ކޮވިޑް-19: ދިވެހިން ގެނައުމަށް ލަންކާ އަދި ކޮޗިންއަށް މޯލްޑިވިއަންގެ ފްލައިޓެއް ހަމަޖައްސައިފި

ކޮވިޑް-19 އާ ގުޅިގެން ރާއްޖެ ނާދެވިފައި ތިބި ދިވެހިން، ޚާއްޞަކޮށް ޤައުމީ އެއަރލައިން މޯލްޑިވިއަންގެ ދަތުރުތަކެއް ސްރީލަންކާ އަދި އިންޑިއާގެ ކޮޗިންއަށް ކުރުމަށް ހަމަޖައްސައިފިއެވެ.

ހޮނިހިރު ދުވަހު މޯލްޑިވިއަނުން ބުނީ އާދިއްތަ އަދި ހޯމަ ދުވަހު ސްރީ ލަންކާއާ އިންޑިއާގެ ކޮޗިންއަށް ދަތުރުތަކެއް ކުރުމަށް ނިންމާފައިވާ ކަމަށެވެ. އަދި ސްރީ ލަންކާއަށް ދެ ދަތުރު ކުރުމަށް ނިންމާފައިވާއިރު، ކޮޗިންއަށް އެއް ދަތުރު ކުރުމަށް ވަނީ ނިންމާފައެވެ.

Advertisement

އެގޮތުން އާދިއްތަ ދުވަހު މޯލްޑިވިއަންގެ ފުރަތަމަ ފްލައިޓް ސްރީ ލަންކާއަށްދާނީ 17:40 ގައެވެ. އަދި ސްރީ ލަންކާއިން ރާއްޖެ އައުމަށް ފުރާނީ 18:40 ގައެވެ. އެ ފްލައިޓް ވެލާނާ އިންޓަނޭޝަނަލް އެއަރޕޯޓުގައި ޖައްސާނީ 20:20 ގައެވެ. ދެވަނަ ފްލައިޓް ސްރީ ލަންކާއަށްދާނީ އާދިއްތަ ދުވަހުގެ ހަވީރު 17:55 ގައެވެ. އަދި ސްރީ ލަންކާއިން ރާއްޖެ އައުމަށް 18:55ގައި ފުރާއިރު، ވެލާނާ އިންޓަނޭޝަނަލް އެއަަރޕޯޓަށް ޖައްސާނީ 20:35 ގައެވެ.

މޯލްޑިވިއަނުން ޢާންމުކޮށްފައިވާ ދަތުރުތަކުގެ ތާވަލަށް ބަލާއިރު، ކޮޗިންއަށް ކުރުމަށް ހަމަޖެހިފައިވާ ދަތުރު އޮންނާނީ ހޯމަ ދުވަހުއެވެ. މޯލްޑިވިއަންގެ ފްލައިޓް ހޯމަ ދުވަހުގެ 18:00ގައި ކޮޗިންއަށް ދެވޭއިރު، ރާއްޖެ އައުމަށް ފުރާނީ 19:00 ގައެވެ.

މޯލްޑިވިއަނުން ބުނީ އެ ދަތުރުތަކުގައި ރާއްޖެ އަންނަން ބޭނުންވާ މީހުން ޕާސްޕޯޓު ކޮޕީއާއި، ނަމާއި، ގުޅޭނެ ނަންބަރުގެ މަޢުލޫމާތު އެ އެއަރލައިންގެ ވައިބަރއަށް ފޮނުވާ ދިނުމަށް އެދޭ ކަމަށެވެ.

މޯލްޑިވިއަންގެ ޚާއްޞަ ދަތުރުތަކެއް ސްރީ ލަންކާ އަދި އިންޑިއާގެ ކޮޗިންއަށް ކުރުމަށް ހަމަޖައްސާފައިމިވަނީ އެދެޤައުމުގައި ގިނަ ދިވެހިންތަކެއް ރާއްޖެއަށް ނާދެވި ބަންދުވެފައިވަނިކޮށްނެވެ. ކޮވިޑް-19 އާ ގުޅިގެން އިންޑިއާ އަދި ސްރީ ލަންކާއިން ވެސް ބޭރުގެ ހުރިހާ ދަތުރުތަކެއް ހުއްޓާލާ ކާފިއު އިޢުލާނުކޮށްފައެވެ. މިކަމުގެ ސަބަބުން އިންޑިއާ އަދި ސްރީ ލަންކާގައި ދިރިއުޅޭ ބައެއް ދިވެހިންނަށް ގިނަ ދަތިތަކާ ކުރިމަތިވާ ކަމަށް އެފަރާތްތަކުން ބުނެއެވެ.

އިންޑިއާ އަދި ސްރީ ލަންކާގައި ގިނަ ދިވެހިން ދިރިއުޅެމުން ދިޔަ ނަމަވެސް އެހެން ޤައުމުތަކުގައި ވެސް މަތީ ތަޢުލީމު ޙާޞިލުކުރަމުންދާ ދަރިވަރުންނާއި، ދިރިއުޅެމުންދާ ބައެއް ޢާއިލާތައް ރާއްޖެ އަންނަން ބޭނުންވެ ވަނީ އާދެވޭ ގޮތް ވަނީ ނުވެފައެވެ. އޭގެ ތެރޭގައި މެލޭޝިޔާ، އިންޑޮނޭޝިއާ، ޕާކިސްތާން، ބަންގްލަދޭޝް، ނޭޕާލް ފަދަ ޤައުމުތައް ހިމެނެއެވެ.