ޗައިނާއިން ވަމުން ގެންދާ އެހީއަށް ޖޮކޮވިޗް ޝުކުރުއަދާކޮށްފި

ދުނިޔޭގެ އެކި ކަންކޮޅުތަކުގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) އާއި ދެކޮޅަށް ޗައިނާއިން ވަމުން ގެންދާ އެހީއަށް ދުނިޔޭގެ އެއްވަނަ ޓެނިސް ކުޅުންތެރިޔާ ނޮވަކް ޖޮކޮވިޗް ޝުކުރުއަދާކޮށްފި އެވެ.

ޗައިނާގެ ވޫހާން ސިޓީއިން މިދިޔަ ޑިސެމްބަރު މަހު ފެނުނު ކޮވިޑް-19 އާ ދެކޮޅަށް ޗައިނާއިން އަންނަނީ ވަރުގަދަ ހަނގުރާމައެއް ކުރަމުންނެވެ. އެގައުމުން މިވައިރަސް މިހާރު ކޮންޓްރޯލް ވެފައިވާއިރު، ޗައިނާއިން އަންނަނީ ވައިރަހާއި ދެކޮޅަށް ދުނިޔޭގެ އެކި ގައުމުތަކަށް އެހީތެރިކަން ފޯރުކޮށްދެމުންނެވެ. އޭގެ ތެރޭގައި ޖޮކޮވިޗް އުފަން ސާބިއާއަށް ވެސް ޗައިނާއިން އަންނަނީ އެހީތެރިކަން ފޯރުކޮށްދެމުންނެވެ.

ސާބިއާ އިން މިހާތަނަށް ކޮވިޑް-19 500 އަށް ވުރެ ގިނަ މީހުން ޕޮޒިޓިވްވެފައިވާއިރު، މި ހަފްތާގައި މި އަދަދު ދެ ގުނައަށް އިތުރުވެދާނެ ކަމުގެ ބިރު އެބައޮތް ކަމަށް ސާބިއާގެ ސިއްހީ އިދާރާތަކުން ލަފާކުރެއެވެ. ސާބިއާއަށް އެހީވުމަށް ޗައިނާއިން ވަނީ މެޑިކަލް ސާމާނާއިއެކު ޑޮކްޓަރުންގެ ޓީމެއް އެގައުމަށް ފޮނުވައިފައެވެ.

ޗައިނާއިން ވަމުން ގެންދާ އެހީއާއި މެދު ޖޮކޮވިޗް ބުނީ އޭނާގެ ހިތުގެ އެންމެ އަޑިން އެކަމަށް ޝުކުރުއަދާކުރާ ކަމަށާއި، ޗައިނާއިން ވަމުން ގެންދާ އެހީ ސާބިއާއިން ދުވަހަކުވެސް ހަނދާން ނައްތައިނުލާނެ ކަމަށެވެ. އަދި ޗައިނާއިން ވަމުން ގެންދާ އެހީއަށް ދުނިޔޭގެ ގައުމުތަކުން ޝުކުރުއަދާ ކުރަން ޖެހޭ ކަމަށް ޖޮކޮވިޗް ބުންޏެވެ.

ޓެނިހުގެ ހުރިހާ ހަރަކާތެއް ޖޫން މަހުގެ ހަތް ވަނަ ދުވަހުގެ ނިޔަލަށް ވަނީ ފަސްކޮށްފައެވެ. އަދި އެ މުއްދަތުގައި ވެސް ފެށޭނެ ކަމުގެ ޔަގީންކަން ނެތް ކަމަށް ދުނިޔޭގެ ޓެނިހުގެ ފެޑަރޭޝަނުން ބުނެއެވެ.

ސާބިއާއިން ކޮވިޑް-19 އެ ގައުމުގައި ފެތުރުމާއި ދެކޮޅަށް ކުރާ މަސައްކަތުގައި އެހީވުމަށް ޖޮކޮވިޗް ވަނީ 1.1 މިލިއަން ޑޮލަރު ހަދިޔާކޮށްފައެވެ.