އާސެނާއަށް ނަން ބަދަލުކޮށް ހާއްސަ ޑޮކިއުމެންޓްރީއެއް ދައްކާލައިފި

މެޗަކުން ބަލިނުވެ 2003-2004 ވަނަ އަހަރުގެ ސީޒަނުގެ އިނގިރޭސި ޕްރިމިއާ ލީގުގެ ޗެމްޕިއަން އާސެނަލުން، އެޓީމުގެ ނަން އާސެނާ އަށް ވަގުތީ ގޮތުން ބަދަލުކޮށް އެ ސީޒަންގެ ކާމިޔާބާއި ގުޅޭ ހާއްސަ ޑޮކިއުމެންޓްރީއެއް ދައްކާލައިފިއެވެ.

އާސެނަލްގެ ކުރީގެ ކޯޗު އާސެން ވެންގާގެ ކޯޗު ކަމުގެ ދަށުގައި ކުޅުނު 38 މެޗުން ބަލިނުވެ ހޯދި ކާމިޔާބީއަކީ މިހާތަނަށް ޕްރިމިއާ ލީގުގެ އެހެން އެއްވެސް ޓީމަކަށް ހޯދިފައިނުވާ ބޮޑު ކާމިޔާބީއެކެވެ. އެ ސީޒަނުގައި އިނގިރޭސި މީޑިއާތަކުން އާސެނަލްގެ ޓީމު ސިފަކޮށްފައިވަނީ "އިންވިސިބަލްސް" ގެ ގޮތުގައެވެ.

އާސެނަލުން ބުނީ އެ ސީޒަނުގެ ކާމިޔާބީއާ ބެހޭ ހާއްސަ ޑޮކިއުމެންޓްރީއެއް ދައްކާލީ ކޮވިޑް-19 އާއި ގުޅިގެން އެންމެން ގޭގައި ތިބި ދުވަސްވަރަކަށް ވުމާއިއެކު، ޕްރިމިއާ ލީގުގެ މެޗުތައް މެދުކަނޑައިލާފައި ވުމުން އެ ކްލަބުގެ ފޭނުންނަށް ދިން ހަދިޔާއެއްގެ ގޮތުން ކަމަށެވެ.

އާސެނަލުން ވަނީ ޑޮކުއުމެންޓްރީ ދެއްކުމުގެ ކުރިން އެޓީމުގެ ޓްވިޓާ އެކައުންޓުގެ ނަން އާސެނާ އަށް ބަދަލުކޮށްފައެވެ. އެހެން ނަމަވެސް އެޓީމުގެ ނަން އާސެނާއަށް ވަގުތީ ގޮތުން ބަދަލުކުރި ސަބަބެއް އެ ކްލަބުން ހާމަކޮށްފައި ނުވެއެވެ. ގިނަ މީހުން ދެކޭ ގޮތުގައި އާސެނަލުން އެޓީމުގެ ނަމުގެ ފަހަތުގައި އިންނަ "އެލް" އަކުރު އުނިކޮށް އާސެނާ އަށް ވަގުތީ ގޮތުން ބަދަލުކުރީ އެ ސީޒަނުގައި ކުޅުނު އެއްވެސް މެޗަކުން އެޓީމު ބަލިވެފައި ނުވުމުންނެވެ.

ލީގު މެޗަކުން ބަލިނުވެ ހަމައެކަނި ކާމިޔާބުކުރި ޓީމުގެ ޝަރަފު އާސެނަލުން އެ ސީޒަނުގައި ހޯދު ކުޅުނު 38 މެޗުން 26 މެޗު ކާމިޔާބުކޮށް 12 މެޗު އެއްވަރުކޮށްގެނެވެ.