނުގެ ބޮރޫޝިއާ މޮންޗެންގްލަޑްބެކް އާއި ޔޫނިއަން ބާލިންގެ ކުޅުންތެރިން ވަނީ މުސާރަ އެއްވެސް ގޮތަކަށް ނުނެގުމަށް ނިންމާފައެވެ. އަދި ޖަރުމަނުގެ އެންމެ ބޮޑު އެއް ކްލަބު ކަމަށްވާ ބަޔާން މިޔުނިކުން ވަނީ އެޓީމުގެ ކުޅުންތެރިންނާއި އޮފިޝަލުންގެ މުސާރައިން 20 އިންސައްތަ އުނިކުރަން ނިންމާފައެވެ. އަދި ބޮރޫޝިއާ ޑޯޓްމުންޑުގެ ކުޅުންތެރިން ވަނީ އެ ކުޅުންތެރިންގެ މުސާރަ ދެބައިކުޅަ އެއްބަޔަށް ކުޑަކުރަން ނިންމާފައެވެ.