ސްވައިން ފްލޫގައި އެކަކު މަރުވެ، ބައްޔަށް 51 މީހުން ޕޮޒިޓިވް ވުމާއެކު ރާއްޖޭގެ ހުރިހާ ސްކޫލްތައް ބަންދު
ބަލީގައި އެކަކު ވަނީ މަރުވެފައި
އެޗް1އެން1 އިންފްލުއެންޒާ އާއި ގުޅިގެން ސިއްހީ އިދާރާތަކުން ބޭއްވި ޕްެރެސް
ސްވައިން ފްލޫގައި އެކަކު މަރުވެ، މި ބައްޔަށް 51 މީހުން ޕޮޒިޓިވް ވުމާއެކު ރާއްޖޭގެ ހުރިހާ ސްކޫލްތައް ބަންދުކޮށްފިއެވެ.
ސިއްހީ އިދާރާތައް ގުޅިގެން ހޯމަ ދުވަހުގެ ރޭ ބޭއްވި ނޫސްކޮންފަރެއްސެއްގައި ވިދާޅުވީ، ސްވައިން ފްލޫ ބަލީގައި މިހާތަނަށް އެކަކު މަރުވެފައިވާކަމަށެވެ. މިމަހުގެ 4 ވަނަ ދުވަހު މަރުވެފައިވަނީ، 26 އަހަރުގެ ދިވެހި ފިރިހެނެކެވެ. އެޗް1އެން1އަށް ޓެސްޓްކުރި 251 މީހުންގެ ތެރެއިން 51 މީހުން ޕޮޒިޓިވް ވެފައިވާކަމަށް ސިއްހީ އިދާރާތަކުން ވަނީ ހާމަކޮށްފައެވެ.
ހެލްތް ޕްރޮޓެކްޝަން އެޖެންސީން ބުނީ، ސްކޫލްތައް ބަންދުކުރަން ލަފާދިނީ ބަލި އިތުރަށް ފެތުރުން ކޮންޓްރޯލްކުރުމުގެ ގޮތުން ރައްކާތެރިކުރުމަށް އެޅި ފިޔަވަޅެއްގެ ގޮތުން ކަމަށެވެ. އެޗްޕީއޭއިން އެގޮތަށް ލަފާދިނުމާއި ގުޅިގެން، ނޫސްވެރިންނަށް މައުލޫމާތުދެއްވަމުން އެޑިއުކޭޝަން މިނިސްޓްރީގެ އޮފިޝަލް ވިދާޅުވީ ސުކޫލްތައް ބަންދުކުރުމަށް ނިންމާފައިވާ ކަމަށެވެ. އަދި ކުރިއަށް އޮތް ތިން ދުވަހު ސްކޫލްތައް ބަންދުވާނެކަމަށް އޮފިޝަލް ވިދާޅުވި އެވެ. ބަންދުކުރަން ނިންމާފައިވަނީ ޕްރީ ސްކޫލުން ފެށިގެން ގްރޭޑް 12 އާއި ހަމައަށް ކިޔަވައިދޭ ހުރިހާ ސްކޫލްތަކެއް ކަމަށްވެސް އޮފިޝަލް ވިދާޅުވި އެވެ. އޭނާ ވިދާޅުވީ ކުރިއަށް އޮތް މިޑްޓާމް ބަންދުނިމޭއިރު، ވައިރަސް ފެތުރޭ މިންވަރަށް ބެލުމަށްފަހު ނިންމުންތައް ނިންމާނެކަމަށެވެ.
މި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން، ކުޑަކުދިންގެ ޚާއްޞަ ޑޮކްޓަރު ޑރ. ޢަބްދުﷲ ނިޔާފް ވިދާޅުވީ މިހާރުވެސް 70 މީހުންގެ ސާމްޕަލް ދަނީ ޓެސްޓްކުރެވެމުން ކަމަށާއި އެއިގެ ތެރެއިން ވެސް އިތުރަށް ޕޮޒިޓިވް ވާނެ ކަމަށް ބެލެވޭކަމަށެވެ. އަދި ދުވަސްކޮޅެއް ވަންދެން ދާނީ އިތުރުވަމުން ކަމަށް ޑރ.ނިޔާފް ވިދާޅުވިއެވެ ޑރ. ނިޔާފް ވިދާޅުވީ ހދ.ކުޅުދުއްފުށިން ވެސް މި ބައްޔަށް އެކަކު ޕޮޒިޓިވްވެފައިވާ ކަމަށެވެ. އަދި މިބަލީގައި އެކަކު މަރުވެފައިވާ އިރު، ރ. އަތޮޅުގައި ވަރަށް ބޮޑަށް ހުމުގެ ރޯގާއެއް ފެތުރެމުންދާކމަށެވެ. އަދި އެ އަތޮޅުން ސާމްޕަލްތައް ގެންނަމުންދާކަމަށް ނިޔާފް ވިދާޅިވިއެވެ.
ސްވައިން ފްލޫއިން ދިފާއުވުމަށް ބޭނުންވާ ވެކްސިން ރާއްޖެއިން ލިބެން ހުރިނަމަވެސް ހުރީ ވަރަށް މަދުންކަން ހާމަކުރައްވަމުން ނިޔާފް ވިދާޅުވީ، މިކަމަށް ބޭނުންވާ ވެކްސިނަކީ ބޭނުންހައި ވަރަކަށް ލިބޭ ވެކްސިނެއް ނޫން ކަމަށެވެ. އެހެންކަމާއިއެކުވެސް ޑަބްލިޔޫއެޗްއޯ އާއި އެކުވެރި ޤައުމުތަކާއި ގުޅިގެން ވެކްސިން ހޯދަން އެޗްޕީއޭ އިން މިހާރުވެސް ގެންދަނީ މަސައްކަތްކުރަމުން ކަމަށް އޭނާ ވިދާޅުވިއެވެ. ޑރ. ނިޔާފް ވިދާޅުވީ ވެކްސިން ލިބޭވަރަކުން އިސްކަން ދެއްވާނީ ބަލިޖެހުމުގެ ނުރައްކާ އޮތް މީހުންނަށް ވެކްސިން ޖެހުމަށް ކަމަށެވެ.
ސްވައިން ފްލޫ ބަލީގެ ފުރަތަމަ ކޭސް ޖެނުއަރީ މަހު ފެނި މާޗްމަހުގެ ތެރޭގައި އިތުރަށް މި ބަލި ފެތުރި އެކަކު މަރުވެފައިވާއިރު، ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި އައިޖީއެމްއެޗް އަދި އޭޑީކޭ ހޮސްޕީޓަލް ގުޅިގެން ހޯމަ ދުވަހުގެ ހެނދުނު ބޭއްވި ނޫސްވެރިންގެ ބައްދަލުވުމުގައި ވިދާޅުވީ، ރާއްޖޭގެ އެކި ސަރަހައްދުތަކުގައި ބާރު ސްޕީޑުގައި ހުމާއި ރޯގާ ފެތުރި، އެޗް1އެން1 އަށް ބައެއް މީހުން ޕޮޒިޓިވްވެފައިވީ ނަމަވެސް، ބިރުގަންނަންޖެހޭ ހާލަތަކަށް ނުދާ ކަމަށެވެ. އަދި މިއަހަރުގެ މިހާތަނަށް ޓެސްޓްކުރެވުނު 208 މީހެއްގެ ތެރެއިން މި ބައްޔަށް ޕޮޒިޓިވް ވެފައިވަނީ، 27 މީހަކު ކަމަށެވެ. އެހެންނަމަވެސް އެހެން ވިދާޅުވިތާ 12 ގަޑިއިރު ނުވަނީސް ބޭއްވި ޕްރެސް ގައި ވިދާޅުވީ، 251 މީހުންގެ ތެރެއިން 51 މީހުން ޕޮޒިޓިވް ސްވައިން ފްލޫއަށް ޕޮޒިޓިވް ވެފައިވާކަމަށެވެ.
ބަލި ފެތުރެމުންދާ މިންވަރަށް ބަލައި ނުރައްކާ ބޮޑުވެ، އެލާޓްލެވަލް 3 ހެލްތްމިނިސްޓްރީން ހޯމަދުވެހުގެ ރޭ ވަނީ ވަނީ އިއުލާނުކޮށްފައެވެ.
މާލޭގައި ރޯގާ ފެތުރެމުންދާ މިންވަރަށް ބަލައި ބައެއް ޑޮކްޓަރުން ގެންދަވަނީ އިތުރުފިޔަވަޅުތައް އެޅުމަށް ގޮވާލައްވަމުންނެވެ. އެގޮތުން އެއްތަނަކަށް ގިނަ މީހުން އެއްވެ އުޅުން މަނާކުރުމާއި ޢާންމު އެއްވުންތައް ބޭއްވުން ހުއްޓާލުމަށް ބައެއް ޑޮކްޓަރުން ވަނީ ގޮވާލައްވައިފައެވެ.
މި ބައްޔަށް ރައްޔިތުން އިތުރަށް ހޭލުންތެރިވެ ތިބުމަށާއި، އަލާމާތްތައް ފެނިއެްޖެނަމަ ލަސްނުކޮށް އަވަހަށް ޑޮކްޓަރަށް ދެއްކުމަށްވެސް ސިއްހީ އިދާރާތަކުން އިލްތިމާސްކުރެއެވެ.
