މާޗް މަހުގެ 14-19 އާ ދެމެދު ޔޫކޭއިން އައި މީހުން ކޮވިޑް-19 އަށް ޓެސްޓުކުރަނީ
50 ވަރަކަށް މީހުން އައިސްފައިވޭ: މަބްރޫކް
އިނގިރޭސިވިލާތުގެ ވެރިރަށް ލަންޑަންގެ ގޭޓްވިކް އެއާޕޯޓް
މާޗް މަހުގެ 14 ވަނަ ދުވަހާއި 19 ވަނަ ދުވަހާ ދެމެދު އިނގިރޭސިވިލާތުން ރާއްޖެ އައި ދިވެހިން ސްކްރީނިންކޮށް ކޮވިޑް-19 އަށް ޓެސްޓު ހަދަން ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) އިން ނިންމައިފިއެވެ.
އިނގިރޭސިވިލާތުން ރާއްޖެ އައި ތިން ދިވެއްސަކު ވަނީ ކޮވިޑް-19 އަށް ޕޮޒިޓިވްވެފައެވެ. އެ އެންމެންވެސް ބައްޔަށް ޕޮޒިޓިވްވެވެފަައިވަނީ ކަރަންޓީނުގައި ތިއްބާއެވެ.
އަންގާރަ ދުވަހު އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ގެ ޓާސްކްފޯސްގެ ތަރުޖަމާނު މަބްރޫކް އަޒީޒް ވިދާޅުވީ، މި މަހުގެ 14 އާއި 19 އާ ދެމެދު އިނިގިރޭސިވިލާތުން އައި އެންމެންގެ ކޮންޓެކްޓް ޓްރޭސިންނާ, އެމީހުންގ ޓެސްޓްތައް ހެދުމަށް ޓެކްނިކަލް އެެޑްވައިޒަރީ ގްރޫޕުގެ ނިންމާފައިވާ ކަމަށެވެ.
މަބްރޫކް ވިދާޅުވީ، އެ މުއްދަތު ތެރޭގައި 50 އެއްހާ މީހުން ރާއްޖެ އައިސްފައިވާ ކަމަށެވެ. އެންއީއޯސީން ބުނީ، އެ އެންމެންގެ ކޮންޓެކްޓް ޓްރޭސިން ހަދަނީ ''ކޮމިއުނިޓީ ސްޕެރަޑަށް'' ދިޔުމުގެ ފުރުސަތު ނުދިޔުމަށް ކަމަށެވެ.
ކޮވިޑް-19 ފެތުރުނަ ނުދިނުމަށްޓަކައި އަޅާ ފިޔަވަޅެއްގެ ގޮތުން އިނގިރޭސިވިލާތުން ރާއްޖެއައުން މަނާކޮށްފައިވަނީ މާޗް މަހުގެ 19 ވަނަ ދުވަހުން ފެށިގެންގެންނެވެ.
ރާއްޖެއިން ކޮވިޑް-19 އަށް 18 މީހަކު ވަނީ ޕޮޒިޓިވްވެފައެެވެ. އޭގެ ތެރެއިން 13 މީހަކު ވަނީ ބަލިން ރަނގަޅުވެފައެވެ.
