ބޮރޫޝިއާ ޑޯޓްމުންޑުގެ ކެޕްޓަން މާކޯ ރެއުސް އާއި އޭނާގެ އާއިލާއިން ޖަރުމަންގެ ކުދި ވިޔަފާރިތަކަށް މާލީ އެހީތެރިކަން ފޯރުކޮށްދީފި އެވެ.
މިހާރު ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އާ ގުޅިގެން ގިނަ ވިޔަފާރިތައް ވަނީ އަޑިއަޅާލާފައެވެ. އެހެންކަމުން މާކޯ ރެއުސް އާއި އޭނާގެ އާއިލާއިން ވަނީ މާލީ ގޮތުން ދަތިތަކާއި ކުރިމަތިލާން ޖެހިފައިވާ ކުދި ވިޔަފާރިތަކަށް ފަސް ލައްކަ ޔޫރޯ ހަދިޔާކޮށްފައެވެ.
ޖަރުމަންގެ ކުދި ވިޔަފާރިތަކަށް ރެއުސް އެހީވިއިރު، ޑޯޓްމުންޑުގެ ކުޅުންތެރިން ވަނީ އެ ކުޅުންތެރިންގެ މުސާރަ ދެބައިކުޅަ އެއްބަޔަށް ކުޑަކުރަން ނިންމާފައެވެ. ޑޯޓްމުންޑުގެ ކުޅުންތެރިން މުސާރަ ކުޑަކުރަން ނިންމީ މިވަގުތު ދުނިޔޭގެ ފުޓްބޯޅައިގެ ހަރަކާތްތައް ހުއްޓާލާފައި އޮތުމުން، އެ ކްލަބަށް މާލީ ގޮތުން ގޮންޖެހުންތަކަކާ ކުރިމަތިލާން ޖެހުމުންނެވެ. ޖަރުމަން ލީގުގެ ކުޅުންވެސް މިވަގުތު ހުއްޓާލާފައިވާއިރު، އަލުން ލީގު ފެށުމަށް ނިންމާފައިވަނީ އޭޕްރީލް މަސް ފަހުންނެވެ.
މުޅި ދުނިޔޭގެ ފުޓްބޯޅަ ވަގުތީ ގޮތުން ހުއްޓަމަކަށް އައިސްފައިވާއިރު، ކޮވިޑް-19 އިން ސަލާމަތްވުމަށް ފުޓްބޯޅަ އެކި ތަރިން އަންނަނީ އެހީތައް ވަމުންނެވެ. އެގޮތުން ޖަރުމަން ގައުމީ ޓީމުގެ ލިއޯން ގޮރެޓްޒްކާ އާއި ޖޯޝުއާ ކިމިޗް ވަނީ ގުޅިގެން ކޮރޯނާވައިރަސް (ކޮވިޑް-19) ޖެހިފައިވާ މީހުންނަށް އެހީތެރިކަން ފޯރުކޮށްދިނުމުގެ ގޮތުން ހާއްސަ ވެބްސައިޓެއް މެދުވެރިކޮށް ފަންޑެއް ހުޅުވާފައެވެ. މި ފަންޑު ލިއޯން ގޮރެޓްޒްކާ އާއި ޖޯޝުއާ ކިމިޗް ހުޅުވީ އެ ދެ ކުޅުންތެރިން ގުޅިގެން އެއް މިލިއަން ޔޫރޯ ފަންޑަށް ލުމަށްފަހު އެވެ.
އަދި ހަމަ އެ ފަންޑަށް ބަޔާން މިއުނިކަށް ކުޅެމުން އަންނަ ޕޮލެންޑުގެ ފޯވާޑް ރޮބަޓް ލެވަންޑޯސްކީ އާއި އޭނާގެ އަންހެނުން ވަނީ އެއް މިލިއަން ޔޫރޯ ހަދިޔާކޮށްފައެވެ.
