ކޮވިޑް-19: 24 ގަޑިއިރު މުދާ އުފުލާ އުޅަނދުތައް ބުރިޖުން ދަތުރުކުރުމުގެ ހުއްދަ ދީފި
30 މާރިޗު 2020 | ހޯމަ 07:05ސްކޫލުތައް ހުޅުވުމާ ހަމައަށް މިއުސޫލަށް އަމަލުކުރެވޭނެ
ސިނަމާލެ ބްރިޖް
މާލެއާ ހުޅުލެއާ ދެމެދު އަޅާފައިވާ ސިނަމާލެ ބުރިޖަށް ހުރިހާ ވައްތަރެއްގެ އުޅަނދުތަކައް 24 ގަޑިއިރު ދަތުރުކުރެވޭ ގޮތައް ހަމަޖައްސައިފިއެވެ.
މޯލްޑިވްސް ޓްރާންސްޕޯޓް އޮތޯރިޓީގެ މިނިންމުން ނިންމީ ކޮވިޑް-19އާ ގުޅިގެން އާންމު ރައްޔިތުންނަށް ލުއި ފަސޭހަކޮށްދިނުމަށެވެ.
މީގެކުރިން ވަކި ގަޑިތަކެއްގައި ބުރިޖުމަތީގައި މުދާ އުފުލުމަކީ މަނާކަމެކެވެ. އެގޮތުން ހެނދުނު 9:00 އިން ފެށިގެން ހަވީރު 3:00 އަށް އަދި މެންދަމު، 1:00 އިން ހެނދުނު 6:00 އަށް ބުރިޖު މަތިންް މުދާ އުފުލުމަކީ މަނާކަމެކެވެ. ނަމަވެސް މިނިންމުމާއެކު ކޮންމެ ވަގުތެއްގައި ވެސް ބްރިޖުން މުދާ އުފުލޭނެއެވެ.
އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ޓާސްކްފޯހުގެ ތަރުޖަމާނު މަބްރޫކް އަޒީޒު ވިދާޅުވީ އާދިއްތަ ދުވަހުން ފެށިގެން ސްކޫލުތައް ހުޅުވުމާ ހަމައަށް ހުރިހާ އުޅަނދަކަށް ކޮންމެ ވަގުތެއްގައިވެސް ބުރިޖުމަތިން ދަތުރުކުރެވޭނެ ކަމަށެވެ.
24 ގަޑިއިރު މުދާ އުފުލުމުގެ ހުއްދަ މޯލްޑިވްސް ޓްރާންސްޕޯޓް އޮތޯރިޓީން ދީފައިވާއިރު، މިދިޔަ ޖުލައި މަހު އެ އޮތީރިޓީން ވަނީ މާލެ އަދި ހުޅުމާލޭގައި ހެނދުނު 11:30 އިން މެންދުރު 1:30 އަށް 350 ކިލޯއިން ފެށިގެންމަތީގެ އެއްވެސް އުޅަނދެއްގައި މުދާ އުފުލުން ވެސް މާނާކޮށްފައެވެ. އަދި މިގަވާއިދާ ހިލާފުވާ ފަރާތްތަކާ މެދު ފިޔަވަޅު އަޅާނެ ކަމަށް އެއޮތޯރިޓީން ބުނެއެވެ.
ކޮވިޑް-19އާ ކޮންޓްރޯލްކޮށް އާންމު ރައްޔިތުންނަށް ސަލާމަތާއި ރައްކާތެރިކަން ހޯދައިދިނުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ސަރުކާރުގެ އޮފީސްތަކާއި، ސްކޫލް، ކޮލެޖް، ޔުނިވަރސިޓީ އަދި ޓިއުޝަން ކްލާސްތައް ވަނީ ބަންދުކޮށްފައެވެ.
މީގެ އިތުރުން މާލެ ސިޓީގެ ކެފޭ ރެސްޓޯރެންޓުތައް ބަންދުކޮށްފައިވާއިރު، ޖިމް ކްލާސްތައް ވެސް ވަނީ ބަންދުކޮށްފައެވެ. މިދުވަސްވަރު މަގުމައްޗަށް ނުނިކުމެ ގޭގައި ތިބުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ދަނީ ތަކުރާރުކޮށް އާންމު ރައްޔިތުންނަށް އިލްތިމާސްކުރަމުންނެވެ.
