ދަތުރުވެރިންގެ ކްލިނިކް، ފްލޫ ކްލިނިކަކަށް ބަދަލުކޮށްފި
ކްލިނިކުން ބިދޭސީންނަށްވެސް ހިދުމަތް ދެވޭނެ
ދަތުރުވެރިންގެ ކްލިނިކް
ކޮވިޑް-19 އާއި ގުޅިގެން މާލޭ ހިޔާ ދޭއްގެ ފުރަގަހުގައި ގާއިމްކޮށްފަިއވާ ދަތުރުވެރިންގެ ކްލިނިކް، ފްލޫ ކްލިނިކަކަށް ބަދަލުކޮށްދފިއެވެ.
މިކަމާއި ގުޅިގެން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްޗް) އިން ނެރެފައިވާ ބަޔާނެއްގައި ބުނެފަިއވަނީ، ކޮވިޑް-19 އާއި ގުޅިގެން މާލޭ ހިޔާ 2ގެ ފުރަގަހުގައި ކުރިއަށްގެންދިޔަ ދަތުރުވެރިންގެ ކްލިނިކް 4 އޭޕްރީލް 2020 ވަނަ ދުވަހުން ފެށިގެން ފްލޫ ކްލިނިކަކަށް ބަދަލު ކުރެވިފައިވާކަމަށެވެ. އަދި ކްލިނިކްގެ ޚިދުމަތްތައް ކުރިއަށް ދާނީ ކޮންމެ ދުވަހެއްގެވެސް ހެނދުނު 10:00 ން ރޭގަނޑޫ 22:00 އަށްކަމަށާއި ކްލިނިކަށް ދިވެހިންގެ އިތުރުން ބިދޭސީންވެސް ދެއްކޭނެ އިންތިޒާމް ވަނީ ހަމަޖެހިފައިވާކަމަށެވެ.
ވީމާ، ހުން އައިސް ކެއްސާނަމަ ނުވަތަ ރޯގާގެ ޢަލާމާތެއް ހުރިނަމަ، ހޮސްޕިޓަލަށް ދުރުވުމުގެބަދަލުގައި، މި ކްލިނިކަށް ދުރުވެ ޑޮކްޓަރަށް ދެއްކެވުން އެދޭކަމަށް ބަޔާނުގައިވެއެވެ.
ކޮވިޑް-19 ރާއްޖެއިން ފެނުމާއި ގުޅިގެން ސަރުކާރުގެ ފަރާތުން މާލެ ސަރަހައްދުގައި ބިދޭސީންނަށް ހާއްސަ ކްލިނިކަކާއި، ސެނެހިޔާގައި ފްލޫކިލިނަކާއި ރާއްޖެއިން ބޭރަށް ދަތުރުކޮށް، 14 ދުވަހުގެ ޓްރެވަލް ހިސްޓްރީއެއް އޮތް ފަރާތްތަކުގެ ތެރެއިން ކޯވިޑް-19 އަށް ޝައްކުކުރެވޭ ޢަލާމާތެއް ނުވަތަ ހުމާ ރޯގާގެ އަލާމާތެއް ހުރި ފަރާތްތައް ޑޮކްޓަރަށް ދެއްކުމަށް މާލެ ހިޔާ ސަރަހައްދުގައި ވަނީ ޓްރެވެލާރސް ކްލިނިކެއް ގާއިމްކޮށްފައެވެ.
ބަލި ފެތުރިޔަނުދީ ކޮންޓްރޯލް ކުރުމަށްޓަކައި އެޅި ފިޔަވަޅުތަކުގެ ތެރޭގައި، ރާއްޖެއަށް ފަތުރުވެރިން އައުން މެދުކަނޑާލުމަށް ނިންމުމާއި، ރާއްޖެއިން ބޭރުން ދަތުރުކޮށްފައި އަންނަ ހުރިހާ ދިވެހިންވެސް ކަރަންޓީން މުއްދަތެއް ފުރިހަމަ ކުރުމަށް ނިންމާފައިވުމާއި ގުޅިގެން، ޓްރެވަލާސް ކްލިނިކުން ފަރުވާ ހޯދާ މީހުންގެ އަދަދުތައް އެއްކޮށް މަޑުޖެހުމަކަށް އައިސްފައިވެއެވެ.
